ແຂວງຈຳປາສັກ ກວດກພົບສິນຄ້າແບບຫຼົບຫຼີກການເສຍພາສີອາກອນ
ຕົ້ນປີ 2025, ແຂວງຈຳປາສັກ ກວດກາພົບເຫັນການເຄື່ອນໄຫວດໍາເນີນກິດຈະການທີ່ບໍ່ຖືກຕາມລະບຽບການ, ນໍາເຂົ້າສິນຄ້າແບບຫຼົບຫຼີກການເສຍພາສີອາກອນ ຫຼື ສິນຄ້ານອກລະບົບ 4 ກໍລະນີ.
ທ່ານ ໄກທອງ ສຸວັນນາດີ ຮອງຫົວໜ້າຂະແໜງການຄ້າພາຍໃນ ພະແນກອຸດສາຫະກໍາ ແລະ ການຄ້າແຂວງຈຳປາສັກ ໃຫ້ສໍາພາດໃນວັນທີ 17 ມີນາ 2025 ນີ້ວ່າ: ໃນ 3 ເດືອນຕົ້ນປີ 2025, ເຈົ້າໜ້າທີ່ກວດກາການຄ້າພວກເຮົາ ໂດຍປະສານສົມທົບກັບເຈົ້າໜ້າທີ່ ແລະ ໜ່ວຍງານທີ່ກ່ຽວຂ້ອງ ໄດ້ເຄື່ອນໄຫວວຽກງານກວດກາສິນຄ້ານອກລະບົບ ຕາມສິດ ແລະ ໜ້າທີ່ຂອບເຂດທີ່ຕົນຮັບຜິດຊອບ ເປັນຕົ້ນແມ່ນກວດກາຕາມສາຍທາງ, ຕາມແຫຼ່ງຂ່າວ ແລະ ກວດກາປົກກະຕິ.
ເຊິ່ງຜ່ານການເຄື່ອນໄຫວກວດກາຕົວຈິງ ພົບເຫັນການເຄື່ອນໄຫວດໍາເນີນກິດຈະການທີ່ບໍ່ທັນຖືກຕາມລະບຽບການ ຫຼື ການລັກລອບນໍາເຂົ້າສິນຄ້າຫຼົບຫຼີກການເສຍພາສີອາກອນ ມີຈໍານວນ 4 ກໍລະນີ, ມູນຄ່າສິນຄ້າ 569.990.115 ກີບ, ເປັນເງິນປັບໃໝໄດ້ຮັບຕົວຈິງ 398.993.081 ກີບ ຄື: ປັບໃໝສິນຄ້າຂອງ ບໍລິສັດ ແຊັດທີໂອ ເອັກເພຣດ ສາຂາຈໍາປາສັກ ຈໍານວນ 12 ລາຍການ, ລວມມູນຄ່າສິນຄ້າເທົ່າກັບ 29.620.000 ກີບ, ມູນຄ່າປັບໃໝ 70% ເທົ່າກັບ 20.734.000 ກີບ.
ຮ່ວມກວດກາກັບເຈົ້າໜ້າທີ່ຕຳຫຼວດ ປກສ ແຂວງ ພະແນກປ້ອງກັນເສດທະກິດ, ໃນການກັກຍຶດລົດຂົນສົ່ງສິນຄ້າ ມາຈາກ ສສ ຫວຽດນາມ ຈຳນວນ 2 ຄັນ ຄື: ລົດເມໂດຍສານ ຍີ່ຫຍໍ້ຮຸນໄດ ເລກຈັກ 6118325, ເລກຖັງ 004332 ໝາຍເລກທະບຽນ ບກ 2778 ຈໍາປາສັກ, ສາມາດລວມມູນຄ່າປັບໃໝ 130.087.300 ກີບ; ລົດບັນທຸກ 12 ລໍ້, ຍີ່ຫຍໍ້ CHENGLONG, ໝາຍເລກທະບຽນ 74H003.66 ສາມາດລວມມູນ ຄ່າປັບໃໝ 241.031.781 ກີບ, ລວມມູນຄ່າປັບໃໝລົດ 2 ຄັນ ເທົ່າກັບ 371.119.170 ກີບ.
ປັບໃໝສິນຄ້າລັກລອບນໍາເຂົ້າ ປະເພດໝາກໄມ້ມາຈາກຕ່າງປະເທດ ທີ່ບັນທຸກໃສ່ລົດ 6 ລໍ້ ໝາຍເລກທະບຽນ ບກ 9559 ຈຳປາສັກ ຂອງນາງວຽງວິໄລ + ນາງພຸ້ຍ ຢູ່ບ້ານຫາງຄອນ ເມືອງໂຂງ ຈຳນວນ 3.400 ກິໂລກຣາມ, ມູນຄ່າສິນຄ້າ 10.200.000 ກີບ, ປັບໃໝ 70% ເທົ່າກັບ 7.140.000 ກີບ.
ນອກນີ້, ທ່ານຍັງກ່າວອີກວ່າ: ການປັບໃໝ ແມ່ນອີງຕາມຂໍ້ຕົກລົງຂອງລັດຖະມົນຕີກະຊວງອຸດສາຫະກຳ ແລະ ການຄ້າ ເລກທີ 0019/ອຄ, ລົງວັນທີ 8 ມັງກອນ 2025 ໝວດທີ 5, ມາດຕາທີ 20, ຂໍ້ ຄ.3 ກ່ຽວກັບການລັກລອບ ການນໍາເຂົ້າສິນຄ້າ ການຫຼົບຫຼີກພັນທະ ຫຼື ຄ່າທໍານຽມຕ່າງໆ ຫຼື ປະຕິບັດພັນທະ ຫຼື ຄ່າທໍານຽມບໍ່ເຕັມອັດຕາສ່ວນ ຈະຖືກປັບໃໝ 70% ຂອງມູນຄ່າສິນຄ້າເຄື່ອງຂອງ ແລະ ຕ້ອງປະຕິບັດພັນທະຕ່າງໆຢ່າງຄົບຖ້ວນຕາມລະບຽບກົດໝາຍ.
ແຫຼ່ງຂ່າວ: ຈຳປາໃໝ່