ລັດຖະບານໄດ້ເຫັນດີຮັບຮອງເອົາແລ້ວຕົວເລກຄ່າແຮງງານຂັ້ນຕ່ຳ ສຸດຈາກ 626.000 ກີບ ທີ່ຈັດຕັ້ງປະຕິບັດໃນ
ຂະນະນີ້ຂຶ້ນມາເປັນ 9 ແສນກີບຕໍ່ຄົນຕໍ່ເດືອນຕາມການສະເໜີຂອງກະຊວງແຮງງານ ແລະ ສະຫວັດດີການສັງຄົມ
ທັງນີ້ ກໍເພື່ອຍົກສູງປັບປຸງຊີວິດການເປັນຢູ່ຂອງແຮງງານລາວ ຫຼີກເວັ້ນການເຄື່ອນຍ້າຍອອກໄປເຮັດວຽກຢູ່ຕ່າງ
ປະເທດ ທັງເປັນການສົ່ງເສີມພັດທະນາແຮງງານໃຫ້ມີຄຸນນະພາບທາງດ້ານສີມື ແລະ ທັດສະນະຄະຕິຕໍ່ວຽກ.
ໃນລະຫວ່າງຕົ້ນເດືອນທັນວາມານີ້ ຂ່າວເສດຖະກິດ-ສັງຄົມ ໄດ້ນຳສະເໜີແຜນຂອງກະຊວງແຮງງານ ແລະ ສະ
ຫວັດດີການສັງຄົມທີ່ໄດ້ເປີດເຜີຍຕໍ່ກອງປະຊຸມສະພາລະບຸວ່າ: ຜ່ານມາກະຊວງໄດ້ມີການສົມທົບຫຼາຍຄັ້ງກັບອົງ
ການໄຕພາຄີ ເພື່ອປັບປຸງດຳລັດວ່າດ້ວຍການປັບຂຶ້ນຄ່າແຮງງານຂັ້ນຕ່ຳສຸດໃຫ້ ແກ່ຜູ້ອອກແຮງງານທີ່ເຮັດ
ວຽກໃນຂົງເຂດການຜະລິດ, ທຸລະກິດ ແລະ ການບໍລິການ ແລະ ຫຼ້າສຸດແມ່ນໄດ້ສະເໜີຕໍ່ລັດຖະບານພິຈາລະນາ
ຍົກລະດັບຈາກ 626.000 ກີບ ມາເປັນ 900.000 ກີບ ຫຼື ເທົ່າກັບ 112 ໂດລາສະຫະລັດຕໍ່ຄົນຕໍ່ເດືອນ.
ແນວໃດກໍດີຕໍ່ການສະເໜີດັ່ງກ່າວໃນກອງປະຊຸມລັດຖະບານສະໄໝ ສາມັນປະຈຳເດືອນທັນວາທີ່ຈັດຂຶ້ນໃນວັນ
ທີ 22 ທັນວາຜ່ານມາ ກໍໄດ້ເຫັນດີຮັບຮອງເອົາຕົວເລກຄ່າແຮງງານຂັ້ນຕ່ຳສຸດຕາມທີ່ ກະຊວງແຮງງານ ແລະ ສະ
ຫວັດດີການສັງຄົມສະເໜີ ທັງນີ້ ກໍເພື່ອເປັນການຍົກສູງປັບປຸງຊີວິດການເປັນຢູ່ຂອງແຮງງານລາວ, ຫຼີກເວັ້ນ
ຈຳນວນແຮງງານລາວທີ່ເຄື່ອນຍ້າຍອອກໄປຫາວຽກເຮັດງານທຳຢູ່ຕ່າງປະເທດ ແລະ ທັງເປັນການສົ່ງເສີມພັດ
ທະນາຕົນເອງໃຫ້ມີຄຸນນະພາບທາງດ້ານ ສີມື ແລະ ທັດສະນະຄະຕິທີ່ດີຕໍ່ວຽກ.
ໂດຍໃນຕໍ່ໜ້າຫາກມີບັນຫາໃດຈິ່ງຈະພິຈາລະນາເປັນໄປແຕ່ລະໄລຍະ ເພື່ອຮັບປະກັນໄດ້ຊີວິດການເປັນຢູ່ຂັ້ນພື້ນ
ຖານຂອງຜູ້ອອກແຮງ ງານ ແລະ ບໍ່ໃຫ້ກະທົບເຖິງການດຶງດູດການລົງທຶນໃນປະຈຸບັນ ແລະ ອະນາຄົດ ຮອດປະ
ຈຸບັນແມ່ນຍັງບໍ່ໃຫ້ມີຂໍ້ມູນເປີດເຜີຍເຖິງວັນເວລາໃນ ການຈັດຕັ້ງປະຕິບັດຕົວເລກຄ່າແຮງງານຂັ້ນຕ່ຳໃໝ່ນີ້
ແຕ່ກໍຄາດຄະເນວ່າຈະປະກາດນຳໃຊ້ໃນມໍ່ໆນີ້.
ສຳລັບຄ່າແຮງງານຂັ້ນຕ່ຳສຸດທີ່ຈັດຕັ້ງປະຕິບັດໃນຂະນະນີ້ ແມ່ນຖືກປັບຂຶ້ນນັບແຕ່ຕົ້ນປີ 2012 ເປັນຕົ້ນມາ
ຈາກ 348.000 ກີບ ເມື່ອກ່ອນມາເປັນ 626.000 ກີບຕໍ່ຄົນຕໍ່ເດືອນ ໃນປະຈຸບັນ ຫຼື ຖ້າຄິດໄລ່ເປັນວັນແມ່ນບໍ່
ໃຫ້ຕ່ຳກວ່າ 24.076 ກີບຕໍ່ຄົນຕໍ່ເດືອນ ແລະ ຖ້າຄິດໄລ່ເປັນຊົ່ວໂມງແມ່ນບໍ່ໃຫ້ຫຼຸດ 3.009 ກີບຕໍ່ຄົນຕໍ່ຊົ່ວໂມງ.
ແຫລ່ງຂ່າວ: ເສດຖະກິດ – ສັງຄົມ