ອາ​ຊຽນ​ຈະ​ບັນ​ລຸ​ເປົ້າ​ໝາຍ​ຮວມ​ໂຕ​ກັນ ເປັນ​ປະ​ຊາ​ຄົມ​ເສດ​ຖະ​ກິດ​ອາ​ຊຽນ ຫລື AEC ຢ່າງ​ເປັນ​ທາງ​ການ​ໃນ​ທ້າຍ​ປີ​ນີ້ ແລະ ຢືນ​ຢັນ​ຈະ​ບໍ່​ນຳ​ໃຊ້​ສະ​ກຸນ​ເງິນ​ຕາ​ຮ່ວມ​ກັນແບບ​ EU.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 25 ມັງ​ກອນ​ຜ່ານ​ມາ​ນີ້​ວ່າ ທ່ານ ມຸດ​ສະ​ຕາ​ປາ ໂມ​ຮາ​ເໝັດ ລັດ​ຖະ​ມົນ​ຕີ​ວ່າ​ການ​ກະ​ຊວງ​ການ​ຄ້າ​ມາ​ເລ​ເຊຍ ເຊິ່ງ​ເຂົ້າ​ຮ່ວມກອງ​ປະ​ຊຸມເວ​ທີ​ເສດ​ຖະ​ກິດ​ໂລກ (World Economic Forum) ທີ່​ຈັດ​ຂຶ້ນ​ທີ່​ເມືອງ​ດາ​ວອດ​ ປະ​ເທດ​ສະ​ວິດ​ເຊີ​ແລນ ໃນ​ມື້​ວັນ​ທີ 24 ມັງ​ກອນ​ຜ່ານ​ມາ ໄດ້​ຊີ້​ແຈງ​ຄວາມ​ຄືບ​ໜ້າ ການ​ຮ່ວມ​ມື​ທາງ​ເສດ​ຖະ​ກິດ​ຂອງ​ສະ​ມາ​ຄົມ​ປະ​ຊາ​ຊາດ ອາ​ຊີ​ຕາ​ເວັນ​ອອກ​ສຽງ​ໃຕ​້ ຫລື ອາ​ຊຽນ ໃນ​ຖາ​ນະ​ທີ່​ປະ​ເທດ​ມາ​ເລ​ເຊຍ ດຳ​ລົງ​ຕຳ​ແໜ່ງ​ເປັນ​ປະ​ທານ​ອາ​ຊຽນ ໃນ​ປີ 2015 ນີ້​ວ່າ 10 ປະ​ເທດ​ອາ​ຊຽນ ຈະ​ຕ້ອງ​ບັນ​ລຸ​ເປົ້າ​ໝາຍ​ການ​ຮວມ​ໂຕ​ ເປັນ​ປະ​ຊາ​ຄົມ​ເສດ​ຖະ​ກິດ​ອາ​ຊຽນ (AEC) ຢ່າງ​ເປັນ​ທາງ​ການ​ໃນ​ທ້າຍ​ປີ 2015 ນີ້.

ທ່ານ ມຸດ​ສະ​ຕາ​ປາ ຍັງ​ກ່າວ​ອີກວ່າ ເປົ້າ​ໝາຍ​ສຳ​ຄັນ​ຂອງ​ເອ​ອີ​ຊີ ແມ່ນ​ການ​ຮວມ​ຕົວ​ເປັນ​ຕະ​ຫລາດ​ດຽວ ທີ່​ມີ​ຖານ​ການ​ຜະ​ລິດ​ຮ່ວມ​ກັນ, ຄວາມ​ພະ​ຍາ​ຍາມ​ທີ່​ຈະ​ຫລຸດ​ອຸ​ປະ​ສັກ​ທາງ​ການ​ຄ້າ ທີ່​ບໍ່​ແມ່ນ​ມາດ​ຕະ​ການ​ທາງ​ພາ​ສີ ເຊິ່ງ​ຈະ​ຊ່ວຍ​ໃຫ້​ການ​ເຄື່ອນ​ຍ້າຍ​ຖານ​ຜະ​ລິດ​ສິນ​ຄ້າ ແລະ ການ​ບໍ​ລິ​ການ​ໃນ​ກຸ່ມ​ອາ​ຊຽນ ເປັນ​ໄປ​ຢ່າງ​ອິດ​ສະ​ຫລະ​ຫລາຍ​ຂຶ້ນ ແຕ່​ກໍ​ບໍ່​ເຖິງ​ຂັ້ນ​ເຄື່ອນ​ຍ້າຍ​ໂດຍ​ເສ​ລີ ແລະ ອາ​ຊຽນ​ຈະ​ບໍ່​ປະ​ກາດ​ໃຊ້​ສະ​ກຸນ​ເງິນ​ຕາ​ຮ່ວມ​ກັນ ແບບ​ສະ​ຫະ​ພາບ​ເອີ​ຣົບ ຫລື EU ແຕ່​ຢ່າງ​ໃດ.