ຈັບກຸມໜຸ່ມໄທ 2 ຄົນ ທີ່ເຊື່ອງຢາເສບຕິດໄວ້ທີ່ລົດກະບະປ້າຍລາວ ພວມນຳຂ້າມໄປໄທທີ່ດ່ານໜອງຄາຍ! ມີຢາໄອ 120 ກິໂລກຣາມ, ມູນຄ່າ 36ລ້ານບາດ (ເກືອບ 23 ຕື້ກີບ) ເພື່ອຂ້າມໄປຝັ່ງໄທ.
ໃນວັນທີ 24 ມີນາ 2025 ເວລາປະມານ 21:00 ໂມງ ທີ່ຜ່ານມາ, ທີ່ດ່ານຂົວມິດຕະພາບໄທ-ລາວ ຈັງຫວັດໜອງຄາຍ, ທາງເຈົ້າໜ້າທີ່ໄທຫຼາຍໜ່ວຍງານ ໄດ້ຮ່ວມກັນຈັບກຸມ ທ້າວ ສົມໄຊ ມະໂນຮັກ ອາຍຸ 44 ປີ ສັນຊາດໄທ ແລະ ທ້າວ ນັດໄຊ ເຊື້ອສວນ ອາຍຸ 43 ປີ ສັນຊາດໄທ ພ້ອມຂອງກາງ ຢາໄອ ນ້ຳໜັກທັງໝົດ 120 ກິໂລກຣາມ ເຊື່ອງຢູ່ໃນລົດກະບະສີຂາວ 4 ປະຕູ ປ້າຍທະບຽນ ລນ 7333 ນະຄອນຫຼວງວຽງຈັນ.
ຈາກການສອບສວນ ຜູ້ຖືກຫາທັງສອງຮັບສາລະພາບວ່າ: ໄດ້ຮັບການວ່າຈ້າງຈາກຄົນໄທທີ່ຮູ້ຈັກກັນ ໃຫ້ຂັບລົດຈາກນະຄອນຫຼວງວຽງຈັນ ຂ້າມຂົວມິດຕະພາບເພື່ອໄປຝັ່ງໄທ ແລະ ໃຫ້ເອົາລົດໄປຈອດໄວ້ທີ່ໂຮງແຮມແຫ່ງໜຶ່ງໃນຈັງຫວັດໜອງຄາຍ ໂດຍໄດ້ຮັບຄ່າຈ້າງຄົນລະ 10,000 ບາດ, ແລະ ຍອມຮັບວ່າ ເຄີຍເຮັດມາແລ້ວ 2 ເທື່ອ.
ປັດຈຸບັນ, ທາງເຈົ້າໜ້າທີ່ໄດ້ຄຸມຕົວທັງ 2 ຄົນ ພ້ອມຂອງກາງສົ່ງຕໍ່ໃຫ້ ສພ.ໜອງຄາຍ ເພື່ອດຳເນີນຄະດີຕາມກົດໝາຍ.
ແຫຼ່ງຂ່າວ: CH5