ສຳນັກຂ່າວຂອງປະເທດໄທລາຍງານວ່າ ໃນວັນທີ 01 ມັງກອນ 2026 ທີ່ຜ່ານມາ, ມີເຫດສະຫຼົດໃຈ ຈາກເຈົ້າຂອງໝາຄົນໜຶ່ງໄດ້ອອກມາເປີດເຜີຍວ່າ ຫຼັງຈາກທີ່ມີສຽງພຸສະເຫຼີມສະຫຼອງປີໃໝ່ດັງຂຶ້ນ ເຮັດໃຫ້ໝາທີ່ຕົນເອງລ້ຽງມາ 7 ປີ ຕົກໃຈຢ່າງແຮງ ແລະ ໄດ້ເສຍຊີວິດຄາອ້ອມກອດຂອງຕົນ.
ເຈົ້າຂອງຍັງອອກມາເລົ່າອີກວ່າ,ຕະຫຼອດ 7 ປີ ທີ່ລ້ຽງໝາໂຕນີ້ແມ່ນຕົນເອງຮັກ ແລະ ເບິ່ງແຍງໝາໂຕນີ້ຄືກັບລູກແທ້ໆ ບໍ່ເຄີຍທີ່ຈະປະໄວ້ໃຫ້ຢູ່ໂຕດຽວ. ເຊິ່ງໃນຄືນເກີດເຫດ ຕົນເອງແມ່ນກຳລັງເຮັດວຽກ ສຽງພຸກໍດັງຂຶ້ນຢ່າງຮຸນແຮງ ເຊິ່ງລາກຍາວເປັນເວລາດົນ ຈົນເຮັດໃຫ້ໝາຊ໊ອກ ແລະ ເສຍຊີວິດໃນເວລາຕໍ່ມາ.
ໃນມື້ດຽວກັນ, ກໍຍັງມີອີກໜຶ່ງກໍລະນີ ທີ່ເຈົ້າຂອງໝາໄດ້ສູນເສຍໝາທີ່ຕົນຮັກທີ່ສຸດໄປເຊັ່ນດຽວກັນ.ໃນມື້ນັ້ນ ເຈົ້າຂອງໝາ ກໍໄດ້ສະເຫຼີມສະຫຼອງຢູ່ເຮືອນຕາມປົກກະຕິກັບຄອບຄົວ ລວມທັງສັດລ້ຽງແມ່ນຢູ່ນຳກັນ., ແຕ່ພໍສຽງພຸດັງຂຶ້ນ ກໍເຮັດໃຫ້ໝາຕົກໃຈ ແລະ ມີອາການຊ໊ອກ. ພາຍຫຼັງທີ່ຕົນໄດ້ເຫັນສັດລ້ຽງໝົດສະຕິ ຈຶ່ງໄດ້ຟ້າວເຂົ້າມາຊ່ວຍປໍ້າຫົວໃຈ ແຕ່ມັນກໍບໍ່ທັນແລ້ວ ເພາະໝາຂອງຕົນໄດ້ເສຍຊີວິດໄປແລ້ວ.
ຈາກເຫດການທີ່ເກີດຂຶ້ນ ເຮົາອາດຈະເຄີຍເຫັນກໍລະນີຕົວຢ່າງ ກ່ຽວກັບຜົນກະທົບຂອງການຈູດພຸທີ່ມີຕໍ່ສັດລ້ຽງ ເພາະບາງໂຕແມ່ນຢ້ານແທ້ໆ ສ່ວນບາງໂຕແມ່ນບໍ່ຢ້ານ ແລະ ເຫົ່າໃສ່ສຽງພຸນຳອີກ. ເຊິ່ງເຫດການແບບນີ້ ເຈົ້າຂອງສັດລ້ຽງເອງກໍອາດຈະຫາວິທີຫຼີກລ່ຽງໄດ້ຍາກ. ດັ່ງນັ້ນເຮົາຄວນຫາວິທີຮັບມື ແລະ ປ້ອງກັນດີກວ່າ.
– ໃນມື້ເທດສະການ ຫຼື ມື້ທີ່ຈະມີການຈູດພຸ ເຈົ້າຂອງສັດລ້ຽງ ຄວນຈະຢູ່ນຳສັດລ້ຽງຂອງຕົນ ຫຼື ປ່ອຍໄວ້ໃນບ່ອນທີ່ສັດບໍ່ສາມາດຫຼົບໜີ ແລະ ອອກໄປບ່ອນອື່ນໄດ້ (ປ້ອງກັນການແລ່ນໜີອອກຈາກເຮືອນ)
– ໃຊ້ຜ້າພັນໂຕໃຫ້ສັດລ້ຽງ (Half Wrap) ແມ່ນການໃຊ້ຜ້າທີ່ມີລັກສະນະຄ້າຍຄືຜ້າພັນຄໍ ມາພັນອອ້ອມໂຕສັດລ້ຽງ ຄ້າຍຄືກັບການກອດ ວິທີ່ນີ້ຈະຊ່ວຍໃຫ້ສັດລ້ຽງຮູ້ສຶກຜ່ອນຄາຍ ແລະ ຮູ້ສຶກປອດໄພ
– ຖ້າກໍລະນີສັດລ້ຽງມີອາການຊ໊ອກ ຫຼື ໝົດສະຕິ ເຮົາສາມາດເຮັດການປໍ້າຫົວໃຈ (CPR) ເພື່ອທີ່ຈະສາມາດເປັນການຊ່ວຍເຫຼືອເບື້ອງຕົ້ນໄດ້ດັ່ງນີ້:
- ຈັບສັດລ້ຽງນອນຫັນຂ້າງ ເພື່ອທີ່ຈະປໍ້າຫົວໃຈ ໂດຍການວາງມືທັງ 2 ຂ້າງ ລົງບ່ອນເອິກ ຫຼື ບໍລິເວນຫຼັງຂໍ້ສອກຂອງສັດລ້ຽງ
- ພະຍາຍາມກົດມືໃຫ້ໄດ້ຄວາມເລິກປະມານ 1/3 ຫຼື 1/2 ຂອງຊ່ວງເອິກ ຫຼັງຈາກນັ້ນໃຫ້ປໍ້າຕິດຕໍ່ກັນ 30 ຄັ້ງ ເຊິ່ງແຕ່ລະຄັ້ງ ແມ່ນໃຫ້ມີເວລາຫ່າງກັນປະມານ 1 ວິນາທີ
- ຈາກນັ້ນໃຫ້ເລີ່ມຜາຍປອດ ເຊິ່ງສະຫຼັບຈາກປາກເປັນດັງ ເທື່ອລະ 2 ຄັ້ງ, ສະຫຼັບກັນໄປມາຈົນກວ່າຫົວໃຈຈະເຕັ້ນ ແລະ ຈຶ່ງປ່ຽນເປັນການຜາຍປອດຢ່າງດຽວ ຈົນກວ່າຈະຮອດມືຂອງສັດຕະວະເພດ.
ແຫຼ່ງຂໍ້ມູນ: ໂຫນກະແສ, hospital