ແຈ້ງການໃຫ້ລະວັງຕົວ ຂອງກຸ່ມຄົນບໍ່ດີ ທີ່ຕົວະຍົວະຫຼອກລວງຜ່ານທາງສື່ສັງຄົມອອນລາຍ ໃຫ້ສະຫນອງຂໍ້ມູນສ່ວນຕົວ ເພື່ອສໍ້ໂກງເອົາເງິນໃນບັນຊີ
ທະນາຄານແຫ່ງ ສປປ ລາວ ອອກແຈ້ງການເຖິງພໍ່ແມ່ປະຊາຊົນ, ພໍ່ຄ້າຊາວຂາຍ, ພະນັກງານ ລັດຖະກອນ, ທະຫານ, ຕໍາຫຼວດ, ຕະຫຼອດຮອດຜູ້ ທີ່ຢູ່ອາໄສຢູ່ ສປປ ລາວ ໃນຂອບເຂດທົ່ວປະເທດ ກ່ຽວກັບໃຫ້ມີສະຕິລະວັງຕົວ ຕໍ່ການເຄື່ອນໄຫວຂອງກຸ່ມຄົນບໍ່ດີ ທີ່ຕົວະຍົວະຫຼອກລວງຜ່ານທາງສື່ສັງ ຄົມອອນລາຍໃຫ້ສະຫນອງຂໍ້ມູນສ່ວນຕົວ ເພື່ອສໍ້ໂກງເອົາເງິນໃນບັນຊີທະນາຄານຂອງລູກຄ້າ.
ຫ້ອງການ ທະນາຄານແຫ່ງ ສປປ ລາວ (ທຫລ) ຂໍຖືເປັນກຽດແຈ້ງມາຍັງທ່ານຊາບວ່າ ໃນໄລຍະຜ່ານມາກໍ່ຄືປັດຈຸ ບັນໄດ້ມີກຸ່ມຄົນບໍ່ດີ (ມິດສາຊີບ) ເຄື່ອນໄຫວຕົວະຍົວະຫຼອກລວງຜ່ານທາງສື່ສັງຄົມອອນລາຍຕ່າງໆ ດ້ວຍວິທີຊັກຊວນ ໃຫ້ເຂົ້າຮ່ວມກິດຈະກໍາຫຼິ້ນເກມເພື່ອຊິງໂຊກ, ແຈກເງິນ, ປ່ອຍສິນເຊື່ອອອນລາຍ ເຮັດໃຫ້ຜູ້ທີ່ຮູ້ເທົ່າບໍ່ເຖິງການເປັນເຫຍື່ອ ກົດລິ້ງ ແລະ ສະຫນອງຂໍ້ມູນສ່ວນຕົວທີ່ເປັນຄວາມລັບ ເຊັ່ນ: ຂໍ້ມູນຜູ້ໃຊ້ແອັບທະນາຄານ, ລະຫັດຜ່ານເຂົ້າລະບົບ, ລະຫັດ ຢັ້ງຢືນທຸລະກໍາ OTT (One Time Password ເປັນລະຫັດຕົວເລກທີ່ໃຊ້ເຂົ້າໃນການເຮັດທຸລະກໍາຄັ້ງດຽວສົ່ງເຂົ້າຜ່ານ SMI, ມືຖື ຫຼື ຜ່ານອີເມວ ເພື່ອຢັ້ງຢືນຄວາມເປັນເຈົ້າຂອງບັນຊີປ້ອງກັນຄວາມສ່ຽງດ້ານການເຮັດທຸລະກໍາທາງການເງິນ) ເພື່ອສໍ້ໂກງເອົາເງິນໃນບັນຊີທະນາຄານ ຊຶ່ງການເຄື່ອນໄຫວດັ່ງກ່າວອາດນໍາໄປສູ່ການສ້າງຄວາມເສຍຫາຍຕໍ່ຊັບສິນຂອງປະ ຊາຊົນໃນສັງຄົມ. ອີກຮູບການຫນຶ່ງແມ່ນການຂາຍສິນຄ້າໃນລາຄາທີ່ຖືກ ເພື່ອດຶງດູດຄົນເຂົ້າໄປຊື້, ຫຼັງຈາກໄດ້ຮັບເງິນແລ້ວ ກໍ່ຈະບລັອກ (block) ຫຼື ປິດການຕິດຕໍ່ ແລະ ບໍ່ສົ່ງສິນຄ້າມາໃຫ້ຜູ້ຊື້.
ສະນັ້ນ, ຫ້ອງການ ທຫລ ຈຶ່ງແຈ້ງມາຍັງ ພໍ່ແມ່ປະຊາຊົນ, ພໍ່ຄ້າຊາວຂາຍ, ພະນັກງານ-ລັດຖະກອນ, ທະຫານ, ຕໍາ ຫຼວດ, ຕະຫຼອດຮອດຜູ້ທີ່ອາໄສຢູ່ ສປປ ລາວ ໃນຂອບເຂດທົ່ວປະເທດ ຈົ່ງເພີ່ມທະວີຄວາມມີສະຕິລະວັງຕົວ, ບໍ່ຫຼົງເຊື່ອ ຕາມການເຄື່ອນໄຫວໂຄສະນາໃນລັກສະນະດັ່ງກ່າວ ແລະ ພິຈາລະນາຢ່າງຮອບຄອບໃນການກົດລິ້ງຕ່າງໆທີ່ບໍ່ຮູ້ແຫຼ່ງທີ່ມາ ຈະແຈ້ງ ລວມໄປເຖິງການສະຫນອງຂໍ້ມູນທີ່ສໍາຄັນ ແລະ ເປັນຄວາມລັບໃນການດໍາເນີນທຸລະກໍາທາງການເງິນ ເພື່ອຫຼີກ ລ້ຽງຄວາມເສຍຫາຍທີ່ຈະເກີດຂຶ້ນຕໍ່ຊັບສິນຂອງທ່ານ. ຖ້າຫາກພົບເຫັນຂໍ້ມູນ ຫຼື ການໂຄສະນາຊວນເຊື່ອໃດທີ່ຕ້ອງການ ສອບຖາມ, ສາມາດປະສານ ແລະ ຕິດຕໍ່ໄປຍັງທະນາຄານທຸລະກິດທີ່ທ່ານໃຊ້ບໍລິການໂດຍກົງ.
ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ເປັນຂໍ້ມູນ.