ທີມຄົ້ນຫາອິນໂດເນເຊຍ ສາມາດກູ້ກ່ອງດຳບັນທຶກຂໍ້ມູນການບິນຂອງ QZ8501 ຂຶ້ນມາໄດ້ແລ້ວ ພ້ອມກຳລັງເລັ່ງຄົ້ນຫາກ່ອງດຳອີກກ່ອງທີ່ບັນທຶກສຽງສົນທະນາໃນຫ້ອງນັກບິນ.
ສຳນັກຂ່າວຕ່າງປະເທດ ລາຍງານໃນວັນທີ 12 ມັງກອນຜ່ານມາວ່າ ທີມນັກດຳນ້ຳອິນໂດເນເຊຍ ສາມາດກູ້ກ່ອງດຳກ່ອງໜຶ່ງຂອງ QZ8501 ຂຶ້ນມາຈາກໃຕ້ນ້ຳໄດ້ແລ້ວ ເຊິ່ງເປັນກ່ອງສ່ວນທີ່ບັນທຶກຂໍ້ມູນການບິນ, ສຳລັບກ່ອງດຳອີກກ່ອງທີ່ບັນທຶກສຽງຂອງນັກບິນນັ້ນ ຍັງບໍ່ທັນຄົ້ນພົບເທື່ອ ໂດຍເຈົ້າໜ້າທີ່ຍັງຄົງເລັ່ງຄົ້ນຫາຢ່າງຕໍ່ເນື່ອງ. ການຄົ້ນພົບກ່ອງດຳບັນທຶກຂໍ້ມູນການບິນດັ່ງກ່າວນີ້ ຄາດວ່າອີກບໍ່ດົນຈະສາມາດໄຂປິດສະໜາ ສາເຫດຂອງເຮືອບິນແອຣ໌ ເອເຊຍ ຖ້ຽວບິນ QZ8501 ຕົກໄດ້ໃນອີກບໍ່ດົນ.
ທັງນີ້ ກ່ອງດຳຂອງເຮືອບິນທຸກລຳ ຈະເຮັດດ້ວຍວັດສະດຸທີ່ທົນທານຕໍ່ແຮງກະແທກ, ທົນທານຕໍ່ໄຟໄໝ້ ແລະ ການຈົມນ້ຳໄດ້ເປັນຢ່າງດີ ໂດຍກ່ອງດຳຂອງເຮືອບິນແຕ່ລະລຳ ຈະມີຢູ່ 2 ກ່ອງ ເຊິ່ງກ່ອງທີໜຶ່ງຈະເຮັດໜ້າທີ່ບັນທຶກຂໍ້ມູນການເຮັດວຽກຂອງເຮືອບິນ ແລະ ສະພາບຂອງເຮືອບິນໂດຍລວມ ບໍ່ວ່າຈະເປັນຄວາມໄວຂອງລົມ, ສະພາບອາກາດ ແລະ ຄວາມໄວຂອງເຮືອບິນ. ສຳລັບກ່ອງດຳອີກກ່ອງໜຶ່ງນັ້ນ ແມ່ນຈະເຮັດໜ້າທີ່ໃນການບັນທຶກສຽງສົນທະນາພາຍໃນຫ້ອງນັກບິນ ໃນໄລຍະ 2 ຊົ່ວໂມງສຸດທ້າຍ ກ່ອນທີ່ຈະປະສົບອຸບັດເຫດ.
