ພະແນກພະລັງງານ ແລະ ບໍ່ແຮ່ ນະຄອນຫຼວງວຽງຈັນ ໄດ້ເຊື້ອເຊີນບັນດາຫົວໜ່ວຍທຸລະກິດ ຜູ້ປະກອບການດ້ານບໍ່ແຮ່ຢູ່ນະຄອນຫຼວງວຽງຈັນ ມາຮ່ວມປະຊຸມ ເພື່ອແຈ້ງກ່ຽວກັບການຄຸ້ມຄອງບໍ່ແຮ່ ພ້ອມທັງປຶກສາຫາລືກ່ຽວກັບການຖອນໃບອະນຸຍາດ ສຳລັບຜູ້ທີ່ບໍ່ເຄື່ອນໄຫວ ບໍ່ອອກທະບຽນວິສາຫະກິດໃຫ້ຜູ້ປະກອບການ ໃຫ້ຜູ້ເຄື່ອນໄຫວບໍ່ຖືກຕ້ອງ ກໍ່ຄືການເຫັນດີໃຫ້ສືບຕໍ່ດຳເນີນກິດຈະການ ຕໍ່ຜູ້ທີ່ປະຕິບັດລະບຽບ ໄດ້ດີມີການສົ່ງບົດສະຫຼຸບທີ່ຖືກຕ້ອງແຕ່ລະໄລຍະ ທັງນີ້ກໍ່ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ມີຄວາມສອດຄ່ອງ ແລະ ສາມາດດຳເນີນກິດຈະການຮັບໃຊ້ສັງຄົມຢ່າງມີປະສິດທິພາບ.
ທ່ານ ປາລິສາດ ຂັນທະວົງ ຫົວໜ້າຂະແໜງບໍ່ແຮ່ ໄດ້ກ່າວວ່າ: ການຄຸ້ມຄອງບັນດາບໍລິສັດ ທີ່ດຳເນີນທຸລະກິດດ້ານບໍ່ແຮ່ ຂຸດຄົ້ນຫີນກໍ່ສ້າງຫີນດານ ແລະ ບໍລິສັດທີ່ປຶກສາ ເປັນການຊຸກຍູ້ສົ່ງເສີມໃຫ້ແກ່ຜູ້ປະກອບການ ກໍ່ຄືນັກລົງທຶນພາຍໃນດ້ານບໍ່ແຮ່ ໄດ້ດຳເນີນທຸລະກິດດ້ານນີ້ ເພື່ອປະກອບສ່ວນສ້າງສາພັດທະນາປະເທດຊາດຂອງຕົນ ເປັນຕົ້ນ ການຂຸດຄົ້ນແຮ່ທາດທີ່ສາມາດສະໜອງໃຫ້ແກ່ການກໍ່ສ້າງ ການປະຕິບັດພັນທະຕ່າງໆຕາມຄວາມເປັນຈິງທີ່ເຄື່ອນໄຫວແຕ່ລະປີຄື: ຄ່າສຳປະທານເນື້ອທີ່ພາສີຊັບພະຍາກອນ ອາກອນເງິນເດືອນ ອາກອນກຳໄລ ກຳໄລປັນຜົນ ພັນທະ 5 ກອງທຶນ ແລະ ອື່ນໆ ຄຽງຄູ່ກັນນີ້ ຍັງມີດ້ານອ່ອນທີ່ຜູ້ປະກອບການບໍ່ໄດ້ເອົາໃຈໃສ່ ຕໍ່ບົດວິພາກເສດຖະກິດຂອງຕົນທີ່ສະເໜີຕໍ່ລັດ ແລະ ສັນຍາທີ່ໄດ້ເຊັນກັນໄວ້ກ່ອນ ເຊັ່ນ: ບໍ່ສົ່ງບົດລາຍງານການເຄື່ອນໄຫວແຕ່ລະໄລຍະທີ່ຖືກຕ້ອງ ໃບອະນຸຍາດໝົດກຳນົດ ໄດ້ຮັບອະນຸຍາດແລ້ວບໍ່ເຄື່ອນໄຫວ ເຊິ່ງນັບແຕ່ປີ 2003 ເຖິງປັດຈຸບັນ ພະແນກພະລັງງານ ແລະ ບໍ່ແຮ່ນະຄອນຫຼວງວຽງຈັນ ໄດ້ອອກອະນຸຍາດທັງໝົດ 46 ກິດຈະການ ຫຼື 41 ບໍລິສັດ ແຕ່ໄດ້ເຄື່ອນໄຫວຕົວຈິງພຽງ 17 ບໍລິສັດ ໃນນີ້ ຂຸດຄົ້ນຫີນກໍ່ສ້າງ 10 ບໍລິສັດ ຫີນດານ 2 ບໍລິສັດ ແລະ ບໍລິສັດທີ່ປຶກສາ 5 ບໍລິສັດ.
ກອງປະຊຸມດັ່ງກ່າວໄດ້ຈັດຂຶ້ນວັນທີ 8 ມັງກອນ 2015 ຢູ່ພະແນກດັ່ງກ່າວ ໂດຍເປັນປະທານຂອງທ່ານ ຄຳພີມ ວົງຈັນມີ ຮອງຫົວໜ້າພະແນກພະລັງງານ ແລະ ບໍ່ແຮ່ ນະຄອນຫຼວງວຽງຈັນ ມີຫົວໜ້າຂະແໜງບໍ່ແຮ່ ພ້ອມດ້ວຍບັນດາບໍລິສັດຜູ້ປະກອບການທຸລະກິດດັ່ງກ່າວເຂົ້າຮ່ວມ.
ແຫລ່ງຂ່າວ: ວຽງຈັນໃໝ່