ການພົບປະຄັ້ງນີ້, ສອງຝ່າຍກໍໄດ້ຕີລາຄາສູງກ່ຽວກັບການຮ່ວມມືຊ່ວຍເຫຼືອເຊິ່ງກັນ ແລະ ກັນ ຫຼາຍວຽກງານ ໃນໄລຍະຜ່ານມາ ກ່ຽວກັບວຽກງານຂະແໜງການສຶກສາ ແລະ ກິລາ ໂດຍສະເພາະ ທາງລັດຖະບານ ສປປ ລາວ ສະເໜີໃຫ້ລັດຖະບານ ສສ ຫວຽດນາມ.
ຫວຽດນາມຈະຊ່ວຍລາວມີດັ່ງນີ້:
1.ສືບຕໍ່ຊ່ວຍເຫຼືອປັບປຸງສູນເຝິກກິລາແຫ່ງຊາດ ທີ່ເປັນໂຄງການຊ່ວຍເຫຼືອຈາກ ສສ ຫວຽດນາມ ເຊິ່ງກໍ່ສ້າງຂຶ້ນໃນປີ 2009 ເນື່ອງຈາກປັດຈຸບັນ ມີສະພາບທີ່ຊຸດໂຊມ ແລະ ບໍ່ສາມາດນຳໃຊ້ໄດ້ເປັນປົກກະຕິແລ້ວ.
2.ສືບຕໍ່ຊຸກຍູ້, ຊ່ວຍເຫຼືອໂຄງການກໍ່ສ້າງສູນວິທະຍາສາດການກິລາ ເພື່ອນໍາໃຊ້ເຂົ້າໃນການກະກຽມນັກກິລາທີມຊາດລາວ ເຂົ້າຮ່ວມແຂ່ງຂັນງານມະຫະກໍາກິລາຊີເກມ ຄັ້ງທີ 36 ໃນປີ 2031 ທີ່ ສປປ ລາວ ເປັນເຈົ້າພາບ.
3.ສືບຕໍ່ສະໜອງທຶນການສຶກສາໄລຍະຍາວໃນສາຂາການກິລາ ແລະ ທຶນເຝິກອົບຮົມໄລຍະສັ້ນ-ກາງ ໃຫ້ແກ່ບຸກຄະລາກອນກິລາ ແລະ ນັກກິລາທີມຊາດ ທັງໃນຮູບແບບນຳສົ່ງວິທະຍາກອນມາຈັດເຝິກອົບຮົມໃຫ້ຢູ່ ສປປ ລາວ ແລະ ທຶນເກັບຕົວເຝິກຊ້ອມໄລຍະ 3-6 ເດືອນ ທີ່ ສສ ຫວຽດນາມ ຈຳນວນ 35-60 ທຶນຕໍ່ປີ ແລະ ໄລຍະ ປີ 2029-2030 ທີ່ກະກຽມເປັນເຈົ້າພາບຊີເກມ ປີ 2031 ຈໍານວນ 70-100 ທຶນຕໍ່ປີ.
4.ສືບຕໍ່ສະໜອງອຸປະກອນເຝິກຊ້ອມ ແລະ ເເຂ່ງຂັນທີ່ຈຳເປັນ ແລະ ໄດ້ມາດຕະຖານ ໃຫ້ແກ່ປະເພດກິລາຄວາມຫວັງຫຼຽນລາງວັນ ໂດຍສະເພາະປະກອບໃຫ້ແກ່ ສູນເຝິກກິລາແຫ່ງຊາດ, ສະຖາບັນກິລາ-ກາຍະກຳແຫ່ງຊາດ ເພື່ອກະກຽມນັກກິລາທີມຊາດ ເຂົ້າຮ່ວມເເຂ່ງຂັນງານມະຫະກຳກິລາຊີເກມ ປີ 2031 ທີ່ ສປປ ລາວ ເປັນເຈົ້າພາບ.
5.ພ້ອມນີ້, ຍັງສະເໜີຝ່າຍຫວຽດນາມ ສະໜອງທຶນເຝິກອົບຮົມການບໍລິຫານຄຸ້ມຄອງກິລາຄົນພິການໃຫ້ຜູ້ບໍລິຫານ; ການຈັດກິດຈະກຳການແຂ່ງຂັນກິລາບານເຕະນັກຮຽນມັດທະຍົມສຶກສາ ລະຫວ່າງ ລາວ ແລະ ຫວຽດ ນາມ.
6.ສືບຕໍ່ຊ່ວຍເຫຼືອເຝິກຊ້ອມໃຫ້ແກ່ນັກກິລາຄົນພິການທີມຊາດລາວ ປະເພດກິລາແລ່ນ-ລານ ແລະ ຍົກນ້ຳໜັກ ພ້ອມທັງແລກປ່ຽນການສົ່ງເສີມມວນຊົນທຸກເພດໄວ ເຂົ້າຮ່ວມຂະບວນການອອກກຳລັງກາຍເພື່ອສຸຂະພາບ ແລະ ສົ່ງເສີມກິລາພື້ນເມືອງ.
ແຫຼ່ງທີ່ມາ: ຂ່າວສານປະເທດລາວ