ກຳປັ່ນຂົນສົ່ງສິນຄ້າຂອງຈີນ ຂະໜາດໃຫຍ່ທີ່ສຸດໃນໂລກ ເດີນທາງໄປຮອດອັງກິດແລ້ວ ຫລັງຈາກເດີນມະຫາສະໝຸດໃຊ້ເວລາເກືອບ 1 ເດືອນເຕັມ.
ສຳນັກຂ່າວຕ່າງປະເທດ ລາຍງານໃນວັນທີ 12 ມັງກອນຜ່ານມານີ້ວ່າ ບໍລິສັດເດີນເຮືອສິນຄ້າຈີນ ໄດ້ແລ່ນເຮືອກຳປັ່ນບັນທຸກຕູ້ຄອນເທັນເນີ້ ລຳໃຫຍ່ທີ່ສຸດໃນໂລກ ເດີນທາງຜ່ານມະຫາສະໝຸດໄປເຖິງທ່າເຮືອເຟລິກສະໂຕ ເຊິ່ງເປັນທ່າເຮືອທີ່ໃຫຍ່ທີ່ສຸດໃນປະເທດອັງກິດ ແລະ ຍັງເປັນທ່າເຮືອທີ່ສຳຄັນອີກແຫ່ງໜຶ່ງຂອງເອີລົບ ໃນມື້ວັນທີ 7 ມັງກອນຜ່ານມາ ຫລັງຈາກທີ່ໄດ້ອອກຈາກຊຽງໄຮ້ ໃນມື້ວັນທີ 8 ທັນວາ 2014.
ທັງນີ້ ກຳປັ່ນບັນທຸກສິນຄ້າລຳດັ່ງກ່າວນີ້ມີຊື່ວ່າ CSCL Globe ເຊິ່ງເປັນໜຶ່ງໃນກຳປັ່ນບັນທຸກສິນຄ້າຂະໜາດໃຫຍ່ 5 ລຳຂອງບໍລິສັດເດີນເຮືອສິນຄ້າຈີນ (China Shipping Container Lines) ໂດຍມີຂະໜາດຍາວກ່ວາ 400 ແມັດ ຫລື ຍາວກ່ວາເດີ່ນເຕະບານຮຽງກັນໃນແນວຍາວ 4 ສະໜາມ ແລະ ມີຄວາມສູງ 73 ແມັດ ສາມາດບັນທຸກຕູ້ຄອນເທັນເນີ້ສິນຄ້າ ຂະໜາດ 20 ຟຸດ ໄດ້ຈຳນວນ 19,100 ຕູ້.
