ຕາມ​ຂ່າວ​ຕ່າງປະເທດ ຟິ​ລິບ​ປິນ ໄດ້​ກາຍເປັນ​ປະເທດ​ທີ 12 ໃນ​ຈຳນວນ​ປະເທດ ທີ່​ມີ​ຍອດ​ຈຳນວນ​ປະຊາກອນ​ຫຼາຍ​ກວ່າ 100 ລ້ານ​ຄົນ​ຂອງ​ໂລກ ຢ່າງ​ເປັນ​ທາງ​ການ.

ເພື່ອ​ລະນຶກ​ເຖິງ​ໂອກາດ​ທີ່​ສຳຄັນ​ນີ້ ທາງ​ການ​ຟິ​ລິບ​ປີນ ໄດ້​ຕົກລົງ​ວ່າ​ຈະ​ຄັດ​ເລືອກ​ເອົາ​ເດັກນ້ອຍ​ເກີດ​ໃໝ່​ໃນ​ເວລາ 0 ໂມງ 6 ນາທີ ຫຼື ຫຼັງ 6 ນາທີ ຂອງ​ວັນ​ທີ 27 ເດືອນ​ກໍລະກົດ 2014 ຈາກ​ແຫ່ງ​ຕ່າງໆ​ຂອງ​ປະເທດ​ນີ້​ທັງ​ໝົດ 100 ຄົນ ໃຫ້​ເປັນ​ພົນລະເມືອງ​ສັນຍະລັກ​ທີ່ 100 ລ້ານ​ຄົນ ເຊິ່ງ​ເດັກນ້ອຍ​ເກີດ​ໃໝ່​ແຕ່ລະຄົນ​ຈະ​ໄດ້​ຮັບ​ເຄື່ອງ​ທີ່​ລະນຶກ ທີ່​ມີ​ມູນ​ຄ່າ​ເຖິງ 5.000 ເປ​ໂຊ (ສະກຸນ​ເງິນ​ຟິ​ລິບ​ປິນ).

ເວົ້າ​ສຳລັບ ​ປະເທດ​ອາຊີ​ຕາເວັນ​ອອກ​ສ່ຽງ​ໃຕ້ ທີ່​ມີ​ເນື້ອທີ່ ​ທີ່​ດິນ​ບໍ່​ຫຼາຍ​ປານໃດ​ໃນ​ປະເທດ​ນີ້​ແລ້ວ ຈຳນວນ​ປະຊາກອນ 100 ລ້ານ​ຄົນ​ດັ່ງກ່າວ ອາດ​ຈະ​ນຳ​ເອົາ​ສິ່ງ​ທີ່​ດີ​ມາ​ໃຫ້​ແກ່​ປະເທດ​ຟິ​ລິບ​ປິນ ແຕ່​ພ້ອມ​ດຽວ​ກັນ​ນັ້ນ ກໍ່​ແມ່ນ​ສິ່ງ​ທີ່​ທ້າ​ທາຍ​ໃຫຍ່​ຫຼວງ​ເຊັ່ນ​ກັນ ສະນັ້ນ ອົງການ​ກອງ​ທຶນ​ປະຊາກອນ​ຂອງ​ສະຫະ​ປະຊາ​ຊາດ ໄດ້​ຂຽນ​ໃນ​ບົດ​ລາຍ​ງານ​ສະບັບ​ໜຶ່ງ ໂດຍ​ຊີ້​ອອກ​ວ່າ: ລັດຖະບານ​ຟີ​ລິບ​ປິນ ຄວນ​ສະໜອງ​ການ​ຊ່ວຍເຫຼືອ​ດ້ານ​ການ​ສຶກ​ສາ ການ​ປະກອບ​ອາຊີບ ລະດັບ​ຊີວິດ​ການ​ເປັນ​ຢູ່ ແລະ ອື່ນໆ ໃຫ້​ແກ່​ຊາວ​ໜຸ່ມ​ພາຍ​ໃນ​ປະເທດ ໃນ​ນັ້ນ ລວມ​ທັງ​ຄວາມ​ຮູ້​ດ້ານ​ການ​ຈະເລີນ​ພັນ​ທີ່​ຖືກຕ້ອງ.

ຂອບໃຈຂໍ້ມູນດີໆ ຈາກ: ໜັງສືພີມວຽງຈັນໃໝ່