ອົງການທ່ອງທ່ຽວແຫ່ງຊາດຍີ່ປຸ່ນ (JNTO) ເປີດເຜີຍໃນປີ 2014 ມີຍອດນັກທ່ອງທ່ຽວຕ່າງປະເທດ ເດີນທາງເຂົ້າຍີ່ປຸ່ນສູງຸສດເປັນປະຫວັດສາດ ເຖິງ 13.4 ລ້ານຄົນ ເພີ່ມຂຶ້ນເຖິງ 30% ຈາກປີກ່ອນໜ້າ.
ສຳນັກຂ່າວຕ່າງປະເທດ ລາຍງານໃນວັນທີ 20 ມັງກອນ 2014 ມີຍອດນັກທ່ອງທ່ຽວຕ່າງປະເທດ ເດີນທາງມາຢ້ຽມຢາມປະເທດຍີ່ປຸ່ນພາຍໃນປີ 2014 ສູງເຖິງ 13.4 ລ້ານຄົນ ເພີ່ມຂຶ້ນສູງເຖິງ 30% ຈາກປີ 2013 ໂດຍສ່ວນໃຫຍ່ແມ່ນນັກທ່ອງທ່ຽວຈາກໄຕ້ຫວັນ ແລະ ເກົາຫລີໃຕ້ ຖັດລົງມາກໍເປັນນັກທ່ອງທ່ຽວຈາກຈີນ ເປັນຕົ້ນຕໍ. ທັງນີ້, ການທ່ອງທ່ຽວໃນຍີ່ປຸ່ນ ກຳລັງຟື້ນຕົວຂຶ້ນຢ່າງແຂງແຮງ ຈາກຜົນພວງຂອງຄ່າເງິນເຢນທີ່ອ່ອນຄ່າລົງ ເຮັດໃຫ້ລາຄາສິນຄ້າ ແລະ ການບໍລິການຕ່າງໆຖືກລົງ ໂດຍຈຳນວນຖ້ຽວບິນຈາກຕ່າງປະເທດ ທີ່ເດີນທາງເຂົ້າຍີ່ປຸ່ນກໍມີຈຳນວນເພີ່ມຂຶ້ນອີກມະຫາສານ ນັບຕັ້ງແຕ່ປີ 2013 ເປັນຕົ້ນມາ ໂດຍໃນປີດັ່ງກ່າວນັ້ນ ກໍເປັນປີທຳອິດໃນປະຫວັດສາດ ທີ່ຍີ່ປຸ່ນມີຍອດນັກທ່ອງທ່ຽວເດີນທາງເຂົ້າທະລຸຫລັກ 10 ລ້ານຄົນ.