ຕາມ​ຂ່າວ​ຕ່າງປະ​ເທດ​, ໃນວັນທີ 24 ເດືອນ12, ​ເຈົ້າໜ້າ​ທີ່​ອິນ​ໂດ​ເນ​ເຊຍ​ເປີດ​ເຜີຍ​ວ່າ:​ ແຂວງ ອາເຈາະ ແລະ ແຂວງຊວາ ທາງພາກຕາເວັນຕົກຂອງອິນໂດເນເຊຍ ເກີດນ້ຳຖ້ວມເຮັດ​ໃຫ້​ເຈົ້າໜ້າທ່ີກ່ຽວຂ້ອງ ອິນໂດເນເຊຍ ຕ້ອງ​ເລັ່ງອົບ​ພະຍົບປະຊາຊົນ​ ທ່ີອາໄສຢູ່ໃນພື້ນທ່ີດັ່ງກ່າວ ໃຫ້ໄປ​ຍັງສະຖານ​ທີ່​ປອດໄພ​ປະມານ 34.642ຄົນ.

ທ່ານ ສຸ​ໂຕໂປປຣູ​ໂວນູໂກ​ໂຮ, ​ໂຄສົກປະຈຳ​ສຳນັກງານ​ໄພພິບັດ​ທາງ​ທຳ​ມະ​ຊາດອິນໂດເນເຊຍກ່າວ​ວ່າ: ​ໃນ​ເຂດ​ຕາ​ເມຍ​ຂອງ​ແຂວງ​ອາ​ເຈາະ ທາງ​ເໜືອ​ສຸດ​ຂອງ​ເກາະ​ສຸ​ມາຕຣາ ມີ​ເຮືອນ​ຂອງ​ປະຊາຊົນ​ຈົມ​ຢູ່​ໃຕ້​ນ້ຳປະມານ 2.370 ຫລັງ ​ເຮັດ​ໃຫ້​ປະຊາຊົນ ຈຳນວນ 28.000​ ຄົນ​ ຕ້ອງ​ອົບ​ພະຍົບ​ໄປ​ຍັງສະຖານ​ທີ່​ພັກຊົ່ວ ຄາວ​ໃນ​ພື້ນທີ່​ສູງ, ສ່ວນ​ແຂວງ​ຊວາ ທາງຕາ​ເວັນ​ຕົກຂອງ​ເກາະ​ຊວາ ແມ່ນມີນ້ຳໄຫລ​ລົ້ນຈາກ​ແມ່ນ້ຳຊິ​ຕາຣຸມ. ປັດຈຸບັນ ມີ​ທ່າ​ອ່ຽງລະດັບນ້ຳຫລຸດ​ລົງ​ແລ້ວ, ​ແຕ່​ເຮືອນ​ຂອງ​ປະຊາຊົນ ຈຳນວນ 5.000 ກວ່າ​ຫລັງ ຍັງ​ຈົມ​ຢູ່​ໃຕ້​ນ້ຳ ແລະ ປະຊາຊົນ​ປະມານ 6.642 ຄົນ ຍັງ​ຕ້ອງ​ອາ​ໄສ​ຢູ່ໃນ​ສະຖານ​ທີ່​ພັກ​ຊົ່ວຄາວ. ເຈົ້າໜ້າ​ທີ່​ກ່ຽວຂ້ອງອິນໂດເນເຊຍ, ຕຳຫລວດ ​ແລະ ທະຫານ​ໄດ້​ເຂົ້າໄປ ຊ່ວຍແຈກ​ຍາຍ​ອາຫານ, ຢາ​ປິ່ນປົວ​ພະຍາດ ແລະ ໃຫ້ການຊ່ວຍເຫລືອ ຕ່າງໆ.

ຂອບໃຈບົດຄວາມຈາກ: ຂປລ