ເມື່ອຕົ້ນເດືອນມັງກອນນີ້ ສານປະຊາຊົນນະຄອນຫລວງວຽງຈັນ ໄດ້ຕັດສີນລົງໂທດ ທ້າວ ສຸລິເດດ ອາຍຸ 24 ປີຢູ່ບ້ານໜອງປີງ ເມືອງຈັນທະບູລີ ນະຄອນຫລວງ ວຽງຈັນ ໃຫ້ຈຳຄຸກເປັນເວລາ 9 ປີ ພ້ອມປັບໃໝ 64 ລ້ານກີບ ໃນຂໍ້ຫາເສບ ແລະ ຄ້າຢາເສບຕິດ, ໂດຍຜູ້ກ່ຽວຖືກເຈົ້າໜ້າທີ່ຈັບຕົວໄດ້ເມື່ອຕົ້ນເດືອນເມສາ 2014 ໃນຂະນະຂີ່ລົດເລາະລັກຂາຍຢາເສບຕິດໃຫ້ລູກຄ້າ ຢູ່ເຂດບ້ານໂພນຄຳ ເມືອງສີໂຄດຕະບອງ ນະຄອນຫລວງວຽງຈັນ ພ້ອມຂອງກາງຢາບ້າ 591 ເມັດ.
ເຈົ້າໜ້າທີ່ໃຫ້ຮູ້ວ່າ: ທ້າວ ສຸລິເດດ ເຄີຍຖືກຜູ້ປົກຄອງສົ່ງຕົວໄປບຳບັດຢູສູນປິ່ນປົວຢາເສບຕິດມາແລ້ວ 2 ຄັ້ງຍ້ອນ ເສບຢາບ້າ ແລະ ພາຍຫລັງອອກຈາກສູນ ດັ່ງກ່າວ ເມື່ອຕົ້ນປີ 2014 ກໍບໍ່ມີຄວາມເຂັດຫລາບ ແລະ ສືບຕໍ່ພົວພັນເສບ ແລະ ຄ້າຂາຍຢາເສບຕິດໃຫ້ຊາວໜຸ່ມ ໃນເຂດເມືອງຈັນທະບູລີ, ສີໂຄດຕະບອງ ແລະ ເມືອງໃກ້ຄຽງອື່ນໆ, ຈຶ່ງຖືກເຈົ້າໜ້າທີ່ຈັບຕົວມາດຳເນີນຄະດີ ຕາມລະບຽບກົດໝາຍດັ່ງກ່າວ.
ແຫລ່ງຂ່າວ: ລາວພັດທະນາ