ໃນວັນທີ 03 ມິຖຸນາ 2026 ທີ່ຜ່ານມາ ທ່ານ ປອ. ດຣ ພອນປະດິດ ສັງໄຊຍະລາດ ຫົວໜ້າກົມຄວບຄຸມພະຍາດຕິດຕໍ່ ລາຍງານກ່ຽວກັບສະພາບການລະບາດຂອງພະຍາດອີໂບລາທີ່ເກີດຂຶ້ນໃນບັນດາປະເທດຢູ່ທະວີບອາຟຣິກາ.
ພະຍາດອີໂບລາເປັນພະຍາດທີ່ຕິດຕໍ່ຈາກສັດສູ່ຄົນ ແລະ ເປັນພະຍາດທີ່ຕິດຕໍ່ຈາກຄົນສູ່ຄົນໄດ້ ໂດຍຜ່ານການສໍາຜັດຜ່ານເຫຍື່ອເມື່ອ ຫຼື ນໍ້າຂັບລັ່ງທີ່ອອກຈາກຮ່າງກາຍຂອງຄົນທີ່ຕິດເຊື້ອ ຫຼື ສັດທີ່ຕິດເຊື້ອ.
ເບື້ອງຕົ້ນແມ່ນຈະມີອາການໄຂ້, ໄອ, ຖອກທ້ອງ ແລະ ມີຫຼາຍອາການເກີດຂຶ້ນທີ່ບໍ່ຊັດເຈນ ເຊິ່ງອາການດັ່ງກ່າວແມ່ນພາໃຫ້ເກີດມີເລືອດໄຫຼເຮັດໃຫ້ເສຍຊີວິດ ສຳລັບອັດຕາການເສຍຊີວິດຂອງກຸ່ມຄົນທີ່ຕິດພະຍາດນີ້ແມ່ນມີສູງເຖິງ 50-90%
ພະຍາດອີໂບລາບໍ່ແມ່ນພະຍາດໃໝ່ ເປັນພະຍາດທີ່ເຄີຍເກີດຂຶ້ນຕັ້ງແຕ່ປີ 1976 ສ່ວນໃຫ່ຍແມ່ນເກີດຂຶ້ນຢູ່ທະວີບອາຟຣິກາ ເກີດຂຶ້ນເປັນແຕ່ລະຊ່ວງໄລຍະ. ມາຮອດປີ 2014-2016 ກໍມີການລະບາດໃຫ່ຍອີກຄັງຢູ່ທີວີບອາຟຣິກາ ເລີ່ມຕົ້ນທີ່ປະເທດກີນີ ຈາກນັ້ນກໍແຜ່ລາມໄປຫຼາຍປະເທດໃນທະວີບອາຟຣິກາ ເຊິ່ງມີີຜູ້ຕິດເຊື້ອທັງໝົດ 28,000 ຄົນ ເສຍຊີວິດ 11,000 ຄົນ.
ພະຍາດດັ່ງກ່າວແມ່ນຍັງບໍ່ມີວັກຊີນ ຫຼື ຢາ ປິ່ນປົວສະເພາະ ສະນັ້ນແລ້ວ ໃນສະພາບປັດຈຸບັນໃນວັນທີ 16 ພຶດສະພາ 2026 ຜູ້ອໍານວຍການໃຫ່ຍຂອງອົງການອະນາໄມໂລກໄດ້ປະກາດຢ່າງເປັນທາງການຕໍ່ການລະບາດຂອງພະຍາດອີໂບລາເປັນພາວະສຸກເສີນທາງດ້ານສາທາລະນະສຸກຕາມກົດລະບຽບສາກົນດ້ານສາທາລະນະສຸກ
ຕາມຂໍ້ມູນຫຼ້າ, ສຸດໃນວັນທີ 21 ພຶດສະພາ 2026 ມີລາຍງານກໍລະນີສົງໄສທັງໝົດກວ່າ 746 ກໍລະນີ, ໃນນັ້ນເສຍຊີວິດ 176 ກໍລະນີ ທີ່ປະເທດຄອງໂກ. ກໍລະນີທີ່ໄດ້ຮັບການຢັງຢືນແລ້ວ 86 ກໍລະນີ, ເສຍຊີວິດ 10 ກໍລະນີ. ໃນນັ້ນມີກໍລະນີຕິດເຊື້ອໃນປະເທດອູການດາ 2 ກໍລະນີ, ເສຍຊີວິດ 1 ກໍລະນີ. ເຊິ່ງເປັນການລະບາດທີ່ເກີດໃນທະວີບອາຟຣິກາ ຢູ່ໃນພາກພື້ນທະວີບອາຊີຂອງເຮົາຫຼາຍປະເທດກໍມີມາດຕະການເຝົ້າລະວັງເປັນຕົ້ນແມ່ນຜູ້ທີ່ເດີນທາງມາຈາກອາຟຣິກາຈະຕ້ອງໄດ້ຈໍາກັດບໍລິເວນຕົນເອງ ຕໍ່ສະພາບການດັ່ງກ່າວກົມຄວບຄຸມພະຍາດຕິດຕໍ່ກໍໄດ້ຮ່ວມກັບອົງກອນອະນາໄມໂລກ ພ້ອມທັງຂະແໜງການທີ່ກ່ຽວຂ້ອງກໍໄດ້ປະຊຸມເພື່ອວາງມາດຕະການ ແລະ ປະເມີນຄວາມສ່ຽງ ເຖິງແມ່ນວ່າປະເທດລາວແມ່ນມີຄວາມສ່ຽງຕໍ່າ ເຖິງແມ່ນວ່າມີຄວາມສ່ຽງຕໍ່າແຕ່ພວກເຮົາກໍຕ້ອງໄດ້ວາງມາດຕະການຮອງຮັບ ໂດຍມີມາດຕະການແນະນໍາສຳລັບຜູ້ທີ່ຈະເດີນທາງໄປເຂດສ່ຽງຈະຕ້ອງລາຍງານຕົວໃຫ້ແກ່ທາງກະຊວງສາທາລະນະສຸກ ແລະ ຜູ້ທີ່ເດີນທາງມາຈາກເຂດສ່ຽງກໍຕ້ອງໄດ້ເຝົ້າລະວັງຕົນເອງຖ້າມີອາການທີ່ໜ້າສົງໄສ ພາຍໃນ 21 ວັນແມ່ນໃຫ້ແຈ້ງທາງກະຊວງສາທາລະນະສຸກເພື່ອວາງມາດຕະການຄວບຄຸມ ແລະ ປິ່ນປົວໃຫ້ຖືກຕ້ອງຕາມມາດຕະການ