ສູນ​ການ​ຄ້າ ແລະ ອຸດ​ສາ​ຫະ​ກຳ​ຫວຽດ​ນາມ ສັງ​ກັດ​ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າຂອງ​ຫວຽດ​ນາມ ເປີດ​ເຜີຍ​ວ່າ ປະ​ເທດ​ໄດ້​ສົ່ງ​ອອກ​ເຂົ້າ​ໄປ​ແລ້ວ​ທັງ​ໝົດ 7.5 ລ້ານ​ໂຕນ ໃນ​ປີ 2014 ທັງ​ແບບ​ສົ່ງ​ອອກ​ເປັນ​ທາງ​ການ ແລະ ການ​ຄ້າ​ຜ່ານ​ຊາຍ​ແດນ.

ສຳ​ນັກ​ຂ່າວ​ຕ່າງ​ປະ​ເທດ​ ລາຍ​ງານ​ໃນ​ວັນ​ທີ 7 ມັງ​ກອນ​ນີ້​ວ່າ ຫວຽດ​ນາມ​ໄດ້​ຂາຍ​ເຂົ້າ​ຜ່ານ​ການ​ສົ່ງ​ອອກ​ຢ່າງ​ເປັນ​ທາງ​ການ ທັງ​ໝົດ 6.5 ລ້ານ​ໂຕນ ສ້າງ​ລາຍ​ຮັບ​ໄດ້ 2.84 ຕື້​ໂດ​ລາ​ສະ​ຫະ​ລັດ ພາຍ​ໃນ​ປີ 2014 ຜ່ານ​ມາ ເຊິ່ງ​ລາ​ຄາ​ສົ່ງ​ອອກ ສະ​ເລ່ຍ​ 436.92 ໂດ​ລາ​ຕໍ່​ໂຕນ.

ສ​ປ ຈີນ ຍັງ​ຄົງ​ເປັນ​ຜູ້​ນຳ​ເຂົ້າ​ເຂົ້າ​ສານ​ຈາກ​ຫວຽດ​ນາມ​ລາຍ​ໃຫຍ່​ທີ່​ສຸດ​ ຕໍ່​ເນື່ອງ​ກັນ​ເປັນ​ເວ​ລາ 3 ປີ​ຕິດ​ຕໍ່​ກັນ ໂດຍ​ນຳ​ເຂົ້າ​ເຂົ້າ​ສານ​ຈາກ​ຫວຽດ​ນາມ​ໄປ​ທັງ​ໝົດ 2.1 ລ້ານ​ໂຕນ ຜ່ານ​ການ​ສົ່ງ​ອອກ​ເຂົ້າ​ຢ່າງ​ເປັນ​ທາງ​ການ, ສ່ວນ​ຟິ​ລິບ​ປິນ ເປັນ​ຜູ້​ບໍ​ລິ​ໂພກ​ລາຍ​ໃຫຍ່​ອັນ​ດັບ​ທີ 2 ທີ່​ສັ່ງ​ຊື້​ເຂົ້າ​ຈາກ​ຫວຽດ​ນາມ​ໄປ​ທັງ​ໝົດ 1.4 ລ້ານ​ໂຕນ.

ນອກ​ຈາກ​ການ​ສົ່ງ​ອອກ​ຢ່າງ​ເປັນ​ທາງ​ການ​ແລ້ວ, ຫວຽດ​ນາມ​ຍັງ​ຂາຍ​ເຂົ້າ​ອີກ​ປະ​ມານ 1 ລ້ານ​ໂຕນ ໃຫ້​ແກ່​ຈີນ​ຜ່ານ​ການ​ຄ້າ​ບໍ​ລິ​ເວນ​ຊາຍ​ແດນ ໃນ​ປີ 2014 ຜ່ານມາ ເຊິ່ງ​ເຮັດ​ໃຫ້​ຈຳ​ນວນ​ການ​ສົ່ງ​ອອກ​ເຂົ້າ​ລວມ​ກັນ​ທັງ​ໝົດ​ຂອງ​ຫວຽດ​ນາມ​ໃນປີ 2014 ແມ່ນ​ຢູ່​ທີ່ 7.5 ລ້ານ​ໂຕນ ຕາມ​ການ​ລາຍ​ງານ​ຂອງ​ສູນ​ການ​ຄ້າ ແລະ ອຸດ​ສາ​ຫະ​ກຳ​ຫວຽດ​ນາມ.

ທາງ​ດ້ານ​ສະ​ມາ​ຄົມ​ອາ​ຫານ​ຫວຽດ​ນາມ ຍັງ​ໄດ້​ເປີດ​ເຜີຍ​ຕົວ​ເລກ​ອີກວ່າ ສະ​ເພາະ​ໃນ​ປີ 2015 ນີ້ ລັດ​ຖະ​ບານ​ຫວຽດ​ນາມ ໄດ້​ຕັ້ງ​ເປົ້າ​ສົ່ງ​ອອກ​ເຂົ້າ​ທັງ​ໝົດ​ໃຫ້​ໄດ້ 7 – 7.5 ລ້ານ​ໂຕນ.