3 ເດືອນຕົ້ນປີ 2025 ແຂວງວຽງຈັນສາມາດດຶງດູດນັກທ່ອງທ່ຽວເຂົ້າມາທ່ຽວຊົມໄດ້ 902.057 ເທື່ອຄົນ
ແຫລ່ງຂ່າວຈາກ ແຂວງວຽງຈັນ ໃຫ້ຮູ້ວ່າ: ນັບແຕ່ເດືອນ ມັງກອນ ຫາ ເດືອນ ມີນາ 2025 ແຂວງວຽງຈັນ ສາມາດດຶງດູດນັກທ່ອງທ່ຽວເຂົ້າມາທ່ຽວຊົມໄດ້ 902.057 ເທື່ອຄົນ ໃນນີ້, ນັກທ່ອງທ່ຽວພາຍໃນ 416.232 ເທື່ອຄົນ, ນັກທ່ອງທ່ຽວຕ່າງປະເທດ 485.825 ເທື່ອຄົນ, ຈຸດທ່ອງທ່ຽວທີ່ເດັ່ນປະກອບມີອ່າງນ້ຳງື່ມ 1 ເມືອງແກ້ວອຸດົມ, ວັງວຽງ ແລະ ເມືອງເຟືອງສາມາດສ້າງລາຍຮັບທົ່ວສັງຄົມ ສະເລ່ຍ 754 ຕື້ກວ່າກີບ, ສິ່ງທີ່ໂດດເດັ່ນ ແລະ ນິຍົມຂອງນັກທ່ອງທ່ຽວແມ່ນກິດຈະກຳລອງເຮືອຕາມລຳແມ່ນ້ຳຊອງ, ຂີ່ສະລິງ, ບອນລູນ, ພາລາມໍເຕີ ທີ່ເມືອງວັງວຽງ, ເຮືອນແພນ້ຳລີກ ເມືອງເຟືອງ ແລະ ອ່າງນ້ຳງື່ມ 1 ເມືອງແກ້ວອຸດົມ.
ປັດຈຸບັນ ທົ່ວແຂວງວຽງຈັນ ມີຫົວໜ່ວຍທຸລະກິດທ່ອງທ່ຽວທີ່ໄດ້ຮັບການອອກອະນຸຍາດດໍາເນີນທຸລະກິດຖືກຕ້ອງຕາມລະບຽບກົດໝາຍ 1.053 ຫົວໜ່ວຍ ປະກອບມີ: ໂຮງແຮມ 61 ແຫ່ງ ມີ 2.129 ຫ້ອງ, ຣີສອດ 37 ແຫ່ງ ມີ 1.206 ຫ້ອງ, ເຮືອນພັກ 327 ແຫ່ງ ມີ 4.838 ຫ້ອງ, ຮ້ານອາຫານ, ຮ້ານກິນດື່ມ ບັນເທີງ 369 ຮ້ານ, ບໍລິສັດທ່ອງທ່ຽວ 39 ບໍລິສັດ ແລະ 3 ສາຂາ, ໜ່ວຍບໍລິການທ່ອງທ່ຽວ 71 ໜ່ວຍ, ແຫລ່ງທ່ອງທ່ຽວ 238 ແຫ່ງ, ເປີດບໍລິການແລ້ວ 62 ແຫ່ງ.
ພ້ອມນີ້, ຍັງໄດ້ປັບປຸງຄຸນນະພາບ ແລະ ມາດຕະຖານການບໍລິການທ່ອງທ່ຽວຂອງພາກທຸລະກິດພາຍໃນແຂວງ ເຊິ່ງສາມາດຍາດໄດ້ລາງວັນມາດຕະຖານການທ່ອງທ່ຽວອາຊຽນປະຈຳປີ 2024 ຈຳນວນ 6 ລາງວັນ, ຮັບຮອງເປັນໂຮງແຮມລະດັບ 5 ດາວ 1 ແຫ່ງ, 4 ດາວ 2 ແຫ່ງ ແລະ ຖືກຮັບຮອງຕາມມາດຕະຖານລາວເຊັບ 14 ຫົວໜ່ວຍ. ສຳລັບປີ 2025 ແຂວງວຽງຈັນ ໄດ້ວາງຄາດໝາຍດຶງດູດນັກທ່ອງທ່ຽວເຂົ້າມາທ່ຽວແຂວງ ບໍ່ໃຫ້ຫລຸດ 2 ລ້ານກວ່າຄົນ ແລະ ຄາດວ່າຈະສ້າງລາຍຮັບທົ່ວສັງຄົມບໍ່ຫລຸດ 1.820 ຕື້ກວ່າກີບ.
ສະເພາະປີ 2024 ທີ່ຜ່ານມາ ໄດ້ມີນັກທ່ອງທ່ຽວເຂົ້າມາທ່ຽວແຂວງວຽງຈັນ ທັງໝົດ 1.900.119 ເທື່ອຄົນ ຍິງ 865.533 ຄົນ ໃນນັ້ນ, ນັກທ່ອງທ່ຽວພາຍໃນ 1.259.780 ເທື່ອຄົນ, ສາມາດສ້າງລາຍຮັບທົ່ວສັງຄົມໄດ້ 1.372 ຕື້ກວ່າກີບ.
ແຫຼ່ງຂ່າວ: ແຂວງວຽງຈັນໂພສ໌