ເດັກຍິງອາຍຸ 17 ປີ ໃນອອສເຕເລຍຖືກປາສະຫຼາມກັດ ໃນຂະນະລອຍນ້ຳຫຼິ້ນຢູ່ນອກຊາຍຝັ່ງໃຫ້ເມືອງບິສແບນ ແລະ ເສຍຊີວິດໃນເວລາຕໍ່ມາ ນັບເປັນເຫດສະຫຼາມທຳຮ້າຍຄົນຈົນເສຍຊີວິດໃນອອສເຕເລຍເປັນຄັ້ງທີ 2.
ສຳນັກຂ່າວຕ່າງປະເທດລາຍງານໃນວັນທີ 3 ກຸມພາ 2025 ນີ້ວ່າ: ເຈົ້າໜ້າທີ່ໜ່ວຍກູ້ໄພໄດ້ຮັບແຈ້ງວ່າເກີດເຫດປາສະຫຼາມທຳຮ້າຍຄົນຢ່າງຮຸນແຮງ ທີ່ຫາດຊາຍວູຣິມ (Woorim Beach) ທາງເໜືອຂອງ ເມືອງບິສແບນ ເມື່ອເວລາປະມານ 16:45 -ໂມງ ຂອງວັນທີ 3 ກຸມພາ 2025 ຜ່ານມາ.
ເຈົ້າໜ້າທີ່ຕຳຫຼວດສາມາດຢືນຢັນໄດ້ວ່າ: ຂະນະເກີິດເຫດ ເດັກຍິງຄົນນີ້ໄດ້ລົງຫຼິ້ນນ້ຳຢູ່ໃນທະເລນອກຊາຍຝັ່ງເກາະບານບີ ເຊິ່ງເປັນທີ່ຕັ້ງຂອງຫາດດູຣິມ ກ່ອນຈະຖືກສະຫຼາມໂຕດັ່ງກ່າວທຳຮ້າຍ ແຕ່ຍັງບໍ່ສາມາດລະບຸສາຍພັນໄດ້ ຕາມການລາຍງານປາສະຫຼາມໄດ້ກັດບໍລິເວນແຂນ ແລະ ບໍລິເວນສ່ວນເທິງຕົວ ຈົນເຮັດໃຫ້ເສຍຊີວິດເວລາຕໍ່ມາທີ່ໂຮງໝໍ.
ທັງນີ້ເຈົ້າໜ້າທີ່ຍັງໄດ້ລະບຸຕື່ມອີກວ່ານ້ຳບໍລິເວນຈຸດເກີດເຫດເປັນທີ່ຢູ່ຂອງສະຫຼາມຢ່າງຫຼວງຫຼາຍ ເຊິ່ງເຈົ້າໜ້າທີ່ມີມາດຕະການປ້ອງກັນ ບໍລິເວນໃກ້ຊາຍຝັ່ງໂດຍໃຊ້ຫຸ່ນທີ່ເອີ້ນວ່າ “drumline” ເຊິ່ງມີສະມໍດຶງໄວ້ ແລະ ມິຂໍເກາະໄວ້ດັກປາສະຫຼາມທີ່ລອຍເຂົ້າມາໃກ້ເກີນໄປ ເຊິ່ງສະຫຼາມທີ່ຖືກຈັບໄດ້ບາງສາຍພັນຈະໄດ້ທຳການທາລຸນຍະຄາດ ຂະນະທີ່ບາງສາຍພັນຈະຖືກປ່ອຍໃນບໍລິເວນອື່ນ.
ຢ່າງໃດກໍຕາມ ຄັ້ງນີ້ນັບເປັນເຫດການຄັ້ງທີ 2 ທີ່ສະຫຼາມທຳຮ້າຍຄົນຈົນເສຍຊີວິດ, ຄັ້ງທຳອິດເກີດຂຶ້ນເມື່ອວັນທີ 4 ມັງກອນ ໃນປີ 2024 ໂດຍນັກໂຕ້ຄື້ນ ຖືກໂຈມຕີທີ່ບໍລິເວນນອກຊາຍຝັ່ງ ລັດເຊົາອອສເຕເລຍ ຈົນເປັນເຫດເຮັດໃຫ້ເສຍຊີວິດ.