ຄິມແຊຮົນ ນັກສະແດງຍິງຊາວເກົາຫຼີໃຕ້ ອາຍຸ 24 ປີ ຖືກພົບເສຍຊີວິດທີ່ບ້ານພັກຂອງຕົນເອງ ໃນກຸງໂຊ ເມື່ອວັນອາທິດທີ 17 ກຸມພາ 2025 ທີ່ຜ່ານມາ. ໂດຍເຫດການນີ້ ເກີດຂຶ້ນເກືອບ 2 ປີ ຫຼັງຈາກທີ່ລາວຫາຍໄປຈາກສາທາລະນະຊົນ ເນື່ອງຈາກຄະດີຂັບລົດຂະນະມຶນເມົາ.
ຕາມການລາຍງານຂອງຕຳຫຼວດ ສົບຂອງຄິມແຊຣົນ ຖືກພົບໂດຍໝູ່ຂອງລາວ ແລະບໍ່ມີສັນຍານຂອງການທຳຮ້າຍຮ່າງກາຍ, ແນວໃດກໍຕາມ ເຈົ້າໜ້າທີ່ກຳລັງຢູ່ລະຫວ່າງການສືບສວນຫາສາເຫດຕໍ່ໄປ.
ຄິມແຊຣົນ ເລີ່ມຕົ້ນເສັ້ນທາງການເປັນນັກສະແດງຕັ້ງແຕ່ຍັງນ້ອຍ ແລະໄດ້ຮັບການຍອມຮັບຢ່າງກວ້າງຂວາງ ໂດຍສະເພາະບົດບາດໃນຮູບເງົາເລື່ອງ ‘A Brand New Life (2009)’ ທີ່ເຄີຍຖືກສາຍໃນເທສະການໜັງເມືອງຄານ. ນອກຈາກນີ້ ລາວຍັງມີຜົນງານເດັ່ນອື່ນໆອີກ ເຊັ່ນ: The Man From Nowhere (2010), The Neighbors (2012) ແລະ A Girl at My Door (2014) ລວມເຖິງຜົນງານທາງໂທລະພາບອີກຫຼາຍລາຍການ.
ເຫດການນີ້ ໄດ້ຕອກຢ້ຳເຖິງປັນຫາສຸຂະພາບຈິດ ແລະແຮງກົດດັນໃນອຸດສາຫະກຳບັນເທີງເກົາຫຼີໃຕ້. ໂດຍກ່ອນໜ້ານີ້ ມີສິລະປິນຫຼາຍຄົນເສຍຊີວິດໃນລັກສະນະດຽວກັນ ເຊັ່ນ: ຊົງແຈລິມ ອະດີດນາຍແບບແລະນັກສະແດງ ທີ່ເສຍຊີວິດໃນໄວ 39 ປີ, ມຸນບິນ ສະມາຊິກວົງ ASTRO ທີ່ເສຍຊີວິດໃນໄວ 25 ປີເມື່ອປີທີ່ແລ້ວ, ຊອລລີ່ ອະດີດສະມາຊິກວົງ F(X) ເສຍຊີວິດໃນປີ 2019 ໃນໄວ 25 ປີ ແລະ ຄິມຈົງຮຢອນ ສະມາຊິກວົງ Shinee ຈາກໄປໃນປີ 2017 ໃນໄວ 27 ປີ.
ເຖິງແມ່ນວ່າຄ່າຍບັນເທີງໃນເກົາຫຼີໃຕ້ ຈະພະຍາຍາມປັບປຸງລະບົບສະໜັບສະໜຸນສຸຂະພາບຈິດໃຫ້ກັບສິລະປິນ ລວມເຖິງໃຫ້ຄຳປຶກສາ ແລະຈັດການຕາຕະລາງທີ່ຍືດຍຸ່ນຫຼາຍຂຶ້ນ. ແຕ່ຜູ້ຊ່ຽວຊານລະບຸວ່າ ສະພາບການແຂ່ງຂັນທີ່ສູງ, ຄວາມຄາດຫວັງຈາກສັງຄົມ ແລະແຮງກົດດັນຕໍ່ພາບລັກແລະພຶດຕິກຳຂອງສິລະປິນ ຍັງຄົງສົ່ງຜົນກະທົບຕໍ່ສຸຂະພາບຈິດຂອງພວກເຂົາ.
ທີ່ມາ: CNN