ລັດຖະບານຍີ່ປຸ່ນມອບທຶນ 11.3 ລ້ານໂດລາສະຫະລັດ ຊ່ວຍເຫຼືອ ໃນການຈັດຊື້ອຸປະກອນທີ່ຈໍາເປັນເພື່ອຮອງຮັບການຄວາມຕ້ອງການອັນຮີບດ່ວນ ແລະ ເພີ່ມສັກກະຍະພາບໃນການບັນເທົາໄພພິບັດໃນ ສປປ ລາວ.

ພິທີລົງນາມເອກະສານແລກປ່ຽນໃນໂຄງການພັດທະນາເສດຖະກິດ-ສັງຄົມ (ໂຄງການມອບອຸປະກອນສໍາລັບສ້ອມແປງຂົວ) ໄດ້ຖືກຈັດຂຶ້ນທີ່ກະຊວງການຕ່າງປະເທດລາວ ໃນ 6 ມີນາ 2025 ຜ່ານມາ, ໂດຍໃຫ້ກຽດລົງນາມລະຫວ່າງ ພະນະທ່ານ ໂຄອິຊຶມິ ຊຶໂຕະມຸ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ພະນະທ່ານ ພົງສະຫວັນ ສີສຸລາດ, ຮອງລັດຖະມົນຕີກະຊວງການຕ່າງປະເທດລາວ.

ໃນປີ 2024 ປະເທດລາວໄດ້ປະເຊີນກັບໜຶ່ງໃນໄພພິບັດທໍາມະຊາດຂະໜາດໃຫຍ່ທີ່ສຸດໃນປະຫວັດສາດລາວ ເຊິ່ງກໍ່ຄືພາຍຸໄຕ້ຝຸ່ນ Yagi. ພາຍຸດັ່ງກ່າວ ໄດ້ສ້າງຄວາມເສຍອັນໜັກໜ່ວງໃຫ້ແກ່ພື້ນຖານໂຄງລ່າງເຊັ່ນ: ຖະໜົນຫົນທາງ, ຂົວ ແລະ ການຂົນສົ່ງສາທາລະນະທີ່ຈໍາເປັນ. ດັ່ງນັ້ນ ລັດຖະບານຍີ່ປຸ່ນ ຈິ່ງໄດ້ໃຫ້ການສະໜັບສະໜຸນເປັນມູນຄ່າ 1,707ລ້ານເຢັນ (ໜຶ່ງພັນເຈັດຮ້ອຍ ເຈັດລ້ານເຢັນ ຫຼື ປະມານ 11.3 ລ້ານໂດລາສະຫະລັດ) ໃນການຈັດຊື້ອຸປະກອນທີ່ຈໍາເປັນເພື່ອຮອງຮັບການຄວາມຕ້ອງການອັນຮີບດ່ວນ ແລະ ເພີ່ມສັກກະຍະພາບໃນການບັນເທົາໄພພິບັດໃນ ສປປ ລາວ.

ລາຍການເຄື່ອງກົນຈັກທີ່ໄດ້ຮັບການຊ່ວຍເຫຼືອໃນຄັ້ງນີ້ປະກອບມີວັດສະດຸສ້ອມແປງຂົວເຊັ່ນ: ຄານຂົວທີ່ເປັນເຫຼັກ, ອຸປະກອນປ້ອງກັນໄພພິບັດ, ລົດເຄຼນ, ລົດຈົກໜ້າຍາວພິເສດ, ທີ່ພັກສຸກເສີນ ແລະ ອື່ນໆ.

ເພື່ອເປັນການສະໜັບສະໜຸນການພັດທະນາເສດຖະກິດ ແລະ ສັງຄົມຂອງປະເທດລາວແບບຍືນຍົງ, ປະເທດຍີ່ປຸ່ນໃຫ້ການຊ່ວຍເຫຼືອໃນການປັບປຸງ ພື້ນຖານໂຄງລ່າງທີ່ມີຄຸນນະພາບສູງຢູ່ທົ່ວປະເທດລາວຕະຫຼອດມາ ເຊັ່ນ: ຂົວຂ້າມແມ່ນໍ້າຂອງແຫ່ງທີ 2, ຂົວປາກເຊ, ປັບປຸງເສັ້ນທາງ ເລກ 9 ແລະ ເສັ້ນທາງເລກ 1 ຂອງນະຄອນຫຼວງວຽງຈັນ.

ການຊ່ວຍເຫຼືອໃນຄັ້ງນີ້ແມ່ນຈະຊ່ວຍຮັບປະກັນຄວາມສະດວກສະບາຍ ແລະ ຄວາມປອດໄພຂອງປະຊາຊົນໃນຂົງເຂດນັ້ນ, ຍົກລະດັບເສັ້ນທາງການຂົນສົ່ງທີ່ແມ່ນແກນຫຼັກຂອງການພັດທະນາ ເສດຖະກິດ, ອຸດສາຫະກໍາ ແລະ ການຄ້າ ຂອງປະເທດລາວ, ພ້ອມທັງແມ່ນການຊຸກຍູ້ເປົ້າໝາຍຂອງ ລັດຖະບານລາວທີ່ວ່າດ້ວຍການຫັນຈາກປະເທດ Land-Locked ໄປເປັນປະເທດ Land-Linked.

ສາຍພົວພັນ ຍີ່ປຸ່ນ-ລາວ ສືບຕໍ່ພັດທະນາ ແລະ ເຂັ້ມແຂງຕະຫຼອດມາ ແລະ ໃນປີນີ້ເອງ ທັງສອງປະເທດກໍ່ໄດ້ຍົກລະດັບສາຍພົວພັນມາເປັນ “ຄູ່ຮ່ວມຍຸດທະສາດຮອບດ້ານ”.

ສາຍພົວພັນ ຍີ່ປຸ່ນ-ລາວ ສືບຕໍ່ພັດທະນາ ແລະ ເຂັ້ມແຂງຕະຫຼອດມາ ແລະ ໃນປີນີ້ເອງ ທັງສອງປະເທດກໍ່ໄດ້ຍົກລະດັບສາຍພົວພັນມາເປັນ “ຄູ່ຮ່ວມຍຸດທະສາດຮອບດ້ານ”.