ກອງສຳຫຼວດ ແລະ ປັກຫຼັກໝາຍຊາຍແດນ ລາວ-ກຳປູເຈຍ ເມືອງໂຂງ ແຂວງຈຳປາສັກ ໄດ້ສະຫຼຸບ ການຈັດຕັ້ງປະຕິບັດວຽກງານພາຍໃນປີ 2025 ທີ່ຜ່ານມາ.​ ທ່ານ ພັນໂທ ໂພສະຫວັນ ພິມມະວົງ ຫົວໜ້າພະແນກແຜນການສັງລວມ, ຮສຮ ກະຊວງປ້ອງກັນປະເທດ ລາຍງານໃນວັນທີ 5 ພຶດສະພານີ້ວ່າ: ຜົນສຳເລັດທີ່ພົ້ນເດັ່ນໃນປີ 2025 ແມ່ນສາມາດກໍານົດຈຸດທີ່ຈະປັກຫຼັກໝາຍແບບໃໝ່ປ່ຽນແທນຫຼັກໝາຍເກົ່າ ແລະ ປັກຫຼັກໝາຍເພີ່ມເຕີມໄດ້ທັງໝົດ 76 ຫຼັກໝາຍ, ພ້ອມທັງສຳເລັດການກໍ່ສ້າງຫຼັກໝາຍຕົວຈິງໃນພື້ນທີ່ໄດ້ເຖິງ 67 ຫຼັກໝາຍ.

ທີມງານວິຊາການໄດ້ນຳໃຊ້ເຕັກໂນໂລຊີ GPS ລະບົບສອງຄື້ນ ເພື່ອວັດແທກຄ່າພິກັດຫຼັກໝາຍໄດ້ 77 ຫຼັກໝາຍ (ແຕ່ຫຼັກໝາຍ 034 ຫາ 078) ແລະ ສຳເລັດການສ້າງຫຼັກບ໋ອກເຄົ້າພິກັດພື້ນຖານໃນຂັ້ນຕ່າງໆອີກຫຼາຍສິບຫຼັກ ເພື່ອເປັນບ່ອນອີງທາງດ້ານວິຊາການທີ່ຊັດເຈນ; ໄດ້ມີການລົງສຳຫຼວດພື້ນທີ່ຕົວຈິງເພື່ອສຶກສາຄວາມເປັນໄປໄດ້ໃນການກໍ່ສ້າງຂົວຂ້າມເຊລຳເພົາ ແລະ ເສັ້ນທາງເຊື່ອມຕໍ່ໄປຍັງແຂວງເພຣຍວິເຮຍ ຣາຊະອານາຈັກກຳປູເຈຍ ເພື່ອອຳນວຍຄວາມສະດວກໃນການໄປມາຫາສູ່ ແລະ ການຄ້າຂາຍລະຫວ່າງສອງຊາດ.

ບໍລິເວນຫຼັກໝາຍເລກທີ 033/3-034 ສອງຝ່າຍໄດ້ເປັນເອກະພາບກຳນົດຈຸດສຳເລັດຈຳນວນ 6 ຫຼັກ, ພ້ອມທັງຕິດຕາມ ແລະ ແກ້ໄຂບັນຫາການບຸກເບີກເນື້ອທີ່ກະສິກຳ ທີ່ລ່ວງລໍ້າຊາຍແດນຢ່າງໃກ້ຊິດ. ໂດຍລວມແລ້ວ, ແຕ່ເດືອນ ພຶດສະພາ 2023 ມາເຖິງທ້າຍປີ 2025, ວຽກງານກຳນົດຈຸດປັກຫຼັກໝາຍຊາຍແດນ ລາວ–ກຳປູເຈຍ ແມ່ນສຳເລັດແລ້ວ 280 ຫຼັກໝາຍ ຈາກທັງໝົດ 510 ຫຼັກໝາຍ (ເທົ່າກັບ 54.9%) ແລະ ກໍ່ສ້າງສຳເລັດແລ້ວ 213 ຫຼັກໝາຍ (ເທົ່າກັບ 41.76%).