ພາຍຫຼັງທີ່ກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນແຂວງຈໍາປາສັກ ຊຸດທີ IV ໃນກາງເດືອນທັນວາ 2025 ໄດ້ລົງຄະແນນສຽງເປັນເອກະພາບ ແລະ ພິຈາລະນາຮັບຮອງເອົາການສ້າງຕັ້ງຕາແສງຂອງແຂວງຈໍາປາສັກ ຈໍານວນ 46 ຕາແສງ ໃນ 1 ນະຄອນ ແລະ 9 ເມືອງ.
ໃນວັນທີ 2 ມັງກອນ 2026, ແຂວງຈໍາປາສັກ ກໍໄດ້ປະກາດສ້າງຕັ້ງຕາແສງ 46 ຕາແສງຂຶ້ນ ຢູ່ສະໂມສອນແຂວງ ໂດຍການເປັນປະທານຂອງ ທ່ານ ປອ.ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງຈໍາປາສັກ. ມີບັນດາທ່ານຮອງເລຂາຄະນະບໍລິຫານງານພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ການນຳແຂວງ, ການນໍານະຄອນ, ເມືອງ, ການນໍາພະແນກການກົມກອງອ້ອມຂ້າງແຂວງ, ພະນັກງານຫັນລົງກໍ່ສ້າງຮາກຖານຂັ້ນແຂວງ ປະຈຳແຕ່ລະເມືອງ, ພັນລະຍາການນໍາ, ພະນັກງານອາວຸໂສບໍານານ, ນັກທຸລະກິດ, ຜູ້ປະກອບການ ແລະ ພະນັກງານວິຊາການທີ່ກ່ຽວຂ້ອງ ເຂົ້າຮ່ວມ.
ໃນພິທີ, ທ່ານ ແສງອາທິດ ຂັນດາລາ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານຂໍ້ຕົກລົງຂອງຄະນະກໍາມະການປົກຄອງແຂວງ ເລກທີ 1479 - 1488/ຄປຂ.ຈສ, ລົງວັນທີ 30 ທັນວາ 2025 ວ່າດ້ວຍການສ້າງຕາແສງ ໃນ 1 ນະຄອນ ແລະ 9 ເມືອງ ຂອງແຂວງຈໍາປາສັກ ລວມມີ 46 ຕາແສງ, ໃນນັ້ນ, ນະຄອນປາກເຊ ມີ 42 ບ້ານ, ມີ 4 ຕາແສງ ຄື: ຕາແສງປາກເຊ, ຕາແສງຄັນເກີງ, ຕາແສງໂຊກອໍານວຍ ແລະ ຕາແສງສະໜາມໄຊ. ເມືອງຊະນະສົມບູນ ມີ 47 ບ້ານ, ມີ 4 ຕາແສງ ຄື: ຕາແສງວັງເວີນ, ຕາແສງໜອງດູ່, ຕາແສງບຸ່ງຄ້າ ແລະ ຕາແສງສະຜ່າຍ. ເມືອງບາຈຽງຈະເລີນສຸກ ມີ 47 ບ້ານ, ມີ 4 ຕາແສງ ຄື: ຕາແສງແກ້ງເກ່ຍ, ຕາແສງໜອງໃສ, ຕາແສງຫ້ວຍແຮ່ ແລະ ຕາແສງຫົວແຊ. ເມືອງປາກຊ່ອງ ມີ 88 ບ້ານ, ມີ 5 ຕາແສງ ຄື: ຕາແສງປາກຊ່ອງ, ຕາແສງອີ່ຕູ້, ຕາແສງກອງຕູ່ນ, ຕາແສງອຸດົມສິນ ແລະ ຕາແສງເຊນໍ້ານ້ອຍ. ເມືອງປະທຸມພອນ ມີ 68 ບ້ານ, ມີ 5 ຕາແສງ ຄື: ຕາແສງມ່ວງ, ຕາແສງປະທຸມພອນ, ຕາແສງບຸ່ນ, ຕາແສງພະໂພ ແລະ ຕາແສງນໍ້າອ້ອມ.ເມືອງໂພນທອງ ມີ 71 ບ້ານ, ມີ 5 ຕາແສງ ຄື: ຕາແສງເກົ່າເກິ່ງ, ຕາແສງກຸດຈິກ, ຕາແສງໂພນທອງ, ຕາແສງດົງຍ່າງ ແລະ ຕາແສງສັກເມືອງ. ເມືອງຈໍາປາສັກ ມີ 73 ບ້ານ, ມີ 5 ຕາແສງ ຄື: ຕາແສງຈໍາປາສັກ, ຕາແສງໜອງວຽນ, ຕາແສງດອນຕະລາດ, ຕາແສງໜອງແຕ້ມ ແລະ ຕາແສງໜອງຜໍາ. ເມືອງສຸຂຸມາ ມີ 56 ບ້ານ, ມີ 5 ຕາແສງ ຄື: ຕາແສງສຸຂຸມາ, ຕາແສງອຸທຸມພອນ, ຕາແສງທາດສາມປາງ, ຕາແສງຫຽງສໍາພັນ ແລະ ຕາແສງສໍາຫຼຽງ. ເມືອງມຸນລະປາໂມກ ມີ 36 ບ້ານ, ມີ 4 ຕາແສງ ຄື: ຕາແສງເວີນ, ຕາແສງນາດີ, ຕາແສງກະດັນ, ຕາແສງໜອງງາ. ເມືອງໂຂງ ມີ 114 ບ້ານ, ມີ 5 ຕາແສງ ຄື: ຕາແສງໂຂງ, ຕາແສງຫາດຊາຍຄູນ, ຕາແສງກະດັນ, ຕາແສງຄອນ ແລະ ຕາແສງຂະເໝົາ.
ໃນພິທີຍັງໄດ້ມອບຫຼຽນທີ່ລະນຶກວັນສະຖາປະນາ ສປປ ລາວ ຄົບຮອບ 50 ປີ ຊຸດທີ III ໃຫ້ແກ່ການນໍາແຂວງ, ພະເຖລານຸເຖຣະ, ພັນລະຍາການນໍາ, ພະນັກງານອາວຸໂສບໍານານ, ແລະ ມອບຫຼຽນໄຊພັດທະນາ ໃຫ້ແກ່ນັກທຸລະກິດ, ຜູ້ປະກອບການທີ່ມີຜົນງານດີເດັ່ນໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ແຂວງຈໍາປາສັກ ໃນໄລຍະຜ່ານມາ. ໃຫ້ກຽດມອບໂດຍທ່ານ ປອ.ອາລຸນໄຊ ສູນນະລາດ ເລຂາຄະນະບໍລິຫານງານພັກແຂວງຈໍາປາສັກ. ພ້ອມນີ້ ຍັງໄດ້ປະກາດຖອນ ແລະ ມອບໃບຍ້ອງຍໍໃຫ້ແກ່ພະນັກງານທີ່ຫັນລົງກໍ່ສ້າງຮາກຖານການເມືອງ ຕາມມະຕິຕົກລົງ ຂອງຄະນະປະຈຳພັກແຂວງ ເລກທີ 706/ຄຈພຂ.ຈສ ແລະ ມະຕິຕົກລົງ 500/ຄຈພຂ.ຈສ, ໃຫ້ກຽດມອບໂດຍ ທ່ານ ປອ.ສຸກສະຫວັນ ວິໄລວົງ ຮອງເລຂາຄະນະບໍລິຫານງານພັກແຂວງ ປະທານຄະນະກໍາມະການປົກຄອງແຂວງ. ນອກນີ້, ໃນພິທີຍັງໄດ້ມອບງົບປະມານອຸດໜູນວຽກງານກໍ່ສ້າງຮາກຖານການເມືອງ ໃຫ້ກັບນະຄອນປາກເຊ ແລະ 9 ເມືອງ. ຕອນທ້າຍພິທີ, ທ່ານ ປອ.ອາລຸນໄຊ ສູນນະລາດເລຂາຄະນະບໍລິຫານງານພັກແຂວງ ກໍມີຄໍາເຫັນໂອ້ລົມຊີ້ທິດເຍືອງທາງ ຕື່ມອີກ.