ທຫລ ປະກາດໃຊ້ ຂໍ້ຕົກລົງວ່າດ້ວຍການ ຄຸ້ມຄອງບັນຊີເງິນຝາກເງິນຕາຕ່າງປະເທດຢູ່ ລາວ
ໃນວັນທີ 26 ກຸມພາ 2025 ນີ້, ທ່ານ ອາລຸນ ບຸນຍົງ ຮອງຜູ້ວ່າການ ທະນາຄານແຫ່ງ ສປປ ລາວ (ທຫລ) ໄດ້ຖະແຫລງຂ່າວປະກາດໃຊ້ ຂໍ້ຕົກລົງວ່າດ້ວຍການຄຸ້ມຄອງບັນຊີເງິນຝາກເງິນຕາຕ່າງປະເທດຢູ່ ສປປ ລາວ ສະບັບເລກທີ 155/ທຫລ ເຊິ່ງໄດ້ປະກາດ ໃນວັນທີ 19 ກຸມພາ 2025 ຜ່ານມາ ໂດຍຈະມີຜົນສັກສິດ ແລະ ເລີ່ມຈັດຕັ້ງປະຕິບັດນັບແຕ່ວັນທີ 5 ເມສາ 2025 ເປັນຕົ້ນໄປ.
ຂໍ້ຕົກລົງສະບັບດັ່ງກ່າວ, ມີຈຸດປະສົງເປັນການສົ່ງເສີມຜູ້ທີ່ມີເງິນຕາຕ່າງປະເທດ ຖືຄອງໃນຮູບແບບເງິນສົດໃຫ້ນໍາເງິນຕາຕ່າງປະເທດໄປຝາກໄວ້ ນໍາທະນາຄານທຸລະກິດ ແລະ ເປັນການປັບປຸງລະບົບ ການຊຳລະພາຍໃນປະເທດໃນຮູບແບບເອເລັກໂຕຣນິກ ທີ່ເປັນເງິນຕາຕ່າງປະເທດ ໃຫ້ມີຂອບເຂດຈະແຈ້ງ, ມີກົນໄກການຢັ້ງຢືນທຸລະກໍາຖືກຕ້ອງຕາມຈຸດປະສົງ ຂອງການຊຳລະທີ່ແທ້ຈິງ ເຮັດໃຫ້ການເຄື່ອນໄຫວເງິນຕາຕ່າງປະເທດ ຜ່ານລະບົບທະ ນາຄານ ເຊິ່ງບໍ່ໄດ້ຈຳກັດ ສິດໃນການເປີດ ແລະ ນໍາໃຊ້ບັນຊີເງິນຝາກເງິນຕາຕ່າງປະເທດ ແຕ່ຢ່າງໃດ. ບຸກຄົນ, ນິຕິບຸກຄົນ ແລະ ການຈັດຕັ້ງ ທັງພາຍໃນ ແລະ ຕ່າງປະເທດ ຢູ່ ສປປ ລາວ ຍັງສາມາດຄອບຄອງເງິນຕາຕ່າງປະເທດໃນບັນຊີເງິນຝາກໂດຍບໍ່ຈໍາກັດຈໍານວນ, ສາມາດ ຝາກ, ຖອນເງິນ ໄດ້ຕາມປົກກະຕິ ຄືທີ່ຜ່ານມາ ແລະ ສາມາດໂອນເງິນຕາຕ່າງປະເທດຢູ່ພາຍໃນ ສປປ ລາວ ໄດ້ ໂດຍບໍ່ຈຳກັດຈໍານວນ.
ເນື້ອໃນສໍາຄັນຂອງຂໍ້ຕົກລົງສະບັບດັ່ງກ່າວ, ແມ່ນໄດ້ກຳນົດຫລັກການ, ລະບຽບການ ແລະ ມາດຕະການ ໃນການເປີດ ແລະ ນໍາໃຊ້ບັນຊີເງິນຝາກເງິນຕາຕ່າງປະເທດຢູ່ ສປປ ລາວ ມີຜົນບັງຄັບໃຊ້ສໍາລັບ ຜູ້ມີ ແລະ ຜູ້ກຳລັງຈະມີບັນຊີເງິນຝາກເງິນຕາຕ່າງປະເທດຢູ່ ສປປ ລາວ ເຊິ່ງຂໍ້ຕົກລົງດັ່ງກ່າວ, ບໍ່ໄດ້ນໍາໃຊ້ກັບບັນຊີເງິນຝາກກ່ຽວກັບການນໍາເຂົ້າ-ສົ່ງອອກ ແລະ ການລົງທຶນ, ໝາຍຄວາມວ່າການດໍາເນີນທຸລະກຳກັບຕ່າງປະເທດ ເປັນຕົ້ນ ຊຳລະສິນຄ້ານໍາເຂົ້າ, ເງິນລົງທຶນຕ່າງປະເທດ ແມ່ນສາມາດເຄື່ອນໄຫວທຸລະກຳໄດ້ປົກກະຕິ ຄືດັ່ງທີ່ຜ່ານມາ ຕາມລະບຽບການກ່ຽວຂ້ອງ. ພ້ອມທັງໄດ້ກຳນົດເງື່ອນໄຂໃໝ່ ເປັນຕົ້ນ ຜູ້ທີ່ຈະເປີດບັນຊີເງິນຝາກເງິນຕາຕ່າງປະເທດ ຕ້ອງເປັນຜູ້ທີ່ມີເງິນຕາຕ່າງປະເທດໄວ້ໃນການຄອບຄອງ ຫລື ມີແຫລ່ງລາຍຮັບເປັນເງິນຕາຕ່າງປະເທດ; ການໂອນເງິນຕາຕ່າງປະ ເທດລະຫວ່າງບັນຊີເງິນຝາກ ແມ່ນບໍ່ໄດ້ຈຳກັດຈຳນວນ ເຊິ່ງການໂອນເງິນຕາຕ່າງປະເທດ ລະຫວ່າງບັນຊີເງິນຝາກທີ່ອອກຊື່ບັນຊີຕ່າງກັນ ຈະມີຄ່າທໍານຽມການໂອນເງິນ ຈາກທະນາຄານທຸລະກິດ ຕົ້ນທາງ 0,5% ຂອງມູນຄ່າທຸລະກຳ ໂດຍກຳນົດຄ່າທໍານຽມ ຕໍ່າສຸດບໍ່ຫລຸດ 1 ໂດລາສະຫະລັດ ຫລື ທຽບເທົ່າ ແລະ ສູງສຸດບໍ່ເກີນ 50 ໂດລາສະຫະລັດ ຫລື ທຽບເທົ່າ ຕໍ່ໜຶ່ງທຸລະກຳ.