ໃນປີ 2024 ຜ່ານມາ ມີຄົນເສຍຊີວິດຈາກອັກຄີໄພ ໆັງໝົດ 168 ຄັ້ງ ແລະ ເສຍຊີວິດເຖິງ 9 ຄົນ.
ອີງຕາມຂໍ້ມູນຈາກກົມຕໍາຫຼວດສະກັດກັ້ນ ແລະ ຕ້ານອັກຄີໄພ, ກົມໃຫຍ່ຕໍາຫຼວດ, ກະຊວງປ້ອງກັນຄວາມສະຫງົບ ໄດ້ລາຍງານ ວ່າ: ໃນປີ 2024 ຜ່ານມານີ້, ທົ່ວປະເທດ ມີອັກຄີໄພເກີດຂຶ້ນທັງໝົດ 198 ຄັ້ງ ຊຶ່ງເຮັດໃຫ້ມີຜູ້ເສຍຊີວິດ 9 ຄົນ ແລະ ບາດເຈັບ 9 ຄົນ, ເຮືອນຖືກໄຟໄໝ້ 166 ຫຼັງ, ສາງເກັບມ້ຽນເຄື່ອງ 6 ຫຼັງ, ໂຮງເລື່ອຍ 3 ຫຼັງ, ລົດ 16 ຄັນ ແລະ ອື່ນໆ ລວມມູນຄ່າເສຍຫາຍ 158 ຕື້ກວ່າກີບ; ນອກຈາກນັ້ນ ຍັງມີຈໍານວນໜຶ່ງ ບໍ່ສາມາດປະເມີນມູນຄ່າໄດ້ ນີ້ຖືເປັນຕົວເລກສະຖິຕິທີ່ສູງ ແລະ ຍັງບໍ່ມີທ່າອ່ຽງຈະຫຼຸດລົງເມື່ອທຽບໃສ່ຫຼາຍປີທີ່ຜ່ານມາ.
ສາເຫດທີ່ເຮັດໃຫ້ເກີດອັກຄີໄພໃນໄລຍະຜ່ານມາ ສ່ວນຫຼາຍແມ່ນເກີດຈາກໄຟຟ້າລັດວົງຈອນ, ເລີນເລີ້ຂາດສະຕິ, ຂາດຄວາມຮັບຜິດຊອບ ເປັນຕົ້ນ: ການນໍາໃຊ້ໄຟຟ້າເຂົ້າໃນການຜະລິດ, ດຳເນີນທຸລະກິດ, ດຳລົງຊີວິດປະຈໍາວັນ, ຈູດຂີ້ເຫຍື້ອ-ຈູດປ່າຊະຊາຍ, ໄຕ້ທູບທຽນບູຊາ ແລະ ອື່ນໆ.
ສະເພາະ ຢູ່ນະຄອນຫຼວງວຽງຈັນ ທີ່ເປັນສູນກາງເສດຖະກິດ-ສັງຄົມຂອງປະເທດ, ນັບແຕ່ເລີ່ມຕົ້ນປີໃໝ່ສາກົນ 2025 ເປັນຕົ້ນມາ ມີອັກຄີໄພເກີດຂຶ້ນແລ້ວຫຼາຍຄັ້ງ, ໃນນັ້ນ ອັກຄີໄພໃຫຍ່ກວ່າໝູ່ທີ່ເກີດຂຶ້ນຫຼ້າສຸດ ແມ່ນໄຟໄໝ້ໂຮງງານກາເຟມີຣາໂຄລາວຈຳກັດຜູ້ດຽວ ແລະ ບໍລິສັດມີຣາໂຄອາຫານ ແລະ ເຄື່ອງດື່ມຈຳກັດຜູ້ດຽວ ຕັ້ງຢູ່ເຂດບ້ານດອນກອຍ ເມືອງສີສັດຕະນາກ ນະຄອນຫຼວງວຽງຈັນ ເຮັດໃຫ້ເສຍຫາຍຢ່າງຫຼວງຫຼາຍ ແລະ ຍັງບໍ່ສາມາດປະເມີນໄດ້ລະອຽດເທື່ອ.
ແຫຼ່ງຂ່າວ: LNR