ໜັງຮັກອິຫຼີເປັນໜັງຕະຫຼົກ ທີ່ເອົາເລື່ອງຕະຫຼົກໆ ຂອງຄູ່ຮັກມານຳສະເໜີ ປະສົມປະສານກັບຄວາມເຊື່ອແບບຕະຫຼົກໆ ແລ້ວຈັບເອົາໂຕລະຄອນທີ່ຕະຫຼົກໆ ມາສະແດງແບບຕະຫຼົກໆ ກໍເລີຍໄດ້ຮັບຄວາມນິຍົມຊົມຊອບ ຈາກຜູ້ມັກຮັກໃນການເບິ່ງໜັງ ຈົນສາມາດກວາດລາຍໄດ້ຈາກການ ເຂົ້າໂຮງສາຍຮູບເງົາພາຍໃນປະເທດ ຫຼາຍກວ່າຕື້ກີບ ຖືວ່າເປັນໜັງຂອງລາວເລື່ອງທຳອິດ ທີ່ມີລາຍຮັບຈາກການສາຍ ຫຼາຍຂະໜາດນີ້.
ແລະມາຮອດປັດຈຸບັນນີ້ຮູບເງົາ ເລື່ອງດັ່ງກ່າວນັ້ນໄດ້ຖືກປ້ຳໃສ່ແຜ່ນ ດີວີດີວາງຂາຍຕາມຮ້ານຂາຍແຜ່ນ ຊີດີທົ່ວປະເທດແລ້ວ ດ້ວຍລາຄາທີ່ຖືກແລະທຸກຄົນສາມາດຊື້ມາເບິ່ງໄດ້. ໃນຂະນະທີ່ຄະນະຜູ້ສ້າງໄດ້ບອກກັບ ນັກຂ່າວເຮົາວ່າ ຍ້ອນເຫັນວ່າປະຊາຊົນລາວ ມັກໜັງເລື່ອງນີ້ຫຼາຍ ກໍເລີຍອັດໃສ່ແຜ່ນຈຳໜ່າຍເພື່ອຫຼາຍຄົນທີ່ ບໍ່ທັນມີໂອກາດໄດ້ເບິ່ງ ໄດ້ຊອກຊື້ໄປເບິ່ງ.
ພ້ອມກັນນັ້ນ, ເຈ້ຍ ປາຊີຟິກ ພະເອກໜັງຮັກອິຫຼີຍັງແຍ້ມບອກ ນັກຂ່າວເຮົາວ່າກຳລັງຊິຖ່າຍທຳ ໜັງຮັກອິຫຼີພາກສອງ ເຊິ່ງຈະເລິ່ມລົງມືຖ່າຍຫຼັງຈາກສະຫຼອງ ປີໃໝ່ແລ້ວ ແລະຄາດວ່າຈະໄດ້ເຂົ້າໂຮງ ໃນໄລຍະເດືອນ ກໍລະກົດ 2015. ສ່ວນນັກສະແດງຍັງແມ່ນທີມເກົ່າ ແຕ່ຈະເພິ່ມໂຕລະຄອນເຂົ້າມາ, ເນື້ອໃນຈະເຂັ້ມຂຸ້ນກວ່າເກົ່າ, ມີຄວາມຕະຫຼົກເຮຮາຫຼາຍກວ່າເກົ່າ, ເປັນຕາຢ້ານຫຼາຍກວ່າເກົ່າ ແລະຊຶ້ງຫຼາຍກວ່າເກົ່າ ເພາະຫຼັງຈາກພາກໜຶ່ງອອກໄປ ເຮົາກໍໄດ້ປະສົບການ ຮູ້ວ່າສັງຄົມມັກແບບໃດ ໄດ້ບົດຮຽນຫຼາຍຂຶ້ນ ຈຶ່ງຝາກເຖິງແຟນໆ ວ່າ ຢ່າລືມຕິດຕາມ ຮັກອິຫຼີພາກສອງເດີ້ !!
