ຂົວມິດຕະພາບ ລາວ-ໄທ ເປັນສັນຍາລັກ ຮ່ວມສົ່ງເສີມການຄ້າ-ການລົງທຶນ-ການທ່ອງທ່ຽວ
ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ V ບໍລິຄຳໄຊ-ບຶງການ ແມ່ນໜຶ່ງໃນໂຄງ ການທີ່ເປັນສັນຍາລັກແຫ່ງການຮ່ວມມື ລະຫວ່າງ ສອງປະເທດ ລາວ-ໄທ ໃນການນໍາໃຊ້ທ່າແຮງ ທີ່ຕັ້ງຍຸດທະສາດອັນສໍາຄັນຂອງສອງປະເທດຮ່ວມກັນ ພາຍໃຕ້ອະນຸພາກພື້ນລຸ່ມແມ່ນໍ້າຂອງ ຫລື ອາຊີຕາ ເວັນອອກສ່ຽງໃຕ້ ເພື່ອໃຫ້ເກີດການເຊື່ອມໂຍງ-ເຊື່ອມຈອດ ທັງລະດັບພາກພື້ນ ແລະ ສາກົນ. ທັງຈະສ້າງເງື່ອນໄຂອໍານວຍຄວາມສະດວກ ໃຫ້ແກ່ການສົ່ງເສີມທາງດ້ານການຄ້າ-ການລົງທຶນ ແລະ ການ ທ່ອງທ່ຽວ ກໍຄືການຂົນສົ່ງສິນຄ້າ, ການໄປ-ມາຫາສູ່ເຊິ່ງກັນ ແລະ ກັນ ຂອງປະຊາຊົນສອງຊາດ ລາວ-ໄທ, ໄທ-ລາວ.
ທ່ານ ໄລທອງ ພົມມະວົງ ຫົວໜ້າໂຄງການກໍ່ສ້າງຂົວຂ້າມນໍ້າຂອງມິດຕະພາບ ລາວ-ໄທ ແຫ່ງທີ V ບໍລິຄໍາໄຊ-ບຶງການ ໄດ້ໃຫ້ສໍາພາດຕໍ່ສື່ມວນຊົນ ເມື່ອບໍ່ດົນນີ້ວ່າ: ມາຮອດປັດຈຸບັນ, ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ V ການກໍ່ສ້າງໂດຍລວມສໍາເລັດແລ້ວ 98,4%, ຄາດວ່າຈະເປີດນໍາໃຊ້ຂົວດັ່ງກ່າວ ຢ່າງເປັນທາງການ ໃນທ້າຍປີ 2025 ນີ້, ພ້ອມກັບການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລາວ-ໄທ ຄົບຮອບ 75 ປີ.
ຂົວມິດຕະພາບ ລາວ-ໄທ ແຫ່ງທີ V ມີຄວາມຍາວທັງໝົດ 1.350 ແມັດ, ເບື້ອງລາວ ມີລວງຍາວ 535 ແມັດ, ເບື້ອງໄທ 815 ແມັດ, ກວ້າງ 17,40 ແມັດ, ປະກອບມີ 4 ເລນ, ມີ 2 ຊ່ອງຈະລາຈອນ, ມີດອນກາງທາງ ແລະ ມີທາງຄົນຍ່າງສອງເບື້ອງ. ພ້ອມນີ້, ຂົວແຫ່ງນີ້ ຍັງເປັນຂົວເຊື່ອມຕໍ່ລະຫວ່າງ ໄທ-ລາວ-ສສ ຫວຽດນາມ ຕື່ມອີກ. ພາຍຫຼັງ ເປີດໃຊ້ຢ່າງເປັນທາງການ ຈະເຮັດໃຫ້ການໄປ-ມາຫາສູ່ ຂອງປະຊາຊົນ ສອງປະເທດ ລາວ-ໄທ-ຫວຽດນາມ ສະດວກສະບາຍຂຶ້ນກວ່າເກົ່າ ທັງຈະເຮັດໃຫ້ປະຊາຊົນເຂດດັ່ງກ່າວ ມີວຽກເຮັດງານທຳ ແລະ ອື່ນໆ.
ແຫຼ່ງຂ່າວ: ຂປລ