ກຽມໃຊ້ນ້ຳປະປາກັນຢ່າງປະຢັດ ໃນຊ່ວງໄລຍະລະດູແລ້ງ 2025
ລັດວິສາຫະກິດ ນໍ້າປະປານະຄອນຫຼວງວຽງຈັນ ຂໍຖືເປັນກຽດຢ່າງສູງ ແຈ້ງມາຍັງທ່ານຊາບວ່າ: ຄວາມຕ້ອງການຊົມໃຊ້ນໍ້າປະປາໃນຊ່ວງລະດູແລ້ງແມ່ນມີອັດຕາສູງກ່ອນໃສ່ຊ່ວງລະດູຝົນ; ກໍາລັງການຜະລິດຂອງ ໂຮງງານນໍ້າປະປາ ສາມາດຜະລິດໄດ້ສູງສຸດ 348.000 ແມັດກ້ອນຕໍ່ວັນ ຖ້າທຽບໃສ່ຄວາມຕ້ອງການຕົວຈິງ 520.000 ແມັດກ້ອນຕໍ່ວັນ ເຊິ່ງເຫັນວ່ານໍ້າບໍ່ພຽງພໍ 172.000 ແມັດກ້ອນຕໍ່ວັນ.
ສະນັ້ນ, ເພື່ອເຮັດໃຫ້ການ ຊົມໃຊ້ນໍ້າປະປາ ມີລັກສະນະທົ່ວເຖິງ, ລັດວິສາຫະກິດນໍ້າປະປາ ນະຄອນຫຼວງວຽງຈັນ ຈຶ່ງຂໍຮຽກຮ້ອງມາຍັງ ທ່ານ ຂໍໃຫ້ຊົມໃຊ້ນໍ້າປະປາຢ່າງປະຢັດ,ໂຕ່ງນໍ້າໄວ້ ແລະ ໃຊ້ນໍ້າປະປາໃຫ້ເກີດປະໂຫຍດສູງສຸດ ແລະ ຫຼີກລ້ຽງ ບໍ່ໃຫ້ໃຊ້ນໍ້າປະປາຢ່າງສະຊາຍ ເຊັ່ນ: ບໍ່ໃຫ້ປ່ອຍນໍ້າຖິ້ມ, ບໍ່ໃຫ້ເອົານໍ້າປະປາໄປຫົດສວນ, ຫົດທາງ, ໃຊ້ມ່າຊາຍ ສໍາລັບການກໍ່ສ້າງ.
ພ້ອມກັນນັ້ນ, ກໍຂໍການຮ່ວມມືມາຍັງທ່ານ ເມື່ອພົບເຫັນທໍ່ນໍ້າປະປາແຕກຮົ່ວ ໃຫ້ແຈ້ງມາຍັງ ສາຍດ່ວນ 1169 ແລະ ເບີໂທ 020 5991 8830, 020 2998 6580 ເພື່ອຈະໄດ້ໄປສ້ອມແປງໃຫ້ທວງ ທັນຕາມເວລາທີ່ກໍານົດໄວ້.
ດັ່ງນັ້ນ ຈຶ່ງແຈ້ງມາຍັງທ່ານເພື່ອຮັບຊາບ ແລະ ຂໍການຮ່ວມມືດ້ວຍ.