ຮັບຮອງສ້າງຕັ້ງຕາແສງທຳອິດ ຂອງນະຄອນຫຼວງວຽງຈັນ ຢູ່ເມືອງໄຊທານີ ຊື່ວ່າ “ຕາແສງຊ້າງມີໄຊ” ມີ 23 ບ້ານ
ໃນວາລະການດຳເນີນກອງປະຊຸມສະໄໝວິສາມັນ ເທື່ອທີ 1 ຂອງສະພາປະຊາຊົນນະຄອນຫຼວງວຽງຈັນ (ນວ) ຊຸດທີ IIໃນວັນທີ 22 ພຶດສະພານີ້ ທີ່ຫ້ອງວ່າການປົກຄອງ ນວ, ທ່ານ ພູວົງ ວົງຄຳຊາວ ຮອງເຈົ້າຄອງ ນວ ໄດ້ລາຍງານກ່ຽວກັບການຄົ້ນຄວ້າສ້າງຕັ້ງຕາແສງ (ທົດລອງ) ຢູ່ເມືອງໄຊທານີ ໃຫ້ຮູ້ວ່າ: ເມືອງໄຊທານີ ປະກອບມີ 104 ບ້ານ, ເມື່ອແບ່ງເປັນ 5 ຕາແສງກໍຈະຖືກຕາແສງໜຶ່ງ 20-24 ບ້ານ ຊຶ່ງກຳນົດເອົາ 23 ບ້ານຂອງ 4 ກຸ່ມບ້ານເຂດຝາກນໍ້າງື່ມອອກໄປເປັນຕາແສງໜຶ່ງ ເຫັນວ່າຖືກຕ້ອງສອດຄ່ອງກັບນິຕິກຳ ແລະ ຖືກຕ້ອງກັບສະພາບຄວາມເປັນຈິງ.
ສໍາລັບຕາແສງຈະສ້າງຕັ້ງທົດລອງນີ້ຊື່ວ່າ “ຕາແສງຊ້າງມີໄຊ” ມີເນື້ອທີ່ທັງໝົດ 358 ກິໂລຕາແມັດ ຫຼື 35,8 ເຮັກຕາ ປະກອບມີ 23 ບ້ານ (ຊຶ່ງແມ່ນບັນດາບ້ານເປົ້າໝາຍທີ່ຈະສ້າງເມືອງໃໝ່ໃນເມື່ອກ່ອນ) ຄື: ບ້ານໂພນໄຮຄໍາ, ໂພນໂຮງ, ຫາດກ້ຽງ, ຫາດພະອິນ, ໂພນຄໍ້, ນາກຸງ, ທົ່ງມັ່ງ, ຂຸດສາມບາດ, ຊຳບອນ, ດວງບຸດດີ, ນາແຖ, ທ່າດິນແດງເໜືອ, ທ່າດິນແດງໃຕ້, ເວີນແທ່ນ, ທ່າຈຳປາ, ຫົວຂົວ, ຫົວນາ, ນາຄັນທຸງ, ນາຄາຍ, ໂພນແພງ, ນາໂງມເກົ່າ, ນາໂງມໃໝ່ ແລະ ບ້ານນາຕານ, ມີພົນລະເມືອງທັງໝົດ 35,577 ຄົນ, ເປັນຍິງ 17,878 ຄົນ, ມີ 6,043 ຄອບຄົວ, ມີ 6,736 ຫຼັງຄາເຮືອນ, ມີ 474 ໜ່ວຍ.
ແຫຼ່ງຂ່າວ: ປະຊາຊົນ