ປະເທດ​ຍີ່ປຸ່ນ​ກາຍເປັນ​ປະເທດທີ 27 ຂອງ ​ສປປ ລາວ ທີ່​ຈະ​ບິນລັດ​ໜ່ານ​ຟ້າ​ຂົນສົ່ງ​ສິນຄ້າ​ທາງອາກາດ​ຫາ​ກັນ​ໂດຍ​ກົງ ພາຍຫຼັງສັນຍາ​ສະບັບ​ນີ້​ທັງ​ສອງ​ປະເທດ ໄດ້​ບັນລຸ​ລ່ວງ​ກັນ​ແລ້ວ​ຈະ​ສົ່ງ​ຜົນດີ​ໃຫ້​ກັບ​ການ​ຄ້າ​ລະຫວ່າງ​ປະເທດ ​ໃນ​ຍຸກ​ຂອງ​ເຊື່ອມ​ໂຍງ​ປະຊາຄົມ​ເສດຖະກິດ​ອາ​ຊຽນ AEC.

ພິ​ທິ​ເຊັນ​ສັນຍາ​ຂົນສົ່ງ​ທາງອາກາດ 2 ຝ່າຍ​ໄດ້​ຈັດ​ຂຶ້ນ​ໃນວັນ​ທີ 16 ມັງກອນ 2015 ທີ່​ໂຮງແຮມ​ລາວ​ພລາ​ຊາ ນະຄອນຫຼວງ​ວຽງ​ຈັນ ​ສປປ ລາວ ຕາງໜ້າ​ໃຫ້​ລັດຖະບານ ​ສປປ ລາວ ເຊັນ​ສັນຍາ​ຄັ້ງ​ນີ້ ​ໂດຍ​ທ່ານ ​ດຣ. ບຸນ​ຈັນ ສິນ​ທະ​ວົງ ລັດຖະມົນຕີວ່າການ​ກະຊວງ​ໂຍທາ​ທິ​ການ ແລະ ຂົນສົ່ງ ແລະ ທ່ານ Hiroyuki Kishino ເອກ​ອັກ​ຄະລັດ​ຖະ​ທູດ​ຜູ້​ມີ​ອຳນາດ​ເຕັມ​ແຫ່ງ ປະເທດ​ຍີ່ປຸ່ນ ປະຈຳ ​ສປປ ລາວ ພ້ອມ​ດ້ວຍ​ຫົວໜ້າ​ກົມ ຮອງ​ກົມ ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ​ສອງ​ຝ່າຍ​ເຂົ້າ​ຮ່ວມ.

ທ່ານ ຢາ​ກົວ ລໍ​ປາງ​ກາວ ຫົວໜ້າ​ກົມ​ຄຸ້ມ​ຄອງ​ການບິນ​ພົນລະ​ເຮືອນ ກ່າວ​ວ່າ: ການ​ເຊັນ​ສັນຍາ​ຂົນສົ່ງ​ທາງ​ອາກາດ 2 ຝ່າຍໃນ​ຄັ້ງ​ນີ້ ​ຈະ​ເປັນ​ຂີດ​ໝາຍ​ອັນ​ສຳຄັນ​ທີ່​ເປັນ​ພື້ນຖານ​ ໃນ​ການ​ລິ​ເລີ່ມການ​ຮ່ວມ​ມື​ອັນ​ເປັນ​ປະຫວັດສາດ​ ດ້ານ​ການບິນ​ພົນ​ລະ​ເຮືອນລະຫວ່າງ 2 ປະເທດ ພ້ອມ​ນີ້ ກໍ່ເປັນ​ການ​ອຳນວຍ​ຄວາມ​ສະດວກໃຫ້​ແກ່​ສາຍ​ການບິນ​ຂອງ 2 ປະເທດ ໃນ​ການບິນ​ໄປມາຫາສູ່ ແລະ ບິນ​ຜ່ານ​ນ່ານ​ຟ້າ​ເຊິ່ງ​ກັນ ແລະ ທີ່​ຈະ​ສາມາດ​ບິນ​ໄປ​ມາ​ຫາສູ່​ໄດ້​ຢ່າງ​ສະດວກ ພ້ອມ​ນີ້​ກໍ່​ເປັນການ​ສົ່ງເສີມ​ການ​ພັດທະນາ​ເສດຖະ​ກິດ-ສັງຄົມ ແລະ ສ້າງ​ລາຍຮັບ​ເຂົ້າ​ປະເທດ​ຊາດ ​ໃນ​ຫຼາຍ​ຂະແໜງ​ການ ກໍ່​ຄືຂະແໜງການຄ້າ ການ​ລົງທຶນ ແລະ ການ​ທ່ອງທ່ຽວ.

ການ​ເຊັນ​ສັນຍາ​ສະບັບ​ດັ່ງກ່າວ​ ເຮັດ​ໃຫ້​ຍີ່ປຸ່ນ​ກາຍເປັນ​ປະເທດ​ມີ 27 ທີ່ ​ສປປ ລາວ ໄດ້ຮ່ວມ​ສັນຍາ​ທາງ​ດ້ານ​ການ​ຂົນສົ່ງ​ທາງ​ອາກາດ ຄາດ​ວ່າ​ໃນ​ອະນາ​ຄົດ​ອັນ​ໃກ້ ກໍ່​ຄື ​ສປປ ລາວ ເຂົ້າ​ເປັນ​ສະມາຊິກ​ຂອງ AEC ຈະ​ມີ​ການ​ເຊັນ​ສັນຍາ​ກັບ​ອີກຫຼາຍ​ປະເທດ​ໃນ​ອາຊີ ແລະ ເອີ​ຣົບ​ຈະ​ເຮັດ​ໃຫ້​ມູນ​ຄ່າ​ຕົ້ນ​ທາງຂອງ​ສິນຄ້າ​ຫຼຸດ​ລົງ ​ທີ່​ຈະ​ສົ່ງ​ຜົນ​ດີໃຫ້​ກັບ​ຜູ້​ບໍລິໂພກ​ພາຍ​ໃນ​ຂອງສອງ​ຝ່າຍ.

ແຫລ່ງ​ຂ່າວ: ວຽງ​ຈັນ​ໃໝ່