ເຮືອບິນໂດຍສານຂະໜາດນ້ອຍ ສາຍການບິນ ທຣານເອເຊຍ ຂອງໄຕ້ຫວັນ ຕົກກາງແມ່ນ້ຳໃນນະຄອນຫລວງໄທເປ ມີຜູ້ໂດຍສານ ແລະ ລູກເຮືອ ລວມ 58 ຄົນ.
ສຳນັກຂ່າວຕ່າງປະເທດ ລາຍງານວ່າ ມື້ນີ້ (4 ກຸມພາ) ເວລາປະມານ 11 ໂມງ ເກີດເຫດເຮືອບິນໂດຍສານຂະໜາດນ້ອຍ ສາຍການບິນ ທຣານເອເຊຍ ຖ້ຽວບິນ GE235 ຂອງໄຕ້ຫວັນ ບັນທຸກຜູ້ໂດຍສານ ແລະ ລູກເຮືອລວມ 58 ຄົນ ປະສົບອຸບັດເຫດຕົກລົງບໍລິເວນແມ່ນ້ຳຄີຫລຸງ ໃຈກາງນະຄອນຫລວງໄທເປ ໂດຍມີລາຍງານຜູ້ໂດຍສານເສຍຊີວິດແລ້ວ 2 ຄົນ ຫລັງຈາກທີ່ເຈົ້າໜ້າທີ່ກູ້ໄພໄຕ້ຫວັນໄດ້ເຂົ້າໄປຊ່ວຍຜູ້ລອດຊີວິດໃນທີ່ເກີດເຫດ ປັດຈຸບັນສາມາດຊ່ວຍຜູ້ລອດຊີວິດອອກມາໄດ້ແລ້ວ ປະມານ 16 ຄົນ.
ເຮືອບິນລຳດັ່ງກ່າວ ແມ່ນບິນຂຶ້ນຈາກສະໜາມບິນຊົງຊານ ນະຄອນຫລວງໄທເປ ເພື່ອຈະມຸ່ງໜ້າໄປຍັງສະໜາມບິນຄິນເໝິນ ທາງພາກຕາເວັນອອກສຽງໃຕ້ຂອງປະເທດຈີນ ແຕ່ພັດມາປະສົບອຸບັດເຫດຕົກເສຍກ່ອນ.
ສຳລັບສາເຫດຂອງເຮືອບິນຕົກນັ້ນ ເຈົ້າໜ້າທີ່ຍັງບໍ່ທັນຮູ້ແຈ້ງເທື່ອ ເບື້ອງຕົ້ນແມ່ນໂຄສົກລັດຖະບານໄຕ້ຫວັນໄດ້ລະບຸວ່າ ເຮືອບິນຕົກຫລັງຈາກທີ່ຕຳກັບຂົວຂ້າມແມ່ນ້ຳ.
