ອົງການປະເທດຜູ້ສົ່ງອອກນ້ຳມັນເປັນສິນຄ້າ (ໂອເປັກ) ຄາດວ່າຕະຫລາດພະລັງງານ ຈະປະເຊີນພາວະອຸປະທານລົ້ນເກີນຄວາມຕ້ອງການ ຕະຫລອດປີ 2015 ເຖິງແມ່ນອຸປະສົງໂລກຈະເພີ່ມຂຶ້ນເລັກໜ້ອຍ.
ສຳນັກຂ່າວຕ່າງປະເທດ ລາຍງານໃນວັນທີ 16 ມັງກອນນີ້ວ່າ ບົດລາຍງານປະຈຳເດືອນ ທີ່ຖືກເຜີຍແຜ່ທີ່ນະຄອນຫລວງວຽນນາ ປະເທດໂອຕຣິດ ໃນມື້ວັນພະຫັດທີ 15 ມັງກອນຜ່ານມານີ້ໄດ້ລະບຸວ່າ ກຸ່ມໂອເປັກຕີລາຄາສະພາບລາຄານ້ຳມັນໃນຕອນນີ້ ແມ່ນໃກ້ເຖິງລະດັບຕ່ຳສຸດໃນຮອບ 6 ປີ ຈະຍັງຄົງປັບຫລຸດລົງໄປອີກໃນປີນີ້ ຂະນະທີ່ຕະຫລາດຈະຍັງຢູ່ໃນພາວະຖົດຖອຍຕໍ່ໄປອີກດົນ ທ່າມກາງອຸປະທານທີ່ລົ້ນຕະຫລາດຢູ່ ຢ່າງໜ້ອຍ 1 ລ້ານບາເຣນຕໍ່ມື້.
ກຸ່ມໂອເປັກ ເຊິ່ງມີສະມາຊິກ 12 ຊາດ ແລະ ຜະລິດນ້ຳມັນດິບປ້ອນຕະຫລາດໂລກເຖິງ 1 ໃນ 3 ບອກຕໍ່ວ່າ ອຸປະສົງທີ່ເພີ່ມຂຶ້ນເລັກໜ້ອຍໃນປີ 2015 ສ່ວນໃຫຍ່ຈະມາຈາກ ການຟື້ນຕົວທາງກິດຈະກຳຂອງເສດຖະກິດ ໃນບັນດາປະເທດແຖບອາເມຣິກາເໜືອ ແລະ ປະເທດອື່ນໆໃນອາຊີ ຍົກເວັ້ນຈີນ ແລະ ຍີ່ປຸ່ນ.