ກອງປະຊຸມຄະນະກຳມາທິການຮ່ວມຊາຍແດນ ລາວ-ໄທ ໄທ-ລາວ ຄັ້ງທີ 10 ຈັດຂຶ້ນລະຫວ່າງວັນທີ 21-23 ມັງກອນ 2015 ທີ່ສູນການຮ່ວມມືສາກົນ ລາວ-ຍີ່ປຸ່ນ (ຫຼັກ 5) ນະຄອນຫຼວງວຽງຈັນ ໂດຍເປັນປະທານຮ່ວມລະຫວ່າງທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດແຫ່ງ ສປປ ລາວ ແລະ ທ່ານ ພົ.ອ ທະນະສັກ ປະຕິມາປຣະກອນ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດແຫ່ງ ຣາຊະອານາຈັກໄທ ມີບັນດາລັດຖະມົນຕີຊ່ວຍວ່າການ ຫົວໜ້າກົມ ຫ້ອງການ ແລະ ເຈົ້າໜ້າທີ່ລະດັບສູງຂອງສອງຝ່າຍເຂົ້າຮ່ວມ.
ກອງປະຊຸມຄະນະກຳມາທິການຊາຍແດນຮ່ວມ ລາວ-ໄທ ຄັ້ງທີ 10 ສອງຝ່າຍໄດ້ປຶກສາຫາລືກ່ຽວກັບວຽກງານຊາຍແດນທັງສອງປະເທດ ເພື່ອເຮັດໃຫ້ວຽກງານດັ່ງກາວ ມີຄວາມຈະແຈ້ງ ຖືກຕ້ອງ ແລະ ຊັດເຈນ ສ້າງໃຫ້ຊາຍແດນ ລາວ-ໄທ ກາຍເປັນຊາຍແດນແຫ່ງສັນຕິພາບ ມິດຕະພາບ ແລະ ການຮ່ວມມື ໂດຍສະເພາະແມ່ນການກະກຽມເຂົ້າເປັນປະຊາຄົມເສດຖະກິດອາຊຽນ ທີ່ຈະມີຂຶ້ນໃນທ້າຍປີ 2015 ນີ້ ກອງປະຊຸມສອງຝ່າຍ ໄດ້ເຫັນດີຮັບຮອງເອົາບົດບັນທຶກກອງປະຊຸມຄະນະກຳມາທິການເຕັກນິກຮ່ວມ ລາວ-ໄທ ຄັ້ງທີ 12 ວຽກງານການກໍ່ສ້າງຫຼັກໝາຍຊາຍແດນເພີ່ມຕື່ມອີກ ຈຳນວນ 6 ຫຼັກ ການວັດແທກຮັບສັນຍານດາວທຽມລະບົບ GPS (ເບື້ອງລາວທີ່ເປ່ເພ) ຂໍ້ກຳນົດ ແລະ ວິທີການທາງດ້ານເຕັກນິກ ກ່ຽວກັບການສຳຫຼວດເພີ່ມຕື່ມບໍລິເວນທົ່ງໜອງບົວ ພ້ອມນີ້ ກອງປະຊຸມຍັງໄດ້ປຶກສາຫາລືຊອກຫາວິທີແກ້ໄຂບັນດາຈຸດຄົງຄ້າງ ກ່ຽວກັບບໍລິເວນທີ່ເກີດຢູ່ນ້ຳເຫື້ອງ ບໍລິເວນຫ້ວຍໂດນ ແລະ ບໍລິເວນວັງເຕົ່າ-ຊ່ອງເມັກ ບັນຫາຈັດສັນນ້ຳໃນພູມີປະເທດຕົວຈິງ ທີ່ແຕກຕ່າງກັບເສັ້ນຊາຍແດນໃນແຜນທີ່ມາດຕາສ່ວນ 1:2 ແສນ ຈຳນວນ 7 ຈຸດ ໃນນັ້ນ ຢູ່ທາງພາກເໜືອຈຳນວນ 2 ຈຸດ ແລະ ພາກໃຕ້ 5 ຈຸດ ກອງປະຊຸມສອງຝ່າຍເຫັນດີ ໃຫ້ມີການເລັ່ງລັດການດຳເນີນການວັດແທກ ຈຸດພິກັດເບື້ອງຝັ່ງໄທໃຫ້ສຳເລັດໂດຍໄວ ການສ້ອມແປງຫຼັກໝາຍຊາຍແດນເລກທີ 2-5 ທີ່ເປ່ເພ.
ລັດຖະບານລາວ ແລະ ໄທ ໄດ້ຮ່ວມກັນສຳຫຼວດ-ປັກຫຼັກໝາຍຊາຍແດນຮ່ວມກັນແຕ່ວັນທີ 5 ພຶດສະພາ 1997 ເປັນຕົ້ນມາ ຮອດປັດຈຸບັນ ສຳເລັດແລ້ວ 210 ຫຼັກໝາຍ ຄວາມຍາວຂອງເສັ້ນຊາຍແດນ ປະມານ 676 ກິໂລແມັດ ເຊິ່ງໃນກອງປະຊຸມຄະນະກຳມາທິການຊາຍແດນຮ່ວມ ລາວ-ໄທ ຄັ້ງທີ 10 ສອງຝ່າຍໄດ້ມີແຜນຈັດຕັ້ງປະຕິບັດການສຳຫຼວດ-ປັກຫຼັກໝາຍຊາຍແດນ ທາງບົກ ໃຫ້ສຳເລັດພາຍໃນປີ 2016 ແລະ ທາງນ້ຳ ໃຫ້ສຳເລັດໃນປີ 2018.
ແຫລ່ງຂ່າວ: ວຽງຈັນໃໝ່