ຜູ້​ນຳ​ໂລກ 40 ກ່​ວາ​ປະ​ເທດ ຮ່ວມ​ສະ​ແດງ​ພະ​ລັງ ເດີນ​ຂະ​ບວນ​ປະ​ທ້ວງ​ໃນ​ນະ​ຄອນ​ຫລວງ​ປາ​ຣີ ຄາດ​ຈະ​ມີ​ປະ​ຊາ​ຊົນກ່​ວາ​ລ້ານ​ຄົນ ອອກ​ມາ​ເດີນ​ຂະ​ບວນ​ປະ​ທ້ວງ​ຕໍ່​ຕ້ານ​ການ​ກໍ່​ການ​ຮ້າຍ.

ເມື່ອ​ວັນ​ທີ 11 ມັງ​ກອນ​ຜ່ານ​ມາ ສຳ​ນ​ັກ​ຂ່າວ​ຕ່າງ​ປະ​ເທດ​ລາຍ​ງານ​ວ່າ ຜູ້​ນຳ​ໂລກ​ປະ​ມານ 40 ປະ​ເທດ ລວມ​ມີ​ທ່ານ ເດ​ວິດ ຄາ​ເມ​ຣອນ ນາ​ຍົກ​ລັດ​ຖະ​ມົນ​ຕີ​ອັງ​ກິດ, ທ່ານ ນາງ ອັງ​ເກ​ລາ ແມ​ເຄິນ ນາ​ຍົກ​ລັດ​ຖະ​ມົນ​ຕີ​ເຢຍ​ລະ​ມັນ, ທ່ານ ເບັນ​ຈາ​ມິນ ເນ​ທັນ​ຢາ​ຮູ ນາ​ຍົກ​ລັດ​ຖະ​ມົນ​ຕີ​ອິດ​ສະ​ລາ​ແອນ ແລະ ປະ​ທາ​ນາ​ທິ​ບໍ​ດີ ມາ​ມູດ ອັບ​ບາ​ສ ຂອງ​ປາ​ເລດ​ຕິນ ໄດ້​ເດີນ​ທາງ​ມາ​ຮ່ວມ​ເດີນ​ຂະ​ບວນ​ປະ​ທ້ວງ ເພື່ອ​ສະ​ແດງ​ພະ​ລັງ​ຕໍ່​ຕ້ານ​ການ​ກໍ່​ການ​ຮ້າຍ ຢູ່​ນະ​ຄອນ​ຫລວງ​ປາ​ຣີ ປະ​ເທດ​ຝ​ຣັ່ງ ໃນ​ເວ​ລາ 15:00 ໂມງ ຂອງວັນ​ອາ​ທິດ​ທີ 11 ມັງ​ກອນ​ຜ່ານ​ມາ ຕາມ​ເວ​ລາ​ທ້ອງ​ຖິ່ນ ຫລັງ​ຈາກ​ທີ່​ມີ​ປະ​ຊາ​ຊົນ​ຊາວ​ຝ​ຣັ່ງນັບ 70,000 ຄົນ ອອກ​ມາເດີນ​ຂະ​ບວນ​ປະ​ທ້ວງ​ໃນ​ມື້​ວັນ​ເສົາ​ທີ 10 ມັງ​ກອນ​ຜ່ານ​ມາ.

ທັງ​ນີ້​ແຫລ່ງ​ຂ່າວ​ຕ່າງ​ປະ​ເທດ ໄດ້​ຄາດ​ການ​ວ່າ ອາດ​ມີ​ປະ​ຊາ​ຊົນ​ອອກ​ມາ​ເດີນ​ຂະ​ບວນ​ເພີ່ມ​ຂຶ້ນ​ກ່​ວາ 1 ລ້ານ​ຄົນ ຫລັງ​ຈາກ​ທີ່​ເກີດ​ເຫດ​ການກວາດ​ຍິງ​ສຳ​ນັກ​ງານ​ວາ​ລະ​ສານ ຊາ​ຣີ ເອບ​ໂດ ແລະ ຮ້ານ​ສັບ​ພະ​ສິນ​ຄ້າ ໂກ​ເຊ່ ໃນ​ນະ​ຄອນ​ຫລວງ​ປາ​ຣີ ເຊິ່ງ​ເຮັດ​ໃຫ້​ມີ​ຜູ້​ເສຍ​ຊີ​ວິດ​ລວມ​ກັນ 17 ສົບ.