ຖວທ ແຂວງຄໍາມ່ວນ ອອກແຈ້ງການ ຢຸດການອອກໃບອະນຸຍາດ ຮ້ານບັນເທີງ-ຄາລາໂອເກະ ທີ່ເຄື່ອນໄຫວບໍ່ຖືກຕ້ອງ
ອີງຕາມແຈ້ງການຂອງພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງຄຳມ່ວນ ລົງເມື່ອວັນທີ 12 ມິຖຸນາ 2025 ກ່ຽວກັບ ໃຫ້ຢຸດຕິການອອກໃບອະນຸຍາດ ຮ້ານບັນເທີງ-ຄາລາໂອເກະ ທີ່ເຄື່ອນໄຫວບໍ່ຖືກຕ້ອງເພື່ອເຮັດໃຫ້ການດໍາເນີນທຸລະກິດຂອງບຸກຄົນ, ນິຕິບຸກຄົນເຄື່ອນໃຫວຕາມລະບຽບ-ກົດຫມາຍ ຂອງການທ່ອງທ່ຽວຢ່າງຖືກຕ້ອງ.
ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງຄໍາມ່ວນ ຂໍຖືເປັນກຽດແຈ້ງມາຍັງທ່ານຊາບວ່າ: ເພື່ອເຮັດໃຫ້ການດໍາເນີນທຸລະກິດຂອງບຸກຄົນ, ນິຕິບຸກຄົນເຄື່ອນໃຫວຕາມລະບຽບ-ກົດຫມາຍ ຂອງການ ທ່ອງທ່ຽວຢ່າງຖືກຕ້ອງ, ສະນັ້ນ ໃຫ້ບັນດາທ່ານຫົວຫນ້າຫ້ອງການ ຖວທ ແລະ ຜູ້ປະກອບການທຸລະກິດບໍລິການດ້ານ ການທ່ອງທ່ຽວໃນທົ່ວແຂວງຄໍາມ່ວນ ຮັບຊາບກ່ຽວກັບການອານຸຍາດດໍາເນີນທຸລະກິດດ້ານ ຮ້ານອາຫານ, ຮ້ານກິນດື່ມ, ຮ້ານບັນເທິງ-ຄາລາໂອເກະ ດັ່ງນີ້:
1. ຖ້າບຸກຄົນ, ນິຕິບຸກຄົນ ມີຈຸດປະສົງດໍາເນີນທຸລະກິດດ້ານການບັນເທິງ ແມ່ນຕ້ອງປະຕິບັດຕາມດໍາລັດ 315/ລບ ວ່າ ດ້ວຍການບັນເທິງ ແລະ ຄໍາສັ່ງເລກທີ 02/ຈຂ ຂອງທ່ານເຈົ້າແຂວງຄໍາມ່ວນ ໂດຍບໍ່ໃຫ້ມີການກໍ່ສ້າງ ແລະ ເປີດ ບໍລິການກ່ອນອານຸຍາດຢ່າງເດັດຂາດ.
2. ກ່ອນອອກໃບອານຸຍາດໃຫ້ ຜູ້ປະກອບການທຸລະກິດບໍລິການ ດ້ານການທ່ອງທ່ຽວເຊັ່ນ: ເຮືອນພັກ, ຮ້ານອາຫານ, ສະຖານທີ່ບັນເທິງ ພາກສ່ວນກ່ຽວຂ້ອງຕ້ອງລົງກວດກາສະຖານທີ່, ກວດກາຊື່ຂອງກິດຈະການ, ກວດກາຕີລາຄາມູນ ຄ່າການລົງທຶນໃຫ້ຄັກແນ່ ເພື່ອໃຫ້ຖືກຕ້ອງ ແລະ ສອດຄ່ອງກັບລະບຽບການແບ່ງຂັ້ນຄຸ້ມຄອງ.
3. ໃຫ້ຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວເມືອງ ສົມທົບກັບເຈົ້າຫນ້ທີ່ກ່ຽວຂ້ອງລົງຕິດຕາມ, ກວດກາ ບັນດາຜູ້ປະກອບການວາມີຫົວຫນ່ວຍທຸລະກິດໃດ, ບຸກຄົນໃດ, ຮ້ານໃດທີ່ມີການກໍ່ສ້າງ ແລະ ເປີດກິດຈະ ການກ່ອນອານຸຍາດ, ຖ້າກວດກາພົບເຫັນ ການເຄື່ອນໃຫວດໍາເນີນທຸລະກິດກ່ອນການອານຸຍາດແມ່ນໃຫ້ສັ່ງໂຈະ ກິດຈະການໄວ້ກ່ອນ.
4. ການດໍາເນີນທຸລະກິດທີ່ບໍ່ປະຕິບັດຕາມລະບຽບ, ກົດຫມາຍເຊັ່ນ: ດໍາເນີນກິດຈະການບໍ່ໄປຕາມທະບຽນວິສາຫະກິດ ແລະ ໃບອານຸຍາດດໍາເນີນທຸລະກິດແມ່ນມອບໃຫ້ຫ້ອງການ ຖວທ ເມືອງຖອນໃບອານຸຍາດ ແລະ ສັ່ງປິດກິດຈະການພ້ອມທັງປະຕິບັດລະບຽບຕາມຄໍາສັ່ງ 02/ຈຂ ຢ່າງເຂັ້ມງວດ.