ເຈົ້າໜ້າທີ່ກອງກວດກາປ່າໄມ້ ພົບເຫັນການລັກລອບຕັດໄມ້-ເລື່ອຍໄມ້ ຢູ່ເຂດເມືອງກາສີ
ຈົ້າໜ້າທີ່ກອງກວດກາປ່າໄມ້ ແຂວງວຽງຈັນ ໄດ້ລົງກວດກາພົບເຫັນການລັກລອບຕັດໄມ້, ເລື່ອຍໄມ້ຢູ່ເຂດປ່າປ້ອງກັນແຫ່ງຊາດແຫຼ່ງນ້ຳເຟືອງ ແລະ ປ່າຜະລິດແຫ່ງຊາດຫ້ວຍສຽດແຕ່ບໍ່ພົບເຫັນຜູ້ກະທຳຜິດ ຈຶ່ງໄດ້ຢຶດ, ອາຍັດໄມ້ໄວ້, ປັດຈຸບັນເຈົ້າໜ້າທີ່ກອງກວດກາປ່າໄມ້ແຂວງວຽງຈັນຍັງສືບຕໍ່ສົມທົບກັບພາກສ່ວນກ່ຽວຂ້ອງ ສືບສວນ-ສອບສວນ ຊອກຫາເປົ້າໝາຍຜູ້ກະທຳຜິດມາດຳເນີນຄະດີຕາມຂະບວນການຂອງກົດໝາຍ.
ອີງຕາມຂໍ້ມູນຈາກກອງກວດກາປ່າໄມ້ແຂວງວຽງຈັນໃຫ້ຮູ້ວ່າ: ໂດຍປະຕິບັດຕາມຄໍາສັ່ງ ວ່າດ້ວຍ ການເພີ່ມທະວີຄວາມເຂັ້ມງວດ ໃນການຄຸ້ມຄອງ, ປົກປັກຮັກສາພັດທະນາ ແລະ ນຳໃຊ້ຊັບພະຍາກອນປ່າໄມ້, ທີ່ດິນປ່າໄມ້ ພ້ອມທັງຕ້ານ, ສະກັດກັ້ນ ການບຸກລຸກທຳລາຍປ່າໄມ້, ທີ່ດິນປ່າໄມ້ ແລະ ໄຟໄໝ້ລາມປ່າ ກໍຄື ການເພີ່ມທະວີຄວາມເຂັ້ມງວດ ໃນການບັງຄັບໃຊ້ກົດໝາຍ ວ່າດ້ວຍປ່າໄມ້ໃຫ້ນັບມື້ມີຜົນສັກສິດຂຶ້ນເລື້ອຍໆ.
ເມື່ອບໍ່ດົນມານີ້, ເຈົ້າໜ້າທີ່ກອງກວດກາປ່າໄມ້ແຂວງວຽງຈັນ ແລະ ເຈົ້າໜ້າທີ່ຈາກກົມກວດກາປ່າໄມ້ກະຊວງກະສິກຳ ແລະ ປ່າໄມ້ ໄດ້ລົງປະສານສົມທົບກັບ ຫ້ອງການກະສິກຳ ແລະ ປ່າໄມ້ ເມືອງກາສີ ເພື່ອລົງກວດກາລາດຕະເວນສະກັດກັ້ນການລັກລອບບຸກລຸກທຳລາຍຊັບພະຍາກອນປ່າໄມ້, ການຕັດໄມ້, ເລື່ອຍໄມ້ ຢູ່ເຂດບ້ານຫ້ວຍພັນຫຼາ ເມືອງກາສີ ແຂວງວຽງຈັນ ຕາມຂໍ້ມູນແຫຼ່ງຂ່າວເປົ້າໝາຍລາຍງານຈາກຜູ້ຫວັງດີ ຈຶ່ງໄດ້ພ້ອມກັນລົງກວດກາຕາມຈຸດພິກັດ ຂໍ້ມູນເປົ້າໝາຍເຫັນວ່າການລັກລອບຕັດໄມ້, ເລື່ອຍໄມ້ດັ່ງກ່າວ ແມ່ນຢູ່ໃນເຂດຫວງຫ້າມ ປ່າປ້ອງກັນແຫ່ງຊາດແຫຼ່ງນ້ຳເຟືອງ ແລະ ປ່າຜະລິດແຫ່ງຊາດຫ້ວຍສຽດ ບ້ານຫ້ວຍພັນຫຼາ (ເຂດຫ້ວຍໄຄ້).
ເຈົ້າໜ້າທີ່ກອງກວດກາປ່າໄມ້ແຂວງວຽງຈັນໃຫ້ຮູ້ອີກວ່າ: ຜ່ານການລົງກວດກາໄດ້ພົບເຫັນການຕັດໄມ້ໜ້າຂຽງທ່ອນສັ້ນທ້ອນໂຮມໄວ້ຢູ່ປ່າມີ ຈຳນວນ 260 ທ່ອນສັ້ນ (ບ່ອມ) = 11.440 ແມັດກ້ອນ (ຊະນິດໄມ້ເຫຼັກ) ແລະ ໄມ້ທີ່ເລື່ອຍເປັນຕັບ/ແປຮູບ ຈຳນວນ 62 ຕັບ/ໂຕ = 4.990 ແມັດກ້ອນ (ຊະນິດໄມ້ຍົມຜາ ແລະ ໄມ້ກວາງແດງ) ແຕ່ບໍ່ພົບເຫັນຜູ້ກະທຳຜິດ ຈຶ່ງໄດ້ຢຶດ, ອາຍັດໄມ້ຈຳນວນດັ່ງກ່າວໄວ້ເພື່ອເປັນຫຼັກຖານ ປັດຈຸບັນທາງເຈົ້າໜ້າທີ່ກອງກວດກາປ່າໄມ້ແຂວງວຽງຈັນຍັງສືບຕໍ່ພົວພັນປະສານສົມທົບກັບອຳນາດການປົກເມືອງກາສີ ແລະ ພາກສ່ວນກ່ຽວຂ້ອງ ເພື່ອດຳເນີນການສືບສວນ-ສອບສວນ ຊອກຫາເປົ້າໝາຍຜູ້ກະທຳຜິດມາດຳເນີນຄະດີຕາມຂະບວນການຂອງກົດໝາຍ.
