ໃນຕອນບ່າຍຂອງວັນທີ 19 ສິງຫາ 2026 ທີ່ກະຊວງການຕ່າງປະເທດ, ທ່ານ ໄມທອງ ທໍາມະວົງສາ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ໍານັບ ຂອງ ທ່ານ ປອ. ບັດເດີ ອາລມາຕູຊິ (Dr. Bader Almatrooshi) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສະຫະນະຄອນ ເອເມຣັດ ອາຣັບ (UAE) ທີ່ມີສໍານັກງານຕັ້ງຢູ່ຮ່າໂນ້ຍ.
ໃນໂອກາດນີ້, ທ່ານ ຮອງລັດຖະມົນຕີ ໄມທອງ ທໍາມະວົງສາ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຊົມເຊີຍຕໍ່ຄວາມເອົາໃຈໃສ່ຕັ້ງໜ້າປະຕິບັດວຽກງານຂອງທ່ານທູດ ໃນການປະກອບສ່ວນຢ່າງຫ້າວຫັນ ຕະ ຫຼອດໄລຍະ 3 ປີກວ່າ ທີ່ຜ່ານມາ ເພື່ອເສີມຂະຫຍາຍການພົວພັນຮ່ວມມືສອງຝ່າຍ ໃຫ້ໄດ້ຮັບການພັດທະນາຂຶ້ນເປັນກ້າວໆ ເຊິ່ງສະແດງອອກໃນການແລກປ່ຽນການຢ້ຽມຢາມຂອງການນໍາຂັ້ນສູງຂອງສອງປະເທດ ກໍຄືການສົ່ງເສີມ ການຮ່ວມມືທາງດ້ານເສດຖະກິດ-ການຄ້າ ແລະ ການລົງທຶນຮ່ວມກັນໃນອະນາຄົດ, ພ້ອມທັງຊຸກຍູ້ການຈັດຕັ້ງປະຕິບັດ ບົດບັນທຶກຄວາມເຂົ້າໃຈ ແລະ ຂໍ້ຕົກລົງຕ່າງໆ ທີ່ລົງນາມຮ່ວມກັນໃນເດືອນກຸມພາ 2026 ທີ່ຜ່ານມາ ໃຫ້ປະກົດຜົນເປັນຈິງ ແລະ ມີປະສິດທິພາບ ເພື່ອຜົນປະໂຫຍດສູງສຸດຂອງສອງປະເທດ. ສອງຝ່າຍໄດ້ຕີລາຄາສູງຕໍ່ ການສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ສະຫະນະຄອນ ເອເມຣັດ ອາຣັບ (15 ຕຸລາ 1996 – 15 ຕຸລາ 2026) ຄົບຮອບ 30 ປີ ແລະ ສະເໜີໃຫ້ເຈົ້າໜ້າທີ່ ທີ່ກ່ຽວຂ້ອງຂອງສອງປະເທດຮ່ວມມືກັນຢ່າງໃກ້ຊິດໃນການຈັດກິດຈະກຳຕ່າງໆເພື່ອສະເຫຼີມສະຫຼອງວັນສໍາຄັນດັ່ງກ່າວ ຢ່າງມີຂະບວນຟົດຟື້ນ ແລະ ຊຸກຍູ້ໃຫ້ມີການແລກປ່ຽນການຢ້ຽມຢາມການນໍາຂັ້ນສູງຂອງທັງສອງປະເທດໃຫ້ຫຼາຍຂຶ້ນ.
ໃນການພົບປະ, ທ່ານຮອງລັດຖະມົນຕີ ໄມທອງ ທໍາມະວົງສາ ໄດ້ຕາງໜ້າໃຫ້ແກ່ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານ ສະຫະນະຄອນ ເອເມຣັດ ອາຣັບ ສຳລັບການຊ່ວຍເຫຼືອ ແລະ ສະໜັບສະໜູນ ສປປ ລາວ ຕະຫຼອດມາ ໂດຍສະເພາະການປະກອບສ່ວນອັນສໍາຄັນເຂົ້າໃນການພັດທະນາພື້ນຖານໂຄງລ່າງ ແລະ ການປັບປຸງເຄືອຂ່າຍເສັ້ນທາງແຫ່ງຊາດ ໃນ ສປປ ລາວ. ພ້ອມດຽວກັນ ກໍໄດ້ສະ ເໜີໃຫ້ ທ່ານທູດ ລະດົມນັກລົງທຶນຈາກ UAE ໃຫ້ມາລົງທຶນໃນລາວ ໃຫ້ນັບມື້ຫຼາຍຂຶ້ນໃນບັນດາຂະແໜງການຕ່າງໆເປັນຕົ້ນ ພື້ນຖານໂຄງລ່າງ, ທາງລົດໄຟ, ຖະໜົນຫົນທາງ, ພະລັງງານ ແລະ ຂົງເຂດບູລິມະສິດອື່ນໆ ໂດຍສະເພາະ ແມ່ນການລົງທຶນໃນຂົງເຂດໂລຈິດສະຕິກ ເຂດເສດຖະກິດພິເສດທີ່ແຂວງສະຫວັນນະເຂດ.
ໃນຂະນະດຽວກັນ, ທ່ານເອກອັກຄະລັດຖະທູດ ບັດເດີ ອາລມາຕູຊິ ກໍໄດ້ສະແດງຄວາມຂອບໃຈຢ່າງຈິງໃຈມາຍັງລັດຖະບານ ແລະ ປະຊາຊົນລາວ ລວມທັງຂະແໜງການກ່ຽວຂ້ອງ ໂດຍສະເພາະ ກະຊວງການຕ່າງປະເທດ ທີ່ໄດ້ໃຫ້ການຊ່ວຍເຫຼືອ ແລະ ອໍານວຍຄວາມສະດວກ ເຮັດໃຫ້ການປະຕິບັດໜ້າທີ່ການທູດ ຢູ່ ສປປ ລາວ ໄດ້ຮັບຄວາມໂລ່ງລ່ຽນເປັນຢ່າງດີ, ພ້ອມທັງສະແດງຄວາມໝາຍໝັ້ນ ທີ່ຈະສືບຕໍ່ປະກອບສ່ວນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ສະຫະນະຄອນ ເອເມຣັດ ອາຣັບ ໃຫ້ໄດ້ຮັບການພັດທະນາຍິ່ງໆຂຶ້ນ.
ອ້າງອີງຈາກ: ກະຊວງການຕ່າງປະເທດ ແຫ່ງ ສປປ ລາວ