ເມືອງຫາດຊາຍຟອງ ໄດ້ປະກາດສ້າງຕັ້ງ “ຕາແສງຊາຍຟອງ” ເປັນຕາແສງທຳອິດຢ່າງເປັນທາງການ ໃນວັນພະຫັດ ທີ 16 ກໍລະກົດ 2026 ນີ້ ຖືເປັນນິມິດໝາຍອັນດີ ແລະ ເປັນບາດກ້າວຄັ້ງສຳຄັນ.
ຕາແສງຊາຍຟອງ ເປັນເຂດທົ່ງພຽງທີ່ມີເນື້ອທີ່ກວ້າງຂວາງເລາະລຽບຕາມແຄມນໍ້າຂອງ, ມີປະຫວັດຄວາມເປັນມາຍາວນານ ແລະ ເປັນເຂດຍຸດທະສາດທີ່ມີມູນເຊື້ອທາງດ້ານປະຫວັດສາດ-ວັດທະນະທຳອັນໂດດເດັ່ນ ຕິດພັນກັບການຜະລິດກະສິກຳ.
ກົນໄກການຈັດຕັ້ງ ແລະ ບຸກຄະລາກອນ:
ຫ້ອງການຕາແສງແມ່ນຕັ້ງຢູ່ ບ້ານປ່າຝາງ (ຫ້ອງການກຸ່ມ II ບ້ານຫ້ອມ) ໂດຍມີໂຄງປະກອບບຸກຄະລາກອນທັງໝົດ 13 ທ່ານ (ຍິງ 6 ທ່ານ) ດັ່ງນີ້:
- ພະນັກງານລັດຖະກອນ: 6 ທ່ານ (ຍິງ 2 ທ່ານ)
- ກຳລັງປ້ອງກັນຊາດ-ປ້ອງກັນຄວາມສະຫງົບ: ຕຳຫຼວດ 1 ທ່ານ ແລະ ທະຫານ 1 ທ່ານ
- ພະນັກງານຊ່ວຍວຽກ: 5 ທ່ານ (ຍິງ 4 ທ່ານ) (ໃນຄະນະນຳປະກອບມີ: ປະທານ 1 ທ່ານ, ຮອງປະທານ 2 ທ່ານ ແລະ ກຳມະການທີ່ເປັນຫົວໜ້າໜ່ວຍງານ 5 ທ່ານ, ຍິງ 2 ທ່ານ)
ຂໍ້ມູນພົນລະເມືອງ ແລະ ການປົກຄອງ:
- ເນື້ອທີ່ທັງໝົດ: 2.877,37 ເຮັກຕາ(ມີອັດຕາຄວາມໜາແໜ້ນຂອງພົນລະເມືອງ 7.012 ຄົນ/ກິໂລຕາແມັດ).
- ການປົກຄອງ: ປະກອບມີ 16 ບ້ານ (ແບ່ງເປັນ ກຸ່ມ II ບ້ານຫ້ອມ ແລະ ກຸ່ມ III ສີຖານໃຕ້) ຄື: ບ້ານຫາດກັນຊາ, ຫົວຫ້າ, ດອນເກີດ, ໂພເງິນ, ໂພສີ, ສະຫວ່າງ, ປ່າຝາງ, ຈອມທອງ, ຈຽມປາງ, ຫ້ອມໃຕ້, ຖິ່ນເພຍ, ທ່າແຂກ, ຊາຍຟອງເໜືອ, ຊາຍຟອງໃຕ້, ໂຄກຊາຍ ແລະ ສີຖານໃຕ້.
- ພົນລະເມືອງ: ທັງໝົດ 19.634 ຄົນ (ຍິງ 9.961 ຄົນ), ມີ 364 ໜ່ວຍ, 4.356 ຄອບຄົວ, ແລະ 4.550 ຫຼັງຄາເຮືອນ.
- ໂຄງປະກອບຊົນເຜົ່າ: ເຜົ່າລາວ ກວມເອົາສ່ວນໃຫຍ່ 99,95% (19.626 ຄົນ), ເຜົ່າກຶມມຸ 0,03% (6 ຄົນ), ເຜົ່າພູໄທ 0,005% (1 ຄົນ) ແລະ ເຜົ່າມົ້ງ 0,005% (1 ຄົນ).
ທ່າແຮງດ້ານເສດຖະກິດ, ການບໍລິການ ແລະ ວັດທະນະທຳ:
ດ້ວຍພື້ນທີ່ດິນປູກຝັງທີ່ອຸດົມສົມບູນ, ປະຊາຊົນມີມູນເຊື້ອໃນການເຮັດກະສິກຳ-ປູກຝັງລ້ຽງສັດ ແລະ ການປະມົງ (ມີເຮືອປະມົງເຖິງ 90 ລໍາ).
ນອກຈາກນີ້ ຍັງມີການຂະຫຍາຍຕົວດ້ານເສດຖະກິດ ແລະ ການບໍລິການທີ່ໜ້າສົນໃຈ:
- ບໍ່ຫີນ-ຊາຍ 10 ແຫ່ງ
- ຕະຫຼາດ 2 ແຫ່ງ ແລະ ໂຮງງານ 1 ແຫ່ງ
- ໂຮງແຮມ, ລິສອດ, ຮ້ານອາຫານ ແລະ ຮ້ານບັນເທີງກິນດື່ມ 10 ແຫ່ງ
- ດ້ານວັດທະນະທຳ-ທ່ອງທ່ຽວ: ມີສະຖານທີ່ສັກສິດທີ່ເປັນບ່ອນຍຶດໜ່ຽວຈິດໃຈຂອງປະຊາຊົນ ເຊັ່ນ: ວັດທົ່ງທາດ, ວັດປ່າເລໄລ ແລະ ວັດໜອງຄໍາແສນ.
ການຄົມມະນາຄົມ ແລະ ພື້ນຖານໂຄງລ່າງ:
ຕາແສງຊາຍຟອງ ມີລະບົບໄຟຟ້າ, ນໍ້າປະປາ ແລະ ເສັ້ນທາງຄົມມະນາຄົມທີ່ສະດວກສະບາຍ ເຊິ່ງເປັນທ່າແຮງສຳຄັນໃນການເຊື່ອມໂຍງ ໄປມາຫາສູ່ກັນລະຫວ່າງຕາແສງ, ບັນດາເມືອງອ້ອມຂ້າງໃນນະຄອນຫຼວງວຽງຈັນ ແລະ ຕ່າງແຂວງຢ່າງຄ່ອງຕົວ.
ແຫຼ່ງທີ່ມາ: ບ້ານຫາດກັນຊາ