ຊາວປາເລດສະຕິນ ບໍ່ພໍໃຈສະຫະປະຊາຊາດຢຸດການຊ່ວຍເຫລືອຜູ້ເຄາະຮ້າຍຈາກສົງຄາມ ບຸກເຂົ້າສຳນັກງານ UN ຢູ່ກາຊາ ເພື່ອທຳການປະທ້ວງ.
ສຳນັກຂ່າວຕ່າງປະເທດ ລາຍງານໃນວັນທີ 28 ມັງກອນຜ່ານມານີ້ວ່າ ມີຊາວປາເລດສະຕິນນັບສິບຄົນ ບຸກໂຈມຕີເຂົ້າສະຖານທີ່ເຮັດວຽກຂອງສະຫະປະຊາຊາດ ໃນເມືອງກາຊາ ເພື່ອປະທ້ວງການຕັດສິນໃຈຂອງສະຫະປະຊາຊາດ ທີ່ຢຸດຕິການໃຫ້ຄວາມຊ່ວຍເຫລືອຜູ້ປະສົບເຄາະຮ້າຍ ຈາກໄພຄວາມຮຸນແຮງຈາກການຕໍ່ສູ້ ເມື່ອປີທີ່ຜ່ານມາ ເນື່ອງຈາກອົງການສະຫະປະຊາຊາດ ຂາດແຄນເງິນຊ່ວຍເຫລືອຈາກປະເທດຜູ້ບໍລິຈາກ ເຮັດໃຫ້ກຸ່ມຜູ້ປະທ້ວງພາກັນໂດດຂ້າມກຳແພງຂອງອາຄານ UN ແລ້ວເຂົ້າໄປທຳລາຍປ້ອມຍາມ, ເຜົາຢາງລົດ ແລະ ແກ່ວງກ້ອນຫີນໃສ່ອາຄານດັ່ງກ່າວ.
ເຈົ້າໜ້າທີ່ອົງການສະຫະປະຊາຊາດກ່າວວ່າ ພວກເຂົາຕ້ອງການເງິນເຖິງ 720 ລ້ານໂດລາສະຫະລັດ ສຳລັບການຊ່ວຍເຫລືອຜູ້ທີ່ບໍ່ມີເຮືອນຢູ່ ຈາກການຖືກທຳລາຍເສຍຫາຍຈາກສົງຄາມ ເຊິ່ງມີຫລາຍເຖິງ 96,000 ຄອບຄົວ ໄດ້ຮັບຜົນກະທົບ.