ຖ້ຽວບິນນະຄອນຫຼວງວຽງຈັນ-ຊຽງຂວາງ ເປີດບໍລິການຄືນໃໝ່ແລ້ວ ເລີ່ມ 1 ມິຖຸນາ 2025 ເປັນຕົ້ນໄປ.
ລັດວິສາຫະກິດການບິນລາວໄດ້ເປີດຖ້ຽວບິນລະຫວ່າງນະຄອນຫຼວງວຽງຈັນ ແລະ ແຂວງຊຽງຂວາງຄືນໃໝ່ ເລີ່ມແຕ່ວັນທີ 1 ມິຖຸນາເປັນຕົ້ນໄປດ້ວຍເຮືອບິນ ATR 72 ຈະບິນເສັ້ນທາງນີ້ 4 ຄັ້ງຕໍ່ອາທິດຄື: ວັນຈັນ, ວັນພຸດ, ວັນສຸກ ແລະ ວັນອາທິດ.
ຖ້ຽວບິນ QV401 ຈະອອກຈາກນະຄອນຫຼວງວຽງຈັນ ເວລາ 09:00 ໂມງ ຮອດສະໜາມບິນຊຽງຂວາງ ເວລາ 09:35 ໂມງ ແລະ ຖ້ຽວບິນ QV402 ຈະກັບຈາກແຂວງຊຽງຂວາງ ເວລາ 10:15 ໂມງຮອດນະຄອນຫຼວງວຽງຈັນ ເວລາ 10:50 ໂມງ.
ທ່ານ ວຽງໄຊ ສິງຄຳ ຜູ້ອໍານວຍການບໍລິສັດການບິນລາວ ກ່າວວ່າ: ຖ້ຽວບິນດັ່ງກ່າວເລີ່ມເປີດບໍລິການຄືນໃໝ່ ຫຼັງຈາກຖືກໂຈະຊົ່ວຄາວ, ລັດວິສາຫະກິດການບິນລາວ ໄດ້ມີການປັບປຸງການບໍລິການຕະຫຼອດມາ ຊຶ່ງໃນເດືອນເມສາທີ່ຜ່ານມາ, ລັດວິສາຫະກິດການບິນລາວໄດ້ເພີ່ມເຮືອບິນເຈັດ C909 ຂອງບໍລິສັດເຮືອບິນການຄ້າຂອງປະເທດຈີນເຂົ້າໃນການບໍລິການຂອງສາຍການບິນລາວ ເພື່ອຕອບສະໜອງຄວາມມຸ້ງໝາຍຂອງບໍລິສັດ ຕໍ່ການປັບປຸງການບໍລິການໃຫ້ຜູ້ໂດຍສານ ແລະ ເຊື່ອມຕໍ່ການບໍລິການ ການບິນກັບພາກພື້ນ.
ເຮືອບິນ C909 ໄດ້ນຳໃຊ້ໃນເສັ້ນທາງບິນທັງພາຍໃນ ແລະ ຕ່າງປະເທດ ປະກອບມີ 90 ບ່ອນນັ່ງຂອງຊັ້ນປະຢັດ, ການບິນລາວຍັງຄົງໃຫ້ຄຳໝັ້ນສັນຍາໃນການປັບປຸງການບໍລິການຂົນສົ່ງທາງອາກາດ, ເພີ່ມທະວີການເຊື່ອມຕໍ່ພາກພື້ນ, ຊຸກຍູ້ການຮ່ວມມືສາກົນເພື່ອຕອບສະໜອງຄວາມຕ້ອງການຂອງອຸດສາຫະກຳການບິນທີ່ນັບມື້ນັບເພີ່ມຂຶ້ນ.
ແຫຼ່ງຂ່າວ: ໜັງສືພິມປະຊາຊົນ