2 ສະມາຄົນສື່ມວນຊົນ ລາວ-ໄທ ຮ່ວມປະຊຸມປະຫວັດສາດ ສະຫຼອງ 75 ປີ ຄວາມສຳພັນການທູດ
ເມື່ອວັນທີ 7 ກຸມພາ 2025 ທີ່ຜ່ານມາ, ສະມາຄົມນັກຂ່າວ ແຫ່ງປະເທດໄທ ນຳໂດຍ ທ່ານ ນາງ ນ.ຣິນີ ເຣືອງໜູ ປະທານສະມາຄົມນັກຂ່າວ ແຫ່ງປະເທດໄທ (TJA) ພ້ອມກົມບໍລິຫາສະມາຄົມ ໃຫ້ການຕ້ອນຮັບ ແລະຈັດປະຊຸມຮ່ວມກັບ ສະມາຄົມນັກຂ່າວແຫ່ງ ສປປ ລາວ (LJA) ນຳໂດຍ ທ່ານ ສະຫວັນຄອນ ຣາຊະມົນຕີ ປະທານສະມາຄົມນັກຂ່າວແຫ່ງ ສປປ ລາວ.
ໂດຍທັງສອງສະມາຄົມໄດ້ມີການຫາລືແລກປ່ຽນຄວາມຄິດເຫັນ ເຖິງສະຖານະການສື່ ພ້ອມກັບເຫັນກົງກັນໃນການປັບປຸງບົດບັນທຶກຄວາມເຂົ້າໃຈ ຫຼື MOU ໃຫ້ສອດຄ່ອງກັບຍຸກສະໄໝຫຼາຍຂຶ້ນ ໂດຍຈະເພີ່ມບໍລິບົດໃນການປ້ອງກັນການແກ້ໄຂປັນຫາ Fake News, ການຮັບມືກັບຂ່າວສານໃນຍຸກປັນຍາປະດິດ (AI), ການມີສ່ວນຮ່ວມໃນການແກ້ໄຂໄພຈາກການຖືກຕົວະທາງອອນລາຍ ແລະ ເພີ່ມກິດຈະກຳຍົກລະດັບວິຊາຊີບ ເພື່ອລົງນາມ MOU ສະບັບໃໝ່ຕໍ່ໄປໃນອະນາຄົດນີ້.
ຫຼັງຈາກນັ້ນ ສະມາຄົມນັກຂ່າວ ແຫ່ງປະເທດໄທ ໄດ້ຈັດສຳມະນາວິຊາການ “ບົດບາດສື່ມວນຊົນ ໃນໂອກາດ 75 ປີ ຂອງການສະຖາປະນາຄວາມສຳພັນທາງການທູດ ລາວ-ໄທ” ໂດຍມີຜູ້ແທນອົງກອນສື່ມວນຊົນໃນປະເທດໄທຮ່ວມສຳມະນາ ເຊັ່ນ: ສະພາການສື່ມວນຊົນແຫ່ງຊາດ, ສະມາຄົມຜູ້ຜະລິດຂ່າວອອນລາຍ ແລະ ສະຖາບັນອິສຣາ ລວມທັງຜູ້ແທນຈາກຂໍ້ມູນຂ່າວສານ, ກະຊວງການຕ່າງປະເທດ.
ທ່ານ ປານິດົນ ປັດສິມສະຫວັດ ຮອງຫົວໜ້າກົມຂໍ້ມູນຂ່າວສານ ກ່າວໃນການສຳມະນາວ່າ: “ປີນີ້ໄທມີກິດຈະກຳສຳຄັນຫຼາກຫຼາຍ ນອກຈາກການສະເຫຼີມສະຫຼອງຄວາມສຳພັນທາງການທູດ ໄທ-ລາວ ຄົບຮອບ 75 ປີແລ້ວ, ເຮົາຍັງຈະເປັນເຈົ້າພາບຈັດການປະຊຸມຜູ້ນຳແມ່ຂອງ ລະຫວ່າງວັນທີ 2 – 4 ເມສາ ແລະ ປະຊຸມ ACMECS ເຊິ່ງສື່ມວນຊົນ ຖືເປັນຫຸ້ນສ່ວນສຳຄັນຂອງພາກລັດ ໃນການຂັບເຄື່ອນຄວາມຮ່ວມມືລະຫວ່າງປະເທດ ໂດຍສະເພາະໃນຂອບເຂດອາຊຽນ ເຊິ່ງບໍ່ພຽງແຕ່ກັບ ສປປ ລາວ ແຕ່ລວມເຖິງປະເທດເພື່ອນບ້ານອື່ນໆ ເຊັ່ນ: ກຳປູເຈຍ ແລະຫວຽດນາມ”
ພ້ອມກັບເນັ້ນຢ້ຳເຖິງຄວາມທ້າທາຍໃນຍຸກດິຈິຕໍ ໂດຍສະເພາະເລື່ອງເຕັກໂນໂລຊີ, ສື່ສັງຄົມອອນລາຍ ແລະ AI ເຊິ່ງປຽບເໝືອນດາບສອງຄົມ ມີທັງຄຸນປະໂຫຍດ ແລະ ໂທດ, ສື່ມວນຊົນຈຶ່ງຕ້ອງມີບົດບາດສຳຄັນໃນການໃຫ້ຂໍ້ມູນທີ່ເປັນປະໂຫຍດແກ່ປະຊາຊົນ.