ເຂີຍໂຫດບໍ່ພໍໃຈເມຍ ທີ່ແຊຣລົງເຟສບຸກ ຈຶ່ງກໍ່ເຫດຄາຕະກຳ ແລ້ວຈົບຊີວິດຕົນເອງຕາມ
ປກສ ແຂວງຊຽງຂວາງ ລາຍງານວ່າ: ວັນທີ 15 ກໍລະກົດ 2025 ຜ່ານມານີ້, ເຈົ້າໜ້າທີ່ກອງບັນຊາການ ປ້ອງກັບຄວາມສະຫງົບ ແຂວງຊຽງຂວາງໄດ້ຮັບລາຍງານ ຈາກປະຊາຊົນວ່າ: ໄດ້ມີເຫດຄາຕະກໍາ ຢູ່ບ້ານໂຕນໃຕ້ ເມືອງແປກ ແຂວງຊຽງຂວາງ. ດັ່ງນັ້ນ, ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງລົງກວດກາສະຖານທີ່ເກີດເຫດ, ໃນເບື້ອງຕົ້ນ ພົບເຫັນຜູ້ເສຍຊີວິດ 3 ຄົນຄື: ທ້າວກິແກ້ວ ອາຍຸ 62 ປີ, ນາງທຸມມາ ອາຍຸ 52 ປີ ແລະ ນາງຕາມົນ ອາຍຸ 5 ປີ, ໄດ້ຮັບບາດເຈັບ 1 ຄົນຊື່ ນາງສີດາ ອາຍຸ 85 ປີ.
ຈາກການສອບຖາມຜູ້ເຫັນເຫດການຈຶ່ງໄດ້ຮູ້ວ່າ: ຜູ້ກໍ່ເຫດຄາຕະກໍາໃນຄັ້ງນີ້ ຊື່ທ້າວຄົດ ອາຍຸ 36 ປີ ອາຊີບທະຫານ ມາເປັນເຂີຍສູ່ ຢູ່ບ້ານໂຕນໃຕ້ ເມືອງແປກ. ຕາມການລາຍງານຂອງນາງ ເປ ຜູ້ເປັນເມຍໃຫ້ຮູ້ວ່າ: ໄດ້ສ້າງຄອບຄົວໃນປີ 2016 ແລະ ມີລູກນໍາກັນ 2 ຄົນ, ກ່ອນມື້ເກີດເຫດຕົນເອງໄດ້ແຊເນື້ອຫາຈາກເພຈໜຶ່ງ ມາລົງເຟດບຸກຂອງຕົນເອງ ເຊິ່ງມີເນື້ອໃນຂຽນວ່າ: “ຜົວທີ່ບໍ່ຫລິ້ນ ໃຊ້ເວລາກັບຄອບຄົວ ຊ່ວຍເມຍເຮັດວຽກເຮືອນ ບໍ່ຕິດເຫລົ້າຕິດໄພ້ ຜົວດີໆແບບນີ້ຍັງມີຢູ່ບໍ?” . ຫລັງຈາກຜູ້ເປັນຜົວໄດ້ເຫັນເມຍແຊລົງເຟສເຮັດໃຫ້ຜູ້ກ່ຽວບໍ່ພໍໃຈ.
ມາຮອດເວລາ 15:00 ໂມງ ຜູ້ເປັນຜົວໄດ້ໂທຫາເມຍ ເວົ້າວ່າ ເຈົ້າຄິດດີແລ້ວບໍ ທີ່ແຊໂພສດັ່ງກ່າວລົງເຟສບຸກ, ຮອດເວລາ 17:00 ໂມງ ຜູ້ກ່ຽວໄດ້ກັບມາຮອດເຮືອນ ຫລັງຈາກນັ້ນທັງສອງໄດ້ຜິດຖຽງກັນ, ຜູ້ເປັນແມ່ເຖົ້າຈຶ່ງໄດ້ມາຫ້າມ ແຕ່ທ້າວຄົດຜູ້ເປັນລູກເຂີຍໄດ້ຊີ້ໜ້າແມ່ນເຖົ້າພ້ອມທັງເວົ້າວ່າ ເຈົ້າບໍ່ຕ້ອງມາຫຍຸ້ງ ບໍ່ແມ່ນເລື່ອງຂອງເຈົ້າ, ຜູ້ເປັນແມ່ເຖົ້າເວົ້າວ່າ ເຈົ້າເຮັດແບບນີ້ຂ້ອຍກໍບໍ່ພໍໃຈ ໃຫ້ບອກພີ່ນ້ອງມາລົມກັນ. ຈາກນັ້ນ, ທ້າວຄົດໄດ້ຂີ່ລົດຈັກອອກເຮືອນໄປ ມາຮອດ 22:00 ຈຶ່ງກັບມານອນຢູ່ເຮືອນ.
ຮອດເວລາ 04:00 ໂມງເຊົ້າ ຂອງວັນທີ 15 ກໍລະກົດ 2025 ທ້າວຄົດຜູ້ເປັນຜົວ ໄດ້ເວົ້າໃຫ້ເມຍອີກວ່າ ມຶງແຊເນື້ອຫາແບບນີ້ເຮັດໃຫ້ກູເສຍຫາຍ ກູຊິເຮັດໃຫ້ມຶງເສຍໃຈໄປຕະຫລອດຊີວິດ, ຈາກນັ້ນ ຮອດເວລາ 7:00 ໂມງ ທ້າວຄົດໄດ້ເອົາງົວໄປກິນຫຍ້າແລ້ວກັບມາເຮືອນ. ໃນຕອນເຊົ້າເຫັນແມ່ຕູ້ນັ່ງຢູ່ທາງເຂົ້າປະຕູເຮືອນ, ແມ່ນາຍນັ່ງຢູ່ລະບຽງເຮືອນ ແລະ ພໍ່ເຖົ້າກໍາລັງຈູງລົດຈັກອອກຈາກປະຕູຮົ້ວ. ທ້າວຄົດຈຶ່ງໄດ້ເຂົ້າໄປໃນເຮືອນ ແລ້ວຈັບເອົາປືນຂອງພໍ່ເຖົ້າ ມາຍິງໃສ່ແມ່ຕູ້, ຍິງໃສ່ແມ່ເຖົ້າ, ຍິງໃສ່ພໍ່ເຖົ້າ ຍິງໃສ່ລູກ ພ້ອມທັງຍິງໃສ່ແມ່ເຖົ້າອີກ 1 ນັດ ແລະ ພໍ່ເຖົ້າອີກ 1 ນັດ ແລ້ວຈັບປືນຍ່າງມາຫາເມຍແລ້ວເວົ້າວ່າ: ກູບໍ່ຍິງມຶງດອກ! ປະໄວ້ໃຫ້ມຶງດູແລລູກ.
ຫລັງຈາກນັ້ນ, ໄດ້ຈັບປືນຫລົບໜີເຂົ້າປ່າ ຜູ້ກ່ຽວຍັງໄດ້ໄລ້ສົດລົງເຟສບຸກຕົນເອງ ແລະ ສາລະພາບ ຄວາມຜິດຕໍ່ຄອບຄົວ, ຈາກນັ້ນປະມານ 30 ນາທີ, ໄດ້ຍິນສຽງປືນແຕກດັງ 2 ນັດ ຢູ່ແຖວປ່າຊ້າບ້ານໂຕນໃຕ້ ເມືອງແປກ, ເຈົ້າໜ້າທີ່ຈຶ່ງເຂົ້າໄປໃນປ່າພົບເຫັນ ຜູ້ກ່ຽວນອນເສຍຊີວິດ.