ສຳນັກຂ່າວປະເທດໄທ ລາຍງານໃນວັນທີ 21 ມັງກອນ 2026 ເກີດເຫດການຄາຕະກຳສຸດສະເທືອນຂວັນ ອະດີດຄູຄົນໄທ ອາຍຸ 79 ປີ ນອນເສຍຊີວິດຄາບ້ານພັກ ໃນເຂດບຶງກຸ່ມ ກຸງເທບມະຫານະຄອນ ປະເທດໄທ ພາຍຫຼັງເຈົ້າໜ້າທີ່ກວດສອບຈຶ່ງຕັ້ງຂໍ້ສົງໃສ ແມ່ບ້ານຊາວລາວເປັນຄົນລົງມືກໍ່ເຫດ ຫຼັງຫາຍຕົວໄປຢ່າງປິດສະໜາ.
ຕາມການລາຍງານຂອງເຈົ້າໜ້າທີ່ລະບຸວ່າ: ຜູ້ເສຍຊີວິດມີຮ່ອງຮອຍການຖືກທຸບດ້ວຍຂອງແຂງຢູ່ເທິງໃບໜ້າ ແລະ ມີຮອຍຄືຖືກຂອງມີຄົມປາດຢູ່ບໍລິເວນຄໍ ແລະ ຂໍ້ຕີນເປັນບາດເລິກ ຫຼັງພົບຖືກເປັນສົບຫຼາຍຄົນຕັ້ງຂໍ້ສົງໃສໄປທີ່ແມ່ບ້ານຄົນດັ່ງກ່າວ ເນື່ອງຈາກໄດ້ຫາຍຕົວໄປຢ່າງປິດສະໜາ ແລະ ບໍ່ສາມາດຕິດຕໍໄດ້ໃນຂະນະນີ້.
ທາງດ້ານຍາດຂອງຜູ້ເສຍຊີວິດເລົ່າວ່າ: ແມ່ບ້ານຄົນນີ້ເປັນຄົນຂີ້ຄ້ານ, ມັກເບິກເງິນລ່ວງໜ້າ ແລະ ເປັນໜີ້ຜູ້ເສຍຊີວິດ ປະມານ 1 ໝື່ນບາດ ຫຼື ປະມານເກືອບ 7 ລ້ານກີບ ແລະ ໄດ້ເຄີຍລາອອກແລ້ວ ແຕ່ຍາດບອກວ່າຕ້ອງໄດ້ໃຊ້ໜີ້ກ່ອນຈຶ່ງຈະສາມາດອອກໄດ້, ປັດຈຸບັນເຈົ້າໜ້າທີ່ກຳລັງເລັ່ງຄົ້ນຫາເສັ້ນທາງການເດີນທາງຂອງແມ່ບ້ານຄົນດັ່ງກ່າວເພື່ອນຳຕົວມາສືບສວນຕາມຂັ້ນຕອນກົດໝາຍຕໍ່ໄປ.
ແຫຼ່ງຂໍ້ມູນ: 7HD