ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍບັນດາຫົວໜ້າພະແນກການອ້ອມຂ້າງ
ໄດ້ລົງໄປຢ້ຽມຢາມພື້ນຖານການຜະລິດ ສະຖານບູຮານ ແລະ ບັນດາໂຄງການພັດທະນາຢູ່ເມືອງປາກງື່ມ ນະຄອນ
ຫຼວງວຽງຈັນ ວັນທີ 23 ທັນວາ 2014 ໂດຍຖືກຕ້ອນຮັບຈາກທ່ານ ວົງເດືອນ ບຸນຍະແສງ ເຈົ້າເມືອງປາກງື່ມ ພ້ອມ
ດ້ວຍເຈົ້າຂອງກິດຈະການ ແລະ ພະນັກງານກ່ຽວຂ້ອງ.
ໂອກາດນີ້ ທ່ານເຈົ້າຄອງນະຄອນຫຼວງ ພ້ອມດ້ວຍຄະນະ ໄດ້ໄປຢ້ຽມຢາມຟາມລ້ຽງງົວພັນຊີ້ນ ຫຼັກ 44 ຂອງໂຄງການ
ພັດທະນາຈະເລີນການກະເສດ ໂດຍໄດ້ຮັບການລາຍງານຈາກຄະນະອຳນວຍການວ່າ: ຟາມລ້ຽງງົວພັນຊີ້ນ ຫຼັກ 44
ເປັນໂຄງການສ້າງຕັ້ງຂຶ້ນປີ 2012 ມີທຶນຈົດທະບຽນ 10 ຕື້ກີບ ມີເນື້ອທີ່ 17 ເຮັກຕາ ປັດຈຸບັນມີງົວ 672 ໂຕ ຈຸດປະ
ສົງຫຼັກແມ່ນລ້ຽງງົວ ເພື່ອສະໜອງຕະຫຼາດສ້າງເປັນຟາມຕົວແບບໃຫ້ນັກສຶກສາ ນັກຄົ້ນຄວ້າ ນັກທຸລະກິດ ແລະ
ຊາວນາຢູ່ພາຍໃນປະເທດ ເຂົ້າມາສຶກສາຮ່ຳຮຽນ ສົ່ງເສີມການລ້ຽງງົວ ໂດຍການມີສ່ວນຮ່ວມກັບປະຊາຊົນ ນອກນີ້
ຍັງມີການປູກຫຍ້າເປັນອາຫານໃຫ້ງົວ ເຮັດອາຫານຂຸ້ນເພື່ອເປັນອາຫານເສີມ ມີການອັດເຟືອງແຫ້ງໄວ້ໃຫ້ງົວກິນ
ໃນລະດູແລ້ງ.
ພາຍຫຼັງຮັບຟັງສະພາບການລ້ຽງງົວຂອງຟາມ ທີ່ມີທັງຂໍ້ສະດວກ ແລະ ຂໍ້ຫຍຸ້ງຍາກແລ້ວ ທ່ານເຈົ້າຄອງນະຄອນຫຼວງ
ໄດ້ສະແດງຄວາມຊົມເຊີຍຕໍ່ເຈົ້າຂອງກິດຈະການ ທີ່ສາມາດສ້າງເປັນຕົວແບບການລ້ຽງງົວ ຕາມມາດຕະຖານສາກົນ
ແຫ່ງທຳອິດຢູ່ລາວ ພ້ອມນີ້ ທ່ານຍັງໄດ້ຮຽກຮ້ອງໃຫ້ຜູ້ປະກອບການຂຽນເປັນບົດສະຫຼຸບ ຫຼື ຄູ່ມືການລ້ຽງງົວແບບທັນ
ສະໄໝ ເພື່ອໃຫ້ພາກສ່ວນອື່ນໆ ນຳໄປເປັນບົດຮຽນການກຳນົດຫຼັກການໃນການລ້ຽງຢ່າງຊັດເຈນ ເພື່ອຮອງຮັບຕະ
ຫຼາດສາກົນ ຂະຫຍາຍກິດຈະການໃຫ້ກວ້າງຂວາງ ແລະ ເພີ່ມຈຳນວນງົວໃຫ້ຫຼາຍ ເພື່ອຮອງຮັບການສະໜອງຊີ້ນໃຫ້
ຕະຫຼາດພາຍໃນ ແລະ ຕ່າງປະເທດ ໂດຍສະເພາະຕະຫຼາດຫວຽດນາມ ຕາມແຜນການຂອງນະຄອນຫຼວງວຽງຈັນ
ຕ້ອງມີການເຝິກອົບຮົມໃຫ້ຜູ້ທີ່ມາຖອດຖອນບົດຮຽນ ສົ່ງເສີມໃຫ້ຟາມລ້ຽງງົວຕ່າງໆພາຍໃນເມືອງໃຫ້ເປັນຕົວແບບ
ສົ່ງເສີມການປູກຫຍ້າ ແລະ ອື່ນໆ.
ຈາກນັ້ນ ຄະນະຜູ້ແທນກໍ່ໄດ້ໄປຢ້ຽມຊົມ ແລະ ກາບໄຫວ້ວັດຖິ່ນສ້ອຍ ຢ້ຽມຊົມຈຸດນ້ຳງື່ມປ່ອງໃສ່ນ້ຳຂອງ (ບ້ານປາກ
ງື່ມ) ເພື່ອສຶກສາເບິ່ງຄວາມເປັນໄປໄດ້ ໃນການສ້າງເມືອງໃໝ່ ແລະ ສະຖານທີ່ທ່ອງທ່ຽວ ນອກນີ້ ຍັງໄດ້ໄປຢ້ຽມຢາມ
ສະຖານທີ່ຈະສ້າງເປັນຟາມລ້ຽງງົວ ຂອງນະຄອນຫຼວງວຽງຈັນ (ບ້ານສົມປະເສີດ) ແລະ ຢ້ຽມຊົມຈຸດທີ່ຈະສ້າງໂຄງ
ການເຂື່ອນຝາຍນ້ຳລົ້ນບ້ານເວີນກະເບົາ (ເຂື່ອນບ້ານພ້າວ).
ແຫລ່ງຂ່າວ: ວຽງຈັນໃໝ່