ປະຈຸບັນ ການກໍ່ສ້າງຂົວມິດຕະພາບລາວ-ມຽນມາຂອງເບື້ອງລາວ ແລະ ເບື້ອງມຽນມາ ແມ່ນໄດ້ເຊື່ອມຕໍ່ຈອດກັນ
ແລ້ວ ພາຍຫຼັງທີ່ໄດ້ລົງມືກໍ່ສ້າງມາເປັນເວລາ 20 ກວ່າເດືອນ ແລະ ຄາດວ່າຈະສຳເລັດພ້ອມເປີດນຳໃຊ້ໃນເດືອນມີ
ນາປີໜ້ານີ້.
ທ່ານ ໄຊສົງຄາມ ມະໂນທັມ ຫົວໜ້າໂຄງການກໍ່ສ້າງຂົວມິດຕະພາບລາວ-ມຽນມາໄດ້ລາຍງານຕໍ່ນັກ ຂ່າວເສດຖະ
ກິດ-ສັງຄົມເມື່ອບໍ່ດົນມານີ້ໃຫ້ຮູ້ວ່າ: ຫຼັງຈາກເລີ່ມລົງມືກໍ່ສ້າງແຕ່ວັນທີ 16 ກຸມພາ 2013 ເປັນຕົ້ນມາຈົນຮອດທ້າຍ
ເດືອນທັນວາ 2014 ໂຄງການກໍ່ສ້າງຂົວມິດຕະພາບລາວ-ມຽນມາກໍ່ໄດ້ເຊື່ອມຕໍ່ເຂົ້າຫາກັນ ແລ້ວຄາດວ່າຈະໃຫ້ສຳ
ເລັດກ່ອນຄາດໝາຍ ແລະ ສາມາດເປີດນຳໃຊ້ຕາມແຜນການໃນເດືອນມີນາ 2015 ນີ້, ໂດຍຂະນະນີ້ ສະເລ່ຍລວມ
ທຸກໜ້າວຽກໄດ້ແລ້ວ 93%.
ຊຶ່ງໂຄງການແມ່ນເປັນສັນຍະລັກແຫ່ງສາຍພົວພັນການຮ່ວມມື ແລະ ຄວາມສາມັກຄີລະຫວ່າງປະຊາຊົນຂອງສອງ
ປະເທດລາວ ແລະ ມຽມມາ ໂດຍຈະເຊື່ອມຕໍ່ທາງຫຼວງເລກທີ 17 ຂອງລາວເຂົ້າກັບທາງຫຼວງເລກທີ 4 ຂອງມຽນມາ
ແນໃສ່ສ້າງເງື່ອນໄຂອຳນວຍຄວາມສະດວກໃນການໄປມາຫາສູ່ ແລະ ຄ້າຂາຍນຳກັນ, ຊຶ່ງຈະເອົາຜົນປະໂຫຍດອັນ
ໃຫຍ່ຫຼວງມາໃຫ້ປະຊາຊົນສອງຊາດ, ລວມທັງບັນດາປະເທດໃນອະນຸພາກພື້ນ ໂດຍສະເພາະລະຫວ່າງລາວ, ມຽນ
ມາ, ຫວຽດນາມ ແລະ ສປ ຈີນ, ນອກນີ້ ອາດຈະຂະຫຍາຍໄປສູ່ອິນເດຍ ແລະ ບັງກລາເດັດອີກດ້ວຍ.
ໂດຍຕົວຂົວ ທ່ານ ໄຊສົງຄາມ ມະໂນທັມ ກ່າວວ່າ: ມີທີ່ຕັ້ງຢູ່ບ້ານຫ້ວຍກຸ່ມປະມານ 15 ກິໂລແມັດ ຫ່າງຈາກບ້ານຊຽງ
ກົກໄປທາງທິດເໝືອຂຶ້ນກັບເມືອງລອງ ແຂວງຫຼວງນ້ຳທາ ແລະ ປະມານ 500 ແມັດ, ທາງໃຕ້ຂອງບ້ານຊຽງລາບ
ເມືອງທ່າຂີ້ເຫຼັກ ລັດສານ ສສ ມຽນມາ, ຕົວຂົວມີຄວາມຍາວທັງໝົດ 691,6 ແມັດ, ກວ້າງ 10,9 ແມັດ, ມີທາງລົດ
ແລ່ນ 2 ຄອງ, ກວ້າງ 8,5 ແມັດ, ທາງ ຍ່າງ 2 ເບື້ອງໆລະ 1,2 ແມັດ, ເປັນຂົວ ທີ່ມີຂາງປະສົມ ຊຶ່ງມີຂາງເຫຼັກຍາວ
360 ແມັດ, ສູງ 12 ແມັດ ຢູ່ທາງກາງ (ຢູ່ວັງ) ແລະ ຂາງເບຕົງອັດແຮງຍາວ 330 ແມັດ ຢູ່ທາງຝັ່ງໃນເບື້ອງລາວຮັບ
ຜິດຊອບແມ່ນ 330,8 ແມັດ ແລະ ຝ່າຍ ມຽນມາຮັບຜິດຊອບ 360,8 ແມັດ ໂດຍລວມມູນຄ່າການກໍ່ສ້າງທັງໝົດ
26 ລ້ານໂດລາສະຫະລັດ ທີ່ເປັນການນຳໃຊ້ງົບປະມານຂອງລັດຖະບານສອງປະເທດ.
ແຫລ່ງຂ່າວ: ເສດຖະກິດ – ສັງຄົມ