ຈັບຊາຍຊາວຈີນ ຫຶງໂຫດລົງມືຄາຕະກຳແຟນສາວ ຢູ່ທ່າແຂກ ແຂວງຄຳມ່ວນ ຍ້ອນຄິດວ່າແຟນສາວຈະເດີນທາງໄປຫາຜູ້ບ່າວ.
ເຈົ້າໜ້າທີ່ ປກສ ເເຂວງຄໍາມ່ວນ ລາຍງານວ່າ: ວັນທີ 8 ພຶດສະພາ 2025 ເຈົ້າໜ້າທີ່ໄດ້ນໍາຕົວ ທ້າວ ຫລາຍຫົງຟູ ອາຍຸ 39 ປີສັນຊາດ ເເລະ ເຊື້ອຊາດຈີນ ກຳມະກອນຢູ່ບໍລິສັດ ຢຸນໜານຈຽງໂຖ ພັກເຊົາຢູ່ບ້ານດົງໃຕ້ ເມືອງທ່າເເຂກ ເເຂວງຄໍາມ່ວນ ໄປຈໍາລອງເຫດການຄືນ ໃນຂໍ້ຫາກໍ່ເຫດຄາຕະກໍາ ນາງ ພິມມະສອນ ອາຍຸ 25 ປີ, ປະຊາຊົນຢູ່ບ້ານນາໂພທ່າ, ເມືອງທ່າແຂກ, ແຂວງຄຳມ່ວນ.
ເຫດເກີດເວລາປະມານ 07:00 ໂມງຂອງວັນທີ 22 ເມສາ 2025 ນາງພິມມະສອນໄປຖາມເອົາພາສປອດນຳທ້າວຫລາຍຫົງຟູເພື່ອຈະໄປໄທ ແຕ່ບໍ່ໄດ້ ພ້ອມຜິດຖຽງກັນເລື່ອງລະແວວ່ານາງພິມມະສອນຈະຂ້າມໄປຫາຜູ້ບ່າວ ທ້າວຫລາຍຫົງຟູ່ຈຶ່ງບີບຄໍນາງຈົນເສຍຊີວິດ ແລ້ວເອົາຕົວຫລົບໜີພ້ອມລົດກະບະວີໂກ້ຂອງນາງພິມມະສອນ.
ຈົນມາຮອດເວລາ 20:00 ໂມງ ຂອງວັນທີ 7 ພຶດສະພາ 2025 ເຈົ້າໜ້າທີ່ຈຶ່ງໄດ້ພົບເຫັນ ທ້າວຫຼາຍຫົງຟູ ( ຜູ້ກໍ່ເຫດຄາຕະກໍາ) ກໍາລັງກິນເຂົ້າຢູ່ຮ້ານອາຫານແຫ່ງໜຶ່ງຢູ່ບ້ານດົງໃຕ້ ເມືອງທ່າແຂກ ແຂວງຄໍາມ່ວນ ຈຶ່ງໄດ້ນໍາກໍາລັງເຂົ້າກັກຕົວຜູ້ກ່ຽວມາດໍາເນີນຄະດີຕາມກົດໝາຍ.