ວັນທີ 11-12 ມິຖຸນາ 2026 ຄະນະຜູ້ແທນ ກະຊວງໂຍທາທິການ ແລະ ຂົນສົ່ງ ນຳໂດຍ ທ່ານ ງາມປະສົງ ເມືອງມະນີ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, ພ້ອມດ້ວຍ ທ່ານ ຫົວໜ້າກົມທາງລົດໄຟ, ຜູ້ອຳນວຍການໃຫ່ຍ ລັດວິສາຫະກິດລົດໄຟແຫ່ງຊາດລາວ ແລະ ຄະນະກຳມະການ ສປປ ລາວ ຜູ້ປະຈຳການຢູ່ ອົງການ OSJD ເຂົ້າຮ່ວມກອງປະຊຸມລັດຖະມົນຕີ ອົງການຮ່ວມມືລະຫວ່າງທາງລົດໄຟ (Organisation for Co operation between Railways) ຄັ້ງທີ 53 ທີ່ເມືອງ ດູຊານເບ, ປະເທດ ທາຈິກິສຖານ.
ກອງປະຊຸມຄັ້ງນີ້, ເປັນເວທີລະດັບສູງທີ່ສຳຄັນ ໃນການປຶກສາຫາລືກ່ຽວກັບການພັດທະນາວຽກງານການຂົນສົ່ງທາງລົດໄຟ ແລະ ການຊຸກຍູ້ການເຊື່ອມໂຍງເຄືອຂ່າຍການຂົນສົ່ງລະຫວ່າງປະເທດສະມາຊິກ.
ກອງປະຊຸມໄດ້ຮ່ວມລົງນາມໃນບົດບັນທຶກການຮ່ວມມື ເພື່ອເຂົ້າຮ່ວມເປັນສະມາຊິກແລວທາງລົດໄຟ ໝາຍເລກທີ 2 (Corridor 2) ຂອງອົງການຮ່ວມມືລະຫວ່າງທາງລົດໄຟ ຢ່າງເປັນທາງການ ຊຶ່ງແລວທາງດັ່ງກ່າວ ເປັນແລວທາງລົດໄຟ ເຊື່ອມຕໍ່ 6 ປະເທດຄື: ສປປ ລາວ, ສສ ຫວຽດນາມ, ສປ ຈີນ, ສ ກາຊັກສະຖານ, ສະຫະພັນ ຣັດເຊຍ ແລະ ສ ເອສໂຕນີ.
ການລົງນາມຄັ້ງນີ້ ຖືເປັນຂີດໝາຍປະຫວັດສາດ ແລະ ບາດກ້າວອັນສຳຄັນໃນວຽກງານການຂົນສົ່ງທາງລົດໄຟຂອງ ສປປ ລາວ, ພ້ອມກັນນັ້ນ ທັງເປັນການເຊື່ອມຕໍ່ເສັ້ນທາງລົດໄຟ ຂອງ ສປປ ລາວ ເຂົ້າກັບແລວທາງການຂົນສົ່ງກັບພາກພື້ນ ແລະ ສາກົນ.
ແຫຼ່ງຂໍ້ມູນ: ກະຊວງ ໂຍທາທິການ ແລະ ຂົນສົ່ງ