ຕຳຫຼວດມຽນມາຍຶດເຄຕາມີນມູນຄ່າ 2,4 ແສນໂດລາ ໃນລົດຕ້ອງສົງໃສ ຢູ່ລັດສານ ອີງຕາມສຳນັກຂ່າວຊິນຫົວລາຍງານໃນວັນທີ 3 ກຸມພາ 2025 ຜ່ານມາ, ເຈົ້າໜ້າທີ່ຕຳຫຼວດມຽນມາສາມາດຍຶດຢາເສບຕິດ ປະເພດ ເຄຕາມີນລວມ 62 ກິໂລກຣາມ ຢູ່ບໍລິເວນເສັ້ນທາງໃກ້ກັບໝູ່ບ້ານ Wantarpong ໃນລັດສານ ທາງພາກຕາເວັນອອກ ຂອງ ມຽນມາ.
ເຈົ້າໜ້າທີ່ຕຳຫຼວດປາບປາມຢາເສບຕິດ ພ້ອມພາກສ່ວນກ່ຽວຂ້ອງ ໄດ້ທຳການກວດຄົ້ນລົດໃຫຍ່ຕ້ອງສົງໃສຄັນໜຶ່ງ ເຊິ່ງເດີນທາງມາແຕ່ Mongkhat ເມື່ອທຳການກວດຄົ້ນລົດດັ່ງກ່າວຈຶ່ງພົບ ເຄຕາມີນທີ່ຖືກເຊື່ອງໃສ່ຖົງຊາ 62 ຖົງລວມນ້ຳໜັກປະມານ 62 ກິໂລກຣາມ. ພາຍຫຼັງໄດ້ທຳການສືບສວນ-ສອບສວນຜູ້ຕ້ອງຫາຈຶ່ງຮູ້ວ່າຢາເສບຕິດທັງໝົດ ໄດ້ຖທກນຳມາຈາກເມືອງຍາງ ກຽມສົ່ງໄປໃນຈັງຫວັດທ່າຂີ້ເຫຼັກ ຊາຍແດນໄທ-ມຽນມາ.
ທັງນີ້ເຈົ້າໜ້າທີ່ຕຳຫຼວດປາບປາມຢາເສບຕິດ ຈະທຳການສືບສວນ-ສອບສວນອີກຄັ້ງເພື່ອຂະຫຍາຍຜົນຫາຜູ້ຮ່ວມຂະບວນການໃນການຂົນສົ່ງຢາເສບຕິດຄັ້ງນີ້.