ຊາວປະມົງອົດສະຕາລີ ຈັບສະຫລາມກັອບລິນໄດ້ ຜູ້ຊ່ຽວຊານສັດທະເລລະບຸ ເປັນສັດດຶກດຳບັນ ເປັນສາຍພັນເດີມ ກ່ວາ 100 ລ້ານປີກ່ອນ.
ສຳນັກຂ່າວຕ່າງປະເທດ ລາຍງານໃນວັນທີ 3 ກຸມພານີ້ວ່າ ທ່ານ ເຄັນລີ້ ຊາວປະມົງອົດສະຕາລີ ອາຍຸ 22 ປີ ສາມາດຈັບສະຫລາມກັອບລິນໄດ້ ເຊິ່ງເປັນສະຫລາມທີ່ອາໄສຢູ່ໃນນ້ຳເລິກກ່ວາ 1 ກິໂລແມັດຈາກຜິວນ້ຳ ມີຮູບຮ່າງທີ່ແປກປະຫລາດ ເຊິ່ງບໍ່ປະກົດໃຫ້ເຫັນມາກ່ອນ ໂດຍນັກວິທະຍາສາດໄດ້ລະບຸວ່າ ສະຫລາມກັອບລິນນີ້ ແມ່ນເປັນສາຍພັນທີ່ຍັງຮັກສາຮູບຮ່າງເດີມຂອງຕົນເອງ ຍ້ອນຫລັງຄືນໄປບໍ່ຕ່ຳກ່ວາ 100 ລ້ານປີ.
ຜູ້ຊ່ຽວຊານໄດ້ຄາດການວ່າ ສະຫລາມກັອບລິນທີ່ສາມາດຈັບໄດ້ນີ້ ແມ່ນມີອາຍຸປະມານ 2-3 ປີ ໂດຍມີຄວາມຍາວລຳຕົວ 1.2 ແມັດ ເຊິ່ງມັນຍັງຈະສາມາດມີຄວາມຍາວເພີ່ມໄດ້ອີກເຖິງ 3.8 ແມັດອີກດ້ວຍ.
