ກົມສົ່ງເສີມ ແລະ ພັດທະນາສິນຄ້າ ກະຊວງອຸດສະຫະກຳ ແລະ ການຄ້າ ຮ່ວມກັບສູນອາຊຽນ-ເກົາຫຼີ ໄດ້ຈັດສຳມະນາ “ການພັດທະນາສິນຄ້າກະສິກຳລາວ ເຂົ້າສູ່ຕະຫຼາດເກົາຫຼີ” ຂຶ້ນໃນວັນທີ 28 ມັງກອນ 2015 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ມີທ່ານ ສົມຫວັງ ນິນທະວົງ ຫົວໜ້າຫ້ອງການກະຊວງອຸດສະຫະກຳ-ການຄ້າ ແລະ ທ່ານເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສ ເກົາຫຼີ ພ້ອມດ້ວຍທ່ານຜູ້ຕາງໜ້າພາກລັດ-ລັດວິສາຫະກິດ ສະພາອຸດສະກຳການຄ້າ ແລະ ຫົວໜ່ວຍທຸລະກິດເຂົ້າຮ່ວມ.
ການຈັດສຳມະນາດັ່ງກ່າວຂຶ້ນ ເພື່ອຊ່ວຍດ້ານການພັດທະນາສິນຄ້າ ໂດຍສະເພາະແມ່ນ ສິນຄ້າກະສິກຳລາວ ໃຫ້ເປັນສິນຄ້າທີ່ມີຄຸນະພາບ ເພື່ອພັດທະນາໃຫ້ມີຄວາມສາມາດສົ່ງອອກ ທັງເພື່ອເປັນການຂະຫຍາຍການຄ້າລະຫວ່າງລາວ-ເກົາຫຼີ ແລະ ແກ້ໄຂບັນຫາຄວາມບໍ່ສົມດຸນທາງການຄ້າ ໂດຍສະເພາະ ການເພີ່ມມູນຄ່າຜ່ານການປຸງແຕ່ງ ຜ່ານຂັ້ນຕອນການຜະລິດທີ່ມີຄຸນະພາບ ແລະ ການຫຸ້ມຫໍ່ທີ່ໄດ້ມາດຕະຖານ ເພື່ອສົ່ງອອກໄປສູ່ຕະຫຼາດເປົ້າໝາຍ ໂດຍສະເພາະຕະຫຼາດເກົາຫຼີ ແລະ ໃນການສຳມະນາໃນຄັ້ງນີ້ ໄດ້ມີຊ່ຽວຊານສະເພາະດ້ານຈາກ ສ ເກົາຫຼີ ມາໃຫ້ຄວາມຮູ້ ແລະ ປະສົບການໃນການຜະລິດ ການນຳໃຊ້ການປະສານກັນຂອງວັດຖຸດິບ ເພື່ອສ້າງໃຫ້ເປັນສິນຄ້າທີ່ມີຄຸນະພາບ ແລະ ໄດ້ມາດຕະຖານ ເຊິ່ງມີປະໂຫຍດຫຼວງຫຼາຍຕໍ່ຫົວໜ່ວຍທຸລະກິດ ເພື່ອນຳເອົາບົດຮຽນໄປປັບປຸງ ແລະ ໝູນໃຊ້ເຂົ້າໃນວຽກງານຕົວຈິງ.
ແຫລ່ງຂ່າວ: ວຽງຈັນໃໝ່