ທ່ານ ວຽງສາລີ ອິນທະພົມ ຮອງຫົວໜ້າພະແນກການເງິນ ນວ ຊີ້ແຈງການແກ້ໄຂໜີ້ສິນ ມີໜີ້ 278 ໂຄງການ ລວມມູນຄ່າຄ້າງຊໍາລະ 2,996.85 ຕື້ກີບ.
ວັນທີ 16 ທັນວາ 2025 ໃນກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ IV ທ່ານ ວຽງສາລີ ອິນທະພົມ ຮອງຫົວໜ້າພະແນກການເງິນ ນະຄອນຫຼວງວຽງຈັນ ໄດ້ຊີ້ແຈງຕໍ່ກັບຄໍາຊັກຖາມ ຂອງສະມາຊິກສະພາແຫ່ງຊາດ ແລະ ສະມາຊິກສະພາ ປະຊາຊົນ ນະຄອນຫຼວງວຽງຈັນ ວ່າ: ສໍາລັບການແກ້ໄຂໜີ້ສິນ ນະຄອນຫຼວງວຽງຈັນ ກໍ່ເອົາໃຈໃສ່ໃນການແກ້ໄຂໜີ້ສິນ ບັນດາໂຄງການລົງທຶນຂອງລັດ ເຊິງສະແດງອອກໃຫ້ເຫັນ ໃນໄລຍະ 5 ປີຜ່ານມາ ນັບແຕ່ປີ 2021 ເປັນຕົ້ນມາ ນະຄອນຫຼວງວຽຈັນ ມີໂຄງການໜີ້ສິນທັງໝົດ 278 ໂຄງການ ລວມມູນຄ່າຄ້າງຊໍາລະທັງໝົດ 2,996.85 ຕື້ກີບ, ໃນນັ້ນ ເປັນໂຄງການໜີ້ສິນແຕ່ປີ 2015 ຄືນຫຼັງ 78 ໂຄງການ, ລວມມູນຄ່າຄ້າງຊໍາລະ 382.07 ຕື້ກີບ. ໄດ້ນໍາໃຊ້ເງິນເກີນແຜນເຂົ້າໃນການແກ້ໄຂໜີ້ສິນໂຄງການລົງທຶນຂອງລັດ ທັງໝົດ 312.19 ຕື້ກີບ (ໃນນັ້ນ, ປີ 2021 ຈໍານວນ 35.27 ຕື້ກີບ, ປີ 2022 ຈໍານວນ 68 ຕື້ກີບ, ປີ 2023 ຈໍານວນ 76.74 ຕື້ກີບ, ປີ 2024 ຈໍານວນ 35.23 ຕື້ກີບ ແລະ ປີ 2025 ໄດ້ນໍາໃຊ້ເງິນເກີນແຜນ ຈໍານວນ 96.95 ຕື້ກີບ). ສາມາດປົດໜີ້ໂຄງການ ແຕ່ປີ 2015 ຄືນຫຼັງ ໄດ້ 49 ໂຄງການ, ເທົ່າກັບ 62.82% (ສະເພາະປີ 2025 ແມ່ນສາມາດປົດໜິ້ສິນ 2015ຄືນຫຼັງ ໄດ້ 15 ໂຄງການ) ປັດຈຸບັນຍັງເຫຼືອ 29 ໂຄງການ, ລວມມູນຄ່າຄ້າງຊໍາລະ 282.17 ຕື້ກີບ.
ສໍາລັບ ໂຄງການໜີ້ສິນ ແຕ່ປີ 2016 ຮອດປັດຈຸບັນ ແມ່ນຍັງເຫຼືອ 160 ໂຄງການ (ລວມທັງໂຄງການສິນເກີດຂຶ້ນໃໝ່ ໃນແຕ່ລະປີ), ລວມມູນຄ່າຄ້າງຊໍາລະ 1,674.44 ຕື້ກີບ.ສໍາລັບແຜນສືບຕໍ່ໃນການແກ້ໄຂໜີ້ສິນ ໃນປີ 2026 ນະຄອນຫຼວງວຽງຈັນ ແມ່ນຈະໄດ້ສືບຕໍ່ສຸມໃສ່ແກ້ໄຂໜີ້ສິນໂຄງການລົງທືນຂອງລັດ ດ້ວຍງົບປະມານປະຈໍາປີ (ບ້ວງປົກກະຕິ) ຊຶ່ງໃນປີ 2026 ໄດ້ຮັບເພດານງົບປະມານທັງໝົດ 46.5 ຕື້ກີບ. ໃນນີ້: ໄດ້ຈັດສັນທຶນໃສ່ໂຄງການໜີ້ສິນ 23.25 ຕື້ກີບ ກວມເອົາ 50% ຂອງທຶນທັງໝົດ. ພ້ອມກັນນີ້, ກໍຈະໄດ້ສືບຕໍ່ຄົ້ນຄວ້າຊອກຫາແຫຼ່ງທຶນ ແລະ ທ່າແຮງອື່ນໆທີ່ມີ ເປັນຕົ້ນ: ເງິນເກີນແຜນ ປີ 2025 ຂອງນະຄອນຫຼວງ ແລະ ນະໂຍບາຍອື່ນໆ ທີ່ລັດຖະບານວາງອອກ ໂດຍເລັງຊໍາລະໃຫ້ໂຄງການແຕ່ປີ 2015 ຄືນຫຼັງ ເປັນບູລິມະສິດໃນການແກ້ໄຂ.